3 மாத பெண் குழந்தையை தாயே மருத்துவமனையின் 3-வது மாடியில் இருந்து தூக்கி வீசிய சம்பவம் அதிர்ச்சியை ஏற்படுத்தியுள்ளது.
குஜராத்தில் அகமதாபாத்தில் உள்ள மருத்துவமனையின் மூன்றாவது மாடியில் இருந்து தனது மூன்று மாத மகளை தூக்கி எறிந்து கொலை செய்த குற்றச்சாட்டின் பேரில் 23 வயது பெண் ஒருவர் கைது செய்யப்பட்டார்.
குழந்தையை வீசியதன் விளைவாக குழந்தை இறந்தது என்று காவல்துறை அதிகாரி ஒருவர் திங்கள்கிழமை தெரிவித்தார்.
ஞாயிற்றுக்கிழமை அதிகாலை அசர்வா பகுதியில் உள்ள மருத்துவமனையில் இந்த சம்பவம் நடந்துள்ளது.
ஆனந்த் மாவட்டத்தில் உள்ள பெட்லாட் தாலுகாவைச் சேர்ந்த ஃபர்ஸானா பானு மாலேக், தனது குழந்தை அம்ரின் பானு பிறப்பிலிருந்தே உடல் நலக்குறைவால் அவதிப்பட்டு வருவதாலும், மிகவும் வேதனையுடன் இருப்பதைக் கண்டு தாங்க முடியவில்லை என்பதாலும் தான் இப்படியொரு முடிவை எடுத்ததாக ஃபர்ஸானா பானு கூறியுள்ளார்.
இருப்பினும், குழந்தை மருத்துவமனையில் இருந்து காணாமல் போனதாகக் கூறி முதலில் தவறாக வழிநடத்த முயன்றார். ஆனால் சிவில் மருத்துவமனையின் சிசிடிவி காட்சிகள் மூலம் உண்மை கண்டறியப்பட்டது.
சிசிடிவி காட்சிகளில், அவர் தனது மகளை தூக்கிக்கொண்டு கேலரியை நோக்கி செல்வதையும், பின்னர் வெறுங்கையுடன் திரும்பி வருவதையும் காணமுடிந்தது.
மேலும், குழந்தை அம்ரின் உடலை மருத்துவமனை ஊழியர்கள் தரை தளத்தில் கண்டனர்.
இதையடுத்து, அந்த பெண் தனது குற்றத்தை ஒப்புக்கொண்டதாக பொலிஸார் தெரிவித்தனர்.
ஞாயிற்றுக்கிழமை காவல் நிலையத்தில் பதிவு செய்யப்பட்ட எஃப்ஐஆர் படி, குழந்தை பிறந்த உடனேயே நோய்வாய்ப்பட்டு வதோதராவில் உள்ள எஸ்எஸ்ஜி மருத்துவமனையில் அறுவை சிகிச்சை செய்யப்பட்டது, அங்கு அவர் 24 நாட்கள் அனுமதிக்கப்பட்டார்.
வதோதராவில் உள்ள மருத்துவர்கள் அசுத்தமான தண்ணீரை உட்கொண்டது தான் நோய்க்கு காரணம் என்று குழந்தையின் தந்தை ஆசிப் பொலிஸாரிடம் கூறியதாக, அதிகாரி கூறினார்.
FIR-ன் படி, குழந்தையின் உடல்நிலை மோசமடைந்ததை அடுத்து டிசம்பர் 14 அன்று நாடியாட்டில் உள்ள மருத்துவமனைக்கு அழைத்துச் செல்லப்பட்டார், பின்னர் அவரது குடலின் ஒரு பகுதி வயிற்றில் இருந்து வெளியேறியதால் இங்குள்ள சிவில் மருத்துவமனைக்கு மாற்றப்பட்டது.
தங்கள் மகள் சிவில் மருத்துவமனையில் இருந்து காணாமல் போய்விட்டதாக அப்பெண் கூறிய பிறகு, ஆசிஃப் அங்கிருந்த ஊழியர்களை எச்சரித்து காவல்துறையை அழைத்துள்ளார்.