மக்களின் பாதுகாப்பை காரணம் காட்டி தேசிய நெடுஞ்சாலைகள் உள்ளிட்ட சாலைகளில் பொதுக் கூட்டங்கள் மற்றும் பேரணிகள் நடத்த ஆந்திர பிரதேச மாநில அரசு தடை விதித்துள்ளது.
ஆந்திர பிரதேச மாநிலத்தில், முதலமைச்சர் ஜெகன் மோகன் ரெட்டி தலைமையிலான ஒய்.எஸ்.ஆர். காங்கிரஸ் கட்சியின் ஆட்சி நடைபெற்று வருகிறது. இந்த மாநிலத்தின் நெல்லூர் அடுத்த கந்துகூரில் கடந்த டிசம்பர் மாதம் 28 ஆம் தேதி தெலுங்கு தேசம் கட்சி சார்பில் பொதுக்கூட்டம் நடந்தது.
இந்த கூட்டத்தில் கலந்து கொள்வதற்காக வந்த தெலுங்கு தேசம் கட்சி தலைவர் சந்திரபாபு நாயுடு நெல்லூரிலிருந்து பொதுக்கூட்டம் நடந்த கந்துகூர் வரை உள்ள 11 கிலோ மீட்டர் தூரத்திற்கு தேசிய நெடுஞ்சாலையில் சாலை பேரணி நடத்தினார். இதனால் தேசிய நெடுஞ்சாலையில் போக்குவரத்து பாதிக்கப்பட்டது.
பொதுக் கூட்ட நெரிசலில் சிக்கி 8 பேர் பரிதாபமாக இறந்தனர். விபத்து குறித்து போலீசார் மற்றும் அதிகாரிகள் நடத்திய விசாரணையில் தேசிய நெடுஞ்சாலையையொட்டி குறுகிய பகுதியில் பல்லாயிரக்கணக்கான கட்சித் தொண்டர்கள் குவிந்ததால் நெரிசலில் சிக்கி 8 பேர் பலியானது தெரிய வந்தது.
இந்நிலையில், மக்களின் பாதுகாப்பை காரணம் காட்டி தேசிய நெடுஞ்சாலைகள் உள்ளிட்ட சாலைகளில் பொதுக் கூட்டங்கள் மற்றும் பேரணிகள் நடத்த ஆந்திர பிரதேச மாநில அரசு தடை விதித்துள்ளது. இதற்கான உத்தரவை, ஆந்திர மாநில முதன்மைச் செயலாளர் ஹரிஷ் குமார் குப்தா பிறப்பித்து உள்ளார்.
இது தொடர்பாக அவர் வெளியிட்டுள்ள சுற்றறிக்கையில், “தேசிய நெடுஞ்சாலைகளில் பேரணி நடத்துவதால் போக்குவரத்து பாதிக்கப்படுகிறது. போக்குவரத்து இடையூறு, பொது மக்கள் அவசர கால சேவைகள், அத்தியாவசிய பொருட்கள் இயக்கம் உள்ளிட்டவைகளுக்கு இடையூறு ஏற்படாத வகையில் பொதுக்கூட்டங்கள் நடத்துவதற்காக அந்தந்த மாவட்ட நிர்வாகம், காவல் துறை அதிகாரிகளிடம் அனுமதி பெற்றுக் கொள்ள வேண்டும்.
“பொது சாலைகளில் கூட்டங்கள் அனுமதிப்பதை அதிகாரிகள் தவிர்க்க வேண்டும். அரிதான மற்றும் விதிவிலக்கான சூழ்நிலைகளில் மட்டும் பொதுக்கூட்டங்கள் நடத்துவதற்கான அனுமதியை எழுத்துப்பூர்வமாக பதிவு செய்து பரிசீலிக்க வேண்டும். பொதுக்கூட்டங்கள் மற்றும் சாலை ஓரங்களில் கூட்டம் நடத்துவதால் உயிரிழப்புகள் ஏற்படுகிறது. எனவே அரசியல் கட்சியினர் ஒத்துழைப்பு வழங்க வேண்டும்,” என தெரிவிக்கப்பட்டு உள்ளது. ஆந்திர மாநில அரசின் இந்த முடிவை எதிர்க்கட்சிகள் கடுமையாக விமர்சனம் செய்துள்ளன.