கீழக்கரை: கீழக்கரையில் பிரதான சாலைகளான வள்ளல் சீதக்காதி சாலை, போஸ்ட் ஆபிஸ் சாலை, வடக்கு தெரு, சேகு அப்பாசாலை உள்ளிட்ட இடங்களில் சிலர் தனது வாகனங்களை இஷ்டப்படி இரண்டு புறங்களிலும் நிறுத்தி கொள்கின்றனர். பள்ளி நேரங்களில் சரக்கு வாகனங்களை இரண்டு புறங்களிலும் நிறுத்தி சரக்குகளை இறக்குவதாலும் போக்குவரத்திற்கு மிகவும் இடையூறாக உள்ளது. இதுகுறித்து பொதுமக்கள் கூறுகையில், வள்ளல் சீதக்காதி சாலையில் இஷ்டப்படி வாகனங்களை நிறுத்தி கொள்வதால் வெளிமாநிலங்களில் இருந்து வரும் பஸ் மற்றும் வாகனங்கள் செல்ல முடியாமல் கடும் சிரமத்திற்கு உள்ளாகின்றனர்.
மேலும் போஸ்ட் ஆபிஸ் தெருவில் அனைத்து வங்கிளும் இருப்பதால் அங்கு காலையிலிருந்து மாலை வரை மக்கள் போக்குவரத்து அதிகளவில் இருக்கும். இந்நிலையில் இங்கு சிலர் வாகனங்களை அதிக நேரம் நிறுத்தி கொள்வதாலும், ஆட்டோ ஓட்டுனர்கள் இரண்டு புறங்களிலும் நிறுத்தி வைத்து கொள்வதாலும் வங்கிக்கு வரும் மக்கள் நடந்து செல்வதற்கு கூட சிரமப்படுகின்றனர். ஆகவே போக்குவரத்து காவலர்களை நியமித்து போக்குவரத்தை சீர்செய்ய வேண்டும்.