தமிழகத்தில் வடகிழக்கு பருவமழைக்கு குட்பை சொல்லியாகி விட்டது. இதையடுத்து வானிலை பனிமூட்டத்தை நோக்கி நகர்ந்து கொண்டிருக்கிறது. கடந்த சில நாட்களாக இரவு மற்றும் அதிகாலை பனியை சமாளிக்க முடியாமல் மக்கள் தவித்து வருகின்றனர். குறிப்பாக சென்னை வானிலை ஆய்வு மையம் வெளியிட்டுள்ள தகவலில், லேசான பனிமூட்டம், வறண்ட வானிலை, பலத்த காற்று, மீனவர்களுக்கு எச்சரிக்கை ஆகியவை முக்கிய அம்சங்களாக இடம்பெற்றுள்ளன.
வானிலை நிலவரம்
அதாவது, ஜனவரி 10 முதல் 13ஆம் தேதி வரை தமிழ்நாடு, புதுச்சேரி மற்றும் காரைக்கால் பகுதிகளில் வறண்ட வானிலை நிலவக்கூடும். சென்னை மற்றும் அதன் புறநகர்ப் பகுதிகளை பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 29 டிகிரி செல்சியஸ் மற்றும் குறைந்தபட்ச வெப்பநிலை 20 டிகிரி செல்சியஸ் அளவில் இருக்கக்கூடும்.
மீனவர்களுக்கு எச்சரிக்கை
காலை வேளையில் லேசான பனிமூட்டம் காணப்படும். மீனவர்களுக்கான எச்சரிக்கையில், இன்றைய தினம் மன்னார் வளைகுடா மற்றும் அதனை ஒட்டிய குமரிக்கடல் பகுதிகளில் வடகிழக்கு திசையில் இருந்து பலத்த காற்று மணிக்கு 45 முதல் 55 கிலோமீட்டர் வேகத்தில் வீசக்கூடும். எனவே இப்பகுதிகளுக்கு மீனவர்கள் செல்ல வேண்டாம் என்று கேட்டுக் கொள்ளப்பட்டுள்ளது.
மழை நிலவரம்
நேற்று நண்பகல் உடன் முடிவடைந்த 24 மணி நேரத்தில் திருநெல்வேலி மாவட்டம் நாலுமுக்கு, கடலூர் மாவட்டம் அண்ணாமலை நகரில் தலா ஒரு சென்டிமீட்டர் அளவிற்கு மழை பெய்துள்ளது. இந்நிலையில் தமிழ்நாடு வெதர்மேன் பிரதீப் ஜான் தனது ட்விட்டரில், இரவு நேர வெப்பநிலை தொடர்ச்சியாக குறைந்து கொண்டே செல்லும் என எதிர்பார்க்கப்படுகிறது.
வெதர்மேன் அப்டேட்
பொங்கல் பண்டிகை நாட்களில் பனி அதிகமாக இருக்கும். அந்த சமயத்தில் முதல் குளிர்காலத்தை உணர முடியும். சென்னை நுங்கம்பாக்கத்தில் கடந்த இரண்டு ஆண்டுகளில் ஜனவரி மாதத்தில் 20 டிகிரி செல்சியஸ்க்கு கீழ் குறைந்ததில்லை. ஆனால் 2023ஆம் ஆண்டு பொங்கல் பண்டிகையின் போது 18 டிகிரிக்கு கீழ் வெப்பநிலை குறைய வாய்ப்புள்ளது.
குறையும் வெப்பநிலை
வேலூரில் 14 டிகிரி செல்சியஸ் என்ற நிலைக்கு கூட செல்லலாம். அடுத்த சில நாட்களில் இதற்கான அறிகுறிகளை தெளிவாக பார்க்க முடியும் எனக் குறிப்பிட்டுள்ளார். இதனால் வரும் நாட்களில் பனியின் தாக்கம் அதிகமாக இருக்கும். அதற்கேற்ப தமிழக மக்கள் அனைவரும் தயாராகி கொள்ள வேண்டியது அவசியமாகிறது. சென்னையில் கடந்த சில ஆண்டுகளில் ஜனவரி மாதம் பதிவான குறைந்தபட்ச வெப்பநிலை நிலவரம்…
21.01.2017 – 26.4 டிகிரி செல்சியஸ்20.01.2016 – 25.8 டிகிரி செல்சியஸ்05.01.2020 – 25.7 டிகிரி செல்சியஸ்11.01.2021 – 25.6 டிகிரி செல்சியஸ்24.01.2016 – 25.5 டிகிரி செல்சியஸ்06.01.2023 – 25.5 டிகிரி செல்சியஸ்