உச்ச நீதிமன்றம் மற்றும் உயர் நீதிமன்றங்களில் கொலிஜியம் முறைப்படி நீதிபதிகள் நியமனம் நடைபெறுகிறது. கொலிஜியத்தில் இடம்பெற்றுள்ள நீதிபதிகள் அளிக்கும் பரிந்துரையின் பேரில், ஒன்றிய அரசு புதிய நீதிபதிகளை நியமிக்கிறது. அந்தவகையில் நாட்டில் உள்ள பல்வேறு நீதுமன்றங்களில் நீதிபதிகளை நியமிக்க பரிந்துரைத்து, கொலிஜியம் கேட்டுக் கொண்டது. ஆனால் ஒன்றிய அரசு அதற்கு எந்த முடிவையும் சொல்லவில்லை. இதனால் பல நீதிமன்றங்களில் நீதிபதிகள் நியமிக்கப்படாமல் உள்ளது.
இதையடுத்து நீதி அமைப்பிற்கும், ஒன்றிய அரசிற்கும் இடையேயான மோதல் போக்கு வெளிச்சத்திற்கு வந்தது. அதனால் தான் தலைமை நீதிபதி சந்திரசூட் பதவி ஏற்பு விழாவைக் கூட பிரதமர் நரேந்திரமோடி புறக்கணித்தார் என்கிறார்கள் அரசியல் நோக்கர்கள். சுதந்திர இந்தியாவின் வரலாற்றில், தலைமை நீதிபதி பதவி ஏற்பில் பிரதமர் கலந்து கொள்ளாதது இதுவே முதல்முறை என்பது குறிப்பிடதக்கது.
இந்நிலையில், கடந்த கடந்த நவம்பரில் நடந்த நிகழ்ச்சி ஒன்றில் பேசிய ஒன்றிய சட்ட அமைச்சர் கிரண் ரிஜிஜு, கொலிஜியம் முறையை கடுமையாக விமர்சித்தார். கொலிஜியம் அமைப்பில் உள்ள நீதிபதிகள், தங்களுக்கு தெரிந்த வழக்கறிஞர்களை நீதிபதிகளாக பரிந்துரைப்பதாகவும், இதேபோல், தங்களுக்குத் தெரிந்த நீதிபதிகளுக்கு பதவி உயர்வு அளிக்க பரிந்துரைப்பதாகவும் கூறி, இது அடிப்படையிலேயே குறைபாடு உள்ள நடைமுறை என விமர்சித்தார். அவர்கள் அந்தப் பதவிக்கு தகுதியானவர்கள் என்ற அடிப்படையில் மட்டுமே பரிந்துரைகள் இருப்பதில்லை என்றும் கிரண் ரிஜிஜு குற்றம்சாட்டினார்.
அதைத் தொடர்ந்து துணை ஜனாதிபதி ஜகதீப் தன்கரும், நீதி அமைப்பு பாராளுமன்றத்தை கட்டுப்படுத்துவதாக அதிருப்தி தெரிவித்தார். இந்தநிலையில் நாட்டின் நீதி அமைப்பை ஆளும் பாஜக கைப்பற்ற துடிப்பதாக காங்கிரஸ் ராஜ்யசபா எம்பி கபில்சிபல் தெரிவித்துள்ளார்.
இது குறித்து ராஜ்யசபா எம்.பி.யும், முன்னாள் சட்ட அமைச்சருமான கபில் சிபல் கூறும்போது, ‘‘அரசாங்கம் நீதித்துறையை கைப்பற்ற முயற்சிக்கிறது. இன்னொரு அவதாரத்தில் தேசிய நீதிபதிகள் நியமன ஆணையம் (என்ஜேஏசி) உருவாகும் சூழ்நிலையை உருவாக்க முடிந்தவரை முயற்சிக்கிறது.
தேசிய நீதிபதிகள் நியமன ஆணைய விவகாரத்தில் கேசவானந்த பாரதியின் தீர்ப்பில் கூறப்பட்டுள்ள அடிப்படைக் கட்டமைப்புக் கோட்பாடானது தற்போதைய காலத்தில் மிகவும் முக்கியமானது. உயர் நீதித்துறையில் நியமனங்கள் குறித்த இறுதி வார்த்தை அரசாங்கத்திடம் இல்லை.
தேசிய நீதிபதிகள் நியமன ஆணையம் (NJAC) மீண்டும் ஒரு அவதாரத்தில் உச்ச நீதிமன்றத்தில் சோதிக்கப்படும் சூழ்நிலையை உருவாக்க அவர்கள் தங்களால் இயன்றவரை முயற்சி செய்கிறார்கள். சட்ட அமைச்சருக்கு நீதிமன்றங்களின் செயல்பாடுகள் பற்றி நன்றாகத் தெரியவில்லை. நீதிமன்ற நடைமுறைகள் பற்றி அவருக்குத் தெரியாது என்று நான் முன்பே கூறியுள்ளேன்.
அது போல அனைத்து நிறுவனங்களும் அவர்களால் கைப்பற்றப்பட்டுள்ளன. சுதந்திரத்தின் கடைசி கோட்டை நீதித்துறை. உயர் நீதித்துறைக்கு நீதிபதிகள் நியமனம் குறித்த இறுதி வார்த்தை அரசாங்கத்திடம் விடப்பட்டால், அவர்கள் இந்த நிறுவனங்களை அதிகாரத்தில் உள்ள அரசியல் கட்சியின் சித்தாந்தத்துடன் இணைந்த நபர்களால் நிரப்புவார்கள்.
அவர்களால் கைப்பற்றப்பட்ட இந்த நிறுவனங்கள் அரசாங்கத்தின் வழிகாட்டுதலின்படி செயல்படுகின்றன அல்லது அவர்களுக்கு நன்கு தெரிந்த காரணங்களுக்காக அரசாங்கத்தை மகிழ்விக்க விரும்புவதாக நாங்கள் உணர்கிறோம்.
ரெய்டு..! – குற்றஞ்சாட்டும் மணீஷ் சிசோடியா; மறுக்கும் சிபிஐ
அடிப்படைக் கட்டமைப்புக் கோட்பாடு எவ்வளவு முக்கியமானது என்பதையும், நமது வாழ்வின் அடிப்படையான பேச்சுரிமை, வாழ்வுரிமை மற்றும் சுதந்திரம் போன்ற அரசியலமைப்புச் சட்டத்தின் அம்சங்களைக் கூறிய கேசவானந்த பாரதி (தீர்ப்பு) எவ்வளவு சரியானது என்பதையும் இதுபோன்ற சமயங்களில் நாம் உணர்ந்திருக்கிறோம் என்று நினைக்கிறேன்’’ என அவர் தெரிவித்துள்ளார்.