சென்சாருக்கு சென்ற விஜய்யின் லியோ பட டைட்டில் டீசர்!
மாஸ்டர் படத்தை அடுத்து லோகேஷ் கனகராஜ் இயக்கத்தில் விஜய் நடித்து வரும் லியோ படத்தின் படப்பிடிப்பு தற்போது காஷ்மீரில் நடைபெற்று வருகிறது. அங்கு விஜய்யுடன் சஞ்சய் தத், அர்ஜுன், திரிஷா, ப்ரியா ஆனந்த், கவுதம் மேனன் உட்பட பலர் நடித்து வருகிறார்கள். கடுமையான பனிப்பொழிவுக்கு நடுவே லியோ படப்பிடிப்பு தொய்வில்லாமல் நடைபெற்று வருகிறது. அதோடு 15 நாட்கள் மட்டுமே அங்கு படப்பிடிப்பு நடைபெறும் என்று கூறப்பட்ட நிலையில், தற்போது இரண்டு மாதங்களுக்கு காஷ்மீரில் படப்பிடிப்பு நடைபெற உள்ளதாக தகவல்கள் வெளியாகி உள்ளன.
இந்த நிலையில் லியோ படத்தின் டைட்டில் டீசர் வீடியோ வெளியாகி பெரிய அளவில் ரசிகர்கள் மத்தியில் வரவேற்பு பெற்ற நிலையில், தற்போது அந்த டைட்டில் டீசரை பிப்ரவரி 17ம் தேதி திரைக்கு வரும் தனுஷின் வாத்தி படத்தின் இடைவெளியின் போது வெளியிட திட்டமிட்டுள்ளார்கள். அதன் காரணமாக லியோ படத்தை தயாரிக்கும் செவன் ஸ்கிரீன் ஸ்டுடியோ நிறுவனம் தற்போது லியோ பட டைட்டில் டீசரை சென்சார் சான்றிதழ் பெறுவதற்காக அனுப்பி வைத்துள்ளது.