செந்தில் பாலாஜியை திட்டமிட்டபடி காவலில் எடுத்து விசாரிக்க முடியவில்லையே என்று துடித்துக் கொண்டிருக்கும் அமலாக்கத்துறை அடுத்தகட்ட அதிரடி நடவடிக்கையை மேற்கொள்ள உள்ளது.
அமலாக்கத்துறையால் கைது செய்யப்பட்ட அமைச்சர் செந்தில் பாலாஜிக்கு கடந்த சில தினங்களுக்கு முன்னர் பைபாஸ் அறுவை சிகிச்சை செய்யப்பட்டது. தொடர்ந்து தீவிர சிகிச்சை பிரிவில் கண்காணிக்கப்பட்டு வந்த அவர் தற்போது தனி அறைக்கு மாற்றப்பட்டுள்ளார்.
2014 – 15 காலகட்டத்தில் நடைபெற்றதாக கூறப்படும் பண மோசடி வழக்கு தொடர்பாக விசாரிப்பதாக கூறப்பட்டாலும் செந்தில் பாலாஜி மற்றும் அவர் தொடர்புடையவர்களின் மொத்த ஜாதகத்தையும் அள்ளிச் சென்றுள்ளார்கள் அமலாக்கத்துறையினர்.
செந்தில் பாலாஜி திமுக அமைச்சராக பதவியேற்ற பின்னர் நடைபெற்ற கொடுக்கல் வாங்கல், பரிவர்த்தனைகளை துளாவி வருகிறதாம்.
செந்தில் பாலாஜியின் வீட்டில் சோதனை நடத்திய போதே ஒரு டீம் தலைமைச் செயலகத்துக்குள் நுழைந்தது. முக்கிய கோப்புகள் அனைத்தும் அமைச்சரின் அறையில் இருப்பதாக ஒரு தகவலைப் பெற்றதால் சோதனையை அங்கு முடுக்கிவிட்டது. ஆரம்பத்தில் அங்கிருந்தவர்கள் மறுப்பு தெரிவித்தாலும் வேறு வழியில்லாமல் ஒதுங்கிக்கொண்டனர்.
முக்கியமான கோப்புகள் அமைச்சர் அறையில் கைப்பற்றப்பட்டதாக சொல்கிறார்கள். மதுவிலக்கு துறை தொடர்பான கோப்பு ஒன்று தான் செந்தில் பாலாஜிக்கு பெரிய சிக்கலை ஏற்படுத்தும் என்கிறார்கள். அந்த துறையை கவனித்து வந்த ஒரு அதிகாரி நாள்தோறும் அமைச்சருக்கு ரிப்போர்ட் ஒன்றை வழங்கியுள்ளார். அந்த ரிப்போர்ட் தான் தற்போது அமலாக்கத்துறையின் கைகளுக்கு சென்றுள்ளதாம். எனவே விரைவில் அந்த அதிகாரியை விசாரணை வளையத்துக்குள் கொண்டு வர திட்டமிட்டுள்ளதாக தகவல்கள் வருகின்றன.
மக்களவைத் தேர்தலுக்கு தீவிரமாக தயாராகிவரும் வேளையில் அதற்கு முட்டுகட்டை போடும் விதமாக பாஜக அரசு இது போன்ற நடவடிக்கைகளை ஏவி விடுகிறது, அதை துணிச்சலுடன் சமாளிக்க வேண்டும் என தனக்கு நெருக்கமானவர்களிடம் கூறிவருகிறார் ஸ்டாலின். அதே சமயம் ஏற்கனவே திமுக அமைச்சர் கைது செய்யப்பட்டுள்ள நிலையில் தனது அரசில் பணியாற்றும் அதிகாரிகளும் விசாரணை வளையத்துக்குள் வர உள்ளதாக வரும் தகவல் முதல்வருக்கு தர்ம சங்கடத்தை ஏற்படுத்தியுள்ளதாம்.