போபால்:
மத்திய பிரதேசத்தில் பழங்குடியின இளைஞர் மீது சிறுநீர் கழித்த பாஜக பிரமுகருக்கு ஆதரவாக பிராமணர்கள் போராட்டம் நடத்தி வருகின்றனர். இந்தப் போராட்டத்தில் கலந்துகொண்ட ஒருவர் பேசிய பேச்சுதான் தற்போது சமூக வலைதளங்களில் வைரலாகி வருகிறது.
மத்திய பிரதேச மாநிலம் சித்தி மாவட்டத்தில் பாஜக இளைஞரணி தலைவராக இருப்பவர் ப்ரவேஷ் சுக்லா. இவர் கடந்த வாரம் தனது வீட்டுக்கு பைக்கில் சென்று கொண்டிருந்தார். அவரது வீட்டுக்கு அருகே உள்ள காலி இடத்தில் பழங்குடியின சமூகத்தினர் வசித்து வருகின்றனர்.
இதனிடையே, அப்பகுதியில் தனது பைக்கை நிறுத்திய அவர், அங்கு சாலையோரம் அழுக்குபடிந்த கிழிந்த சட்டையுடன் அமர்ந்திருந்த பழங்குடியின இளைஞரை நோக்கி சென்றார். பின்னர் அப்படியே அந்த இளைஞரின் மீது சிறுநீர் கழித்தார்.
இதனை அங்கிருந்த ஒருவர், தனது செல்போனில் வீடியோ எடுத்து சமூக வலைதளங்களில் பதிவிட, அது நாடு முழுவதும் தீயாக பரவி பெரும் கண்டனங்களையும், விமர்சனங்களையும் ஈர்த்தது. இத்தகைய தரக்குறைவான செயலில் ஈடுபட்ட ப்ரவேஷ் சுக்லாவை கைது செய்யக்கோரி காங்கிரஸ் உள்ளிட்ட எதிர்க்கட்சி போராட்டத்தில் ஈடுபட்டன.
டாஸ்மாக் கடையை காலையிலேயே திறப்பீங்களா.. விட்ருவோமா நாங்க.. ராமதாஸ் அதிரடி
இந்த விவகாரம் பூதாகரமாவதை உணர்ந்த பாஜக அரசு, ப்ரவேஷ் சுக்லாவை கைது செய்ய உத்தரவிட்டது. மேலும், அவரது சொந்த வீடும் புல்டோசரால் இடித்து தரைமட்டமாக்கப்பட்டது. இந்நிலையில், ப்ரவேஷ் சுக்லா கைது செய்யப்பட்டதை கண்டித்து பிராமண சங்கங்கள் அங்கு போராட்டத்தில் ஈடுபட்டு வருகின்றன. மேலும், அவரது வீட்டை திரும்பக் கட்டுவதற்காக பணம் திரட்டும் பணியிலும் அவர்கள் ஈடுபட்டுள்ளனர். இதனிடையே, நேற்று நடைபெற்ற போராட்டத்தில் கலந்துகொண்ட ஒருவர், தொலைக்காட்சி நிருபரிடம் பேசினார்.
அவர் கூறுகையில், “ப்ரவேஷ் சுக்லா மது அருந்தியது தவறுதான். அதை மறுக்கவில்லை. ஆனால் அவர் அந்த இளைஞர் மீது சிறுநீர் கழித்ததில் என்ன தவறு இருக்கிறது?” எனக் கேள்வியெழுப்புகிறார். இந்த வீடியோவை பார்க்கும் போது, சக மனிதன் மீது சிறுநீர் கழித்ததை தவறு என்று கூட ஒப்புக்கொள்ள மனம் வராத மனிதர்கள் மத்தியில்தான் நாம் வாழ்ந்து கொண்டிருக்கிறோம் எனக் கேட்க தோன்றுகிறது.