ராமேஸ்வரத்தில் நாளைய தினம் (ஜூலை 28) ”என் மண் என் மக்கள்” என்ற பெயரில் தனது நடைபயணத்தை பாஜக மாநிலத் தலைவர் அண்ணாமலை தொடங்குகிறார். இங்கிருந்து அனைத்து தொகுதிகளுக்கும் பயணம் செய்து கடைசியில் சென்னை வந்து முடிக்கப் போகிறார். சுமார் 6 மாத அரசியல் பயணத்தில் தமிழக பாஜகவிற்கு புதிய உத்வேகம் பிறக்கும் என எதிர்பார்க்கப்படுகிறது. இது 2024 மக்களவை தேர்தலில் வாக்குகளாக வந்து விழும் எனக் கணக்கு போட்டு வைத்துள்ளனர்.
அண்ணாமலையை அரவணைக்கும் அமித்ஷா…பாஜகவின் திட்டம் என்ன?
ராமேஸ்வரம் புனித பூமி அரசியல்
ராமேஸ்வரத்தை நடைபயணத்தின் தொடக்கப் புள்ளியாக தேர்வு செய்ததற்கு பல்வேறு காரணங்கள் சொல்லப்படுகின்றன. வரும் தேர்தலில் ராமநாதபுரம் மக்களவை தொகுதியில் தான் பிரதமர் மோடி போட்டியிடப் போகிறார். ஏனெனில் வடக்கில் காசி எப்படியோ, அதுபோல தெற்கில் புனித பூமியாக ராமேஸ்வரம் திகழ்கிறது. இரண்டு புனித இடத்திலும் மோடி போட்டியிட்டார் என்ற பெருமை மோடியை வந்து சேரும்.
பாஜகவிற்கு ஆதரவு அலை
அதுமட்டுமின்றி பாஜகவிற்கு ஆதரவான மனநிலை ராமநாதபுரத்தில் காணப்படுகிறது. தேவர் சமூகமும், தேவேந்திர குல வேளாளர் சமூகமும் ஆதரவுக் கரம் நீட்டிக் கொண்டிருக்கிறது. இதனால் தான் முத்துராமலிங்க தேவர் மற்றும் இமானுவேல் சேகரன் ஆகியோருக்கு பாஜக முக்கியத்துவம் அளித்து செயல்பட்டு வருவதாக கூறுகின்றனர். இத்தகைய பின்னணியை கருத்தில் கொண்டே ராமநாதபுரம் தொகுதியை பாஜக தொடக்கப் புள்ளி வைத்துக் கொண்டதாக தெரிகிறது.
அமித் ஷா நேரில் வருகை
இந்த நடைபயணத்தை தொடங்கி வைக்க மத்திய உள்துறை அமைச்சர் அமித் ஷா நேரில் வருகிறார். நடைபயணத்திற்கு இடையில் நடைபெறும் 10 பொதுக்கூட்டங்களில் மத்திய அமைச்சர்கள் பலரும் கலந்து கொள்வர் என அண்ணாமலை தெரிவித்துள்ளார். இந்த சூழலில் அமித் ஷாவின் இரண்டு நாட்கள் பயணத்திட்டம் குறித்து தகவல் கிடைத்துள்ளது.
முதல் நாள் பயணத்திட்டம்
ஜூலை 28, வெள்ளி பிற்பகல் 1 மணி – டெல்லியில் இருந்து தனி விமானம் மூலம் புறப்படும் அமித் ஷா.மாலை 4 மணி – மதுரை விமான நிலையம் வந்தடைகிறார்.மாலை 4.50 மணி – ஹெலிகாப்டர் மூலம் ராமேஸ்வரம் செல்கிறார்மாலை 5.20 முதல் 5.40 மணி – தனியார் விடுதியில் ஓய்வெடுக்கிறார்.மாலை 5.45 மணி – ராமேஸ்வரத்தில் அண்ணாமலையின் நடைபயணத்தை தொடங்கி வைக்கிறார்இரவு 8.30 முதல் 9 மணி – முக்கியத் தலைவர்கள் உடன் அமித் ஷா ஆலோசனை
இரண்டாம் நாள் பயணத்திட்டம்
ஜூலை 29, சனி காலை 5.45 மணி – ராமேஸ்வரம் கோயிலில் சாமி தரிசனம்காலை 10.30 முதல் 10.50 மணி – பாஜக நிர்வாகிகள் உடன் சந்திப்புகாலை 11 மணி – அப்துல் கலாமின் “Memories Never Die” என்ற மொழிபெயர்ப்பு புத்தகத்தை வெளியிடுகிறார்நண்பகல் 12.05 மணி – அப்துல்கலாம் இல்லத்தை பார்வையிடுகிறார்
டெல்லி புறப்படும் அமித்ஷா
இதையடுத்து ஹெலிகாப்டர் மூலம் ராமேஸ்வரத்தில் இருந்து மதுரை செல்கிறார். அங்கிருந்து விமானம் மூலம் டெல்லி புறப்பட்டு செல்வதாக தெரிவிக்கப்பட்டுள்ளது. இந்த பயணத்தில் பாஜக நிர்வாகிகள் உடனான சந்திப்பில் மக்களவை தேர்தல் பணிகள் தொடர்பாக சில ஆலோசனைகள் வழங்கப்படும் என எதிர்பார்க்கப்படுகிறது.