ஹாலிவுட் கதாபாத்திரத்தில் காயத்ரி
செய்தியின் தலைப்பையும், அருகில் உள்ள படத்தையும் பார்த்துவிட்டு என்னாது காயத்ரி ஹாலிவுட் படத்தில் நடிக்கிறாரா என்று அதிர்ச்சி அடைய வேண்டாம். காயத்ரியை ஹாலிவுட் நடிகையாக நவீன ஏஐ தொழில்நுட்பத்தில் மாற்றி அவரது தீவிர ரசிகர் ஒருவர் வெளியிட்டிருக்கிறார். இதனை பார்த்து காயத்ரியே இன்ப அதிர்ச்சி அடைந்திருக்கிறார். இதனை தனது இன்ஸ்ட்ராகிராம் பக்கத்திலும் வெளியிட்டிருக்கிறார்.
புகழ்பெற்ற ஹாலிவுட் படமான 'மேட் மேக்ஸ் : பியூரி ரோட்' படத்தில் நடித்த நடிகை சார்லீஸ் தெரன் நடிப்பும் தோற்றமும் உலக புகழ்பெற்றது. அந்த தோற்றத்திற்குத்தான் காயத்ரியை ரசிகர் மாற்றி இருக்கிறார். படத்தை பார்த்த ரசிகர்கள் நீங்கள் தாராளமாக ஹாலிவுட் படத்தில் நடிக்கலாம் என்றும், மேட் மேக்சை படத்தை இந்தியாவில் ரீமேக் செய்தால் காயத்ரியை நடிக்க வையுங்கள் என்றும் ரசிகர்கள் கருத்துகளை பதிவிட்டு வருகிறார்கள்.