மதுரை:
மறைந்த முதல்வர் ஜெயலலிதா சட்டமன்றத்தில் வைத்து தாக்கப்படும் போது, வேட்டியை மடித்துக் கட்டி ஓடி வந்தவர்
என்று அதிமுக மூத்த தலைவர் ராஜன் செல்லப்பா கூறியுள்ளார்.
1989-ம் ஆண்டு மார்ச் 25-ம் தேதி சட்டமன்றத்தில் எதிர்க்கட்சித் தலைவராக இருந்த போது ஜெயலலிதாவை சேலையை பிடித்து இழுத்து திமுகவினர் தாக்கியதாக, நாடாளுமன்றத்தில் மத்திய நிதியமைச்சர் நிர்மலா சீதாராமன்தான் கூறியது பெரும் விவாதத்தையே ஏற்படுத்தியுள்ளது. அப்படி ஒரு தாக்குதலே நடக்கவில்லை என திமுகவினரும், தாக்குதல் நடந்தது என அதிமுகவினரும் கூறி வருகின்றனர்.
இது ஒருபுறம் இருக்க, நேற்று செய்தியாளர்களை சந்தித்த எடப்பாடி பழனிசாமி, “அந்த தாக்குதல் நடந்த போது சட்டமன்றத்தில் நேரில் பார்த்த சாட்சி நான் இருக்கிறேன்” எனக் கூறியிருந்தார். இதற்கு பதிலடி கொடுக்கும் விதமாக திமுக எம்.பி. திருச்சி சிவா, “அந்த சமயத்தில் எடப்பாடி பழனிசாமி யார் என்று யாருக்கும் தெரியாது.. இன்று பெரிய பதவியில் வந்தததால் வாய்க்கு வந்ததை எல்லாம் பேசக்கூடாது” எனக் கூறினார்.
இந்நிலையில், இதுகுறித்து அதிமுக மூத்த தலைவர் ராஜன் செல்லப்பாவிடம் செய்தியாளர்கள் இன்று கேள்வியெழுப்பினர். அதற்கு பதிலளித்து அவர் கூறியதாவது:
இது ஊரறிந்த செய்தி. சட்டமன்றத்தில் வைத்து ஜெயலலிதாவை திமுகவினர் தாக்கியது எல்லோருக்குமே தெரியும். இன்னும் சொல்லப்போனால், அப்படி ஒரு தாக்குதலே நடக்கவில்லை என்று கூறியுள்ள திருநாவுக்கரசர் தான் அந்த சமயத்தில் ஜெயலலிதாவை அரண் போல நின்று காத்தவர். அதனால்தான் நாங்கள் அவரை தளபதியாக ஏற்றுக்கொண்டோம். இன்று அவரே இப்படி பேசியது மிகவும் வருத்தமாக இருக்கிறது. அவரது தியாகத்தை அவரே கொச்சைப்படுத்திக் கொண்டார் என்றுதான் சொல்ல வேண்டும்.
அதேபோல, ஜெயலலிதா மீது தாக்குதல் நடந்த போது எடப்பாடி பழனிசாமி சட்டமன்றத்தில்தான் இருந்தார். திருநாவுக்கரசரும், கேகேஎஸ்எஸ்ஆரும் ஜெயலலிதாவை பாதுகாத்தனர் என்றால், அவர்கள் முன்வரிசையில் அமர்ந்திருந்ததால் அதை செய்ய முடிந்தது. ஆனால் எடப்பாடி பழனிசாமியோ பின் வரிசையில் அமர்ந்திருந்தார். ஜெயலலிதாவை திமுகவினர் தாக்குவது தெரிந்ததும் இளமை துடிப்பிலே இருந்த எடப்பாடி பழனிசாமி வேட்டியை மடித்துக் கொண்டு ஓடி வந்து ஜெயலலிதாவை காத்தார். இதுதான் வரலாறு என ராஜன் செல்லப்பா கூறினார்.