தூத்துக்குடி மாவட்டம், கோவில்பட்டியில் உள்ள அரசு உதவி பெறும் நாடார் மேல்நிலைப் பள்ளியில் 12-ம் வகுப்பு படித்து வருகிறார் கமல் (பெயர் மாற்றப்பட்டிருக்கிறது). நேற்று கமலின் வகுப்பில் படிக்கும் ஒரு மாணவருக்கு பிறந்தநாள். அதனால், கமல் சக மாணவர்களுடன் எட்டையபுரம் சாலை பகுதியிலுள்ள ஒரு மரத்தடியில் கேக் வெட்டி பிறந்தநாள் விழாவைக் கொண்டாடியிருக்கிறார்.
அப்போது மாணவர்களுக்குள் வாய்த்தகராறு ஏற்பட்டிருக்கிறது. வாய்த்தகராறு கைகலப்பாக மாறியது. இதில் கமல் மற்றொரு மாணவரை கடுமையாகத் தாக்கியதாகச் சொல்லப்படுகிறது. இந்த நிலையில், அப்பகுதி வழியே சாலையில் சென்றவர்கள் மாணவர்களின் சண்டையை விலக்கி விட்டு சமாதானம் செய்ததுடன் அறிவுரையும் கூறிவிட்டுச் சென்றனர். பின்னர் மாணவர்கள் அனைவரும் கலைந்து சென்றிருக்கின்றனர்.
இந்த நிலையில், நேற்று இரவில் கமல் தனது வீட்டில் சாப்பிடுவதற்காக அமர்ந்து கொண்டிருந்தாராம். அப்போது அங்கு வந்த 12 மாணவர்கள் கமலை கம்பாலும், செங்கல் கல்லாலும் தலையில் சரமாரியாக தாக்கி விட்டு தப்பிச் சென்றிருக்கின்றனர். தன் மகனை தாக்குவதை தடுக்க முடியாமல் தவித்த அந்த மாணவனின் தாய், கூச்சல் போட்டிருக்கிறார். அவரது கூச்சல் சத்தம் கேட்டு அப்பகுதியினர் கமலின் வீட்டிற்கு வந்தனர். தலையில் காயமடைந்த நிலையில் இருந்த கமலை உடனடியாக மீட்டு கோவில்பட்டி அரசு மருத்துவமனையில் சிகிச்சைக்காக அனுமதித்தார். இச்சம்பவம் குறித்து கோவில்பட்டி கிழக்கு காவல் நிலைய போலீஸார் வழக்கு பதிவுசெய்து விசாரணை நடத்தி வருகின்றனர்.
கடந்த 2 நாளுக்கு முன்பு கோவில்பட்டி அருகிலுள்ள கழுகுமலையில் இரண்டு மாணவர்கள் சண்டையிட்டதை தட்டிக்கேட்டு சமாதானம் செய்து வைத்த ஒரு மாணவரை சக மாணவர் நண்பர்களுடன் சேர்ந்து வீடுபுகுந்து தாக்கிய சம்பவம் பரபரப்பினை ஏற்படுத்தியது. தாக்குதலில் ஈடுபட்ட 5 பேர் மீது வன்கொடுமை தடுப்புச் சட்டத்தின் கீழ் கைது செய்யப்பட்டுள்ளனர். இந்த நிலையில், கோவில்பட்டியிலும் மாணவர்களுக்கு இடையேயான தாக்குதலில் வீடுபுகுந்து மாணவர் தாக்கப்பட்ட சம்பவம் மேலும் பரபரப்பினை ஏற்படுத்தியிருக்கிறது.
Junior vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும் https://bit.ly/3OITqxs
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/3OITqxs