பானைக்குள் தலை மாட்டிய நிலையில் படம் முழுவதும் நடித்த நடிகை
சினிமாவில் நடிக்கும் கனவுகளோடு உள்ளே நுழையும் அனைவருமே ஒரு காட்சியிலாவது நாம் தலை காட்டி விடமாட்டோமா என்கிற ஆர்வத்தில் தான் வருவார்கள். ஆனால் ஒரு படம் முழுவதும் கதாநாயகியாக நடித்தாலும் கூட முக்கால்வாசி படத்தில் தன் முகம் காட்டாமலேயே நடித்துள்ளார் மலையாள நடிகை ஒருவர். ஜூலியானா என்கிற மலையாள படத்தில் நடித்துள்ள இவரது பெயர் கூட இன்னும் படக்குழுவினரால் வெளியிடப்படவில்லை.
அதே சமயம் இந்த படத்தின் டிரைலர் தற்போது வெளியாகி உள்ளது. இந்த படத்தின் டிரைலரை நடிகர் திலீப் சமீபத்தில் வெளியாகி வெற்றிபெற்ற தனது வாய்ஸ் ஆப் சத்யநாதன் பட சக்சஸ் மீட்டில் வெளியிட்டார்.
இந்த டிரைலரை பார்க்கும் போது ஏதோ ஒரு காரணத்தால் ஒரு பானைக்குள் தலை மாட்டிக்கொண்ட நிலையில், தான் சிக்கி உள்ள பிரச்னையிலிருந்து ஒரு பெண் எப்படி போராடி சமாளித்து தப்பிக்கிறார் என்பதை மையப்படுத்தி தான் இந்த படம் உருவாகியுள்ளது என்பதை உணர முடிகிறது. கடந்த 10 வருடங்களுக்கு முன்பு மலையாளத்தில் மோகன்லாலை வைத்து கின்னஸ் சாதனையாக 19 மணி நேரத்தில் பகவான் என்கிற திரைப்படத்தை இயக்கிய இயக்குனர் பிரசாந்த் மாம்புள்ளி தான் இந்த படத்தை இயக்கியுள்ளார்.