மத்திய அரசு விதித்த கெடு முடிந்தது 41 அதிகாரிகளை திரும்ப பெற்றது கனடா| Canada has recalled 41 officers after the ban imposed by the central government is over

டொரன்டோ இந்தியாவில் உள்ள கனடா துாதரக அதிகாரிகளை திரும்பப் பெற மத்திய அரசு விதித்திருந்த கெடு முடிவடைந்த நிலையில், 41 துாதரக அதிகாரிகளை கனடா அரசு திரும்பப் பெற்றது.

வட அமெரிக்க நாடான கனடா குடியுரிமை பெற்ற காலிஸ்தான் பயங்கரவாத குழுவின் தலைவர் ஹர்தீப் சிங் நிஜ்ஜார் கடந்த ஜூன் மாதம் கனடாவில் சுட்டுக் கொல்லப்பட்டார்.

இந்த கொலையின் பின்னணியில் இந்திய அரசுக்கு தொடர்பு இருப்பதாக, கனடா பிரதமர் ஜஸ்டின் ட்ரூடோ குற்றஞ்சாட்டினார். இது, இருநாட்டு உறவில் விரிசலை ஏற்படுத்தியது.

கனடாவில் உள்ள இந்திய துாதரை அந்நாட்டு அரசு வெளியேற்றியது. இதற்கு பதிலடியாக, புதுடில்லியில் உள்ள கனடா துாதரை மத்திய அரசு வெளியேற்றியது.

இந்நிலையில், கனடாவில் உள்ள இந்திய துாதரக அதிகாரிகளின் எண்ணிக்கையைவிட, புதுடில்லியில் உள்ள கனடா துாதரக அதிகாரிகளின் எண்ணிக்கை அதிகம் இருப்பதாக மத்திய அரசு தெரிவித்தது.

இதில் சமநிலை பேணப்பட வேண்டும் என்பதால், கனடா துாதரக அதிகாரிகளில், 21 பேர் மட்டுமே இந்தியாவில் தொடர்ந்து இருக்க அனுமதிக்கப்படுவர்.

‘மீதியுள்ளவர்களையும், அவர்களது குடும்பத்தினரையும் அக்., 20க்குள் கனடா திரும்பப் பெற வேண்டும். இல்லையெனில் அவர்களுக்கு வழங்கப்பட்டு வரும் துாதரக பாதுகாப்பு உரிமை பறிக்கப்படும்’ என, மத்திய அரசு எச்சரித்து இருந்தது.

இந்நிலையில், கனடா வெளியுறவுத்துறை அமைச்சர் மெலானி ஜோலி நேற்று முன்தினம் கூறியதாவது:

இந்தியாவில் உள்ள கனடா துாதரக அதிகாரிகளை திரும்பப் பெறவேண்டும் என்றும், தவறும்பட்சத்தில் அவர்களுக்கான துாதரக பாதுகாப்பு உரிமை பறிக்கப்படும் என்றும், இந்திய அரசு ஒருதலைபட்சமாக அறிவித்து இருந்தது.

எனவே, இந்தியாவில் உள்ள கனடா துாதரக அதிகாரிகள், 41 பேர் மற்றும் அவர்களது குடும்பத்தினர், 42 பேரை திரும்பப் பெறுகிறோம். அவர்கள் இந்தியாவில் இருந்து புறப்பட்டு விட்டனர்.

துாதரக அதிகாரிகளின் பாதுகாப்பே எங்களுக்கு முக்கியம். அவர்களை ஆபத்தில் தவிக்கவிட முடியாது.

துாதரக பாதுகாப்பு உரிமையை ரத்து செய்வது சர்வதேச சட்டங்களுக்கு எதிரானது. துாதரக அதிகார உறவுகள் குறித்த வியன்னா மாநாட்டு ஒப்பந்தத்தை மீறிய செயல்.

துாதரக அதிகார விவகாரங்களின் விதிகளை உடைக்க நாம் அனுமதித்தால், இந்த உலகின் எந்த மூலையிலும் துாதரக அதிகாரிகள் பாதுகாப்பாக இருக்க முடியாது.

இதற்காக இந்தியாவுக்கு எந்த பதிலடியும் நாங்கள் கொடுக்கப் போவதில்லை.

இவ்வாறு அவர் கூறினார்.

இதைத் தொடர்ந்து, மும்பை, பெங்களூரு, சண்டிகர் நகரங்களில் உள்ள கனடா துாதரக சேவைகள் தற்காலிகமாக நிறுத்தப்பட்டுள்ளன. இங்குள்ள கனடா நாட்டவர் அனைவரும், புதுடில்லியில் உள்ள தலைமை துாதரகத்துக்கு வரும்படி உத்தரவிடப்பட்டுள்ளது.