Doctor Vikatan: என் வயது 30. தாமதமாகத்தான் திருமணம் நடந்தது. எனக்கு ஃபைப்ராய்டு கட்டி இருப்பதாகச் சொல்கிறார் மருத்துவர். இந்தக் கட்டி, கருத்தரிப்பதில் சிக்கலை ஏற்படுத்துமா… இதற்கு என்ன தீர்வு?
பதில் சொல்கிறார், சென்னையைச் சேர்ந்த மகளிர்நலம் மற்றும் குழந்தையின்மை சிகிச்சை சிறப்பு மருத்துவர் மாலா ராஜ்.
ஃபைப்ராய்டு என்பது, கர்ப்பப்பை தசைகளில் வரக்கூடிய ஒரு வகை கட்டி. அந்தக் கட்டியானது எந்த இடத்தில் இருக்கிறது என்பதை வைத்துதான், அது கர்ப்பம் தரிப்பதில் சிக்கலை ஏற்படுத்துமா, ஏற்படுத்தாதா என்று சொல்ல முடியும்.
ஒருவேளை இந்தக் கட்டியானது, கர்ப்பப்பையின் உள்ளே உள்ள எண்டோமெட்ரியம் எனப்படும் சவ்வுப் பகுதியில் இருந்தால் கண்டிப்பாக குழந்தை பெறுவதில் சிக்கலை ஏற்படுத்தும். ஏனென்றால் அந்த எண்டோமெட்ரியம் பகுதியில்தான் கருவானது பதியும்.
கட்டி இருக்கும் பட்சத்தில் கரு அங்கே பதிவதிலேயே பிரச்னை இருக்கும். இதுபோன்ற கட்டியை மருத்துவ மொழியில் ‘சப்மியூகோசல் ஃபைப்ராய்டு’ (Submucosal fibroid) என்று சொல்வோம். இதுபோன்ற கட்டியை அவசியம் நீக்கியாக வேண்டும். ஹிஸ்ட்ரோஸ்கோப்பி எனப்படும் சிகிச்சை மூலம் இதை நீக்கிவிடலாம்.
அதுவே இந்தக் கட்டியானது கர்ப்பப்பையின் தசையில் இருந்தால் அதை ‘இன்ட்ராமியூரல் ஃபைப்ராய்டு’ (Intramural fibroid) என்று சொல்வோம். இந்தக் கட்டி, கர்ப்பப்பை சவ்விலிருந்து 2.8 செ.மீ தூரம் தள்ளி இருக்குமானால், அது கர்ப்பத்தை பாதிக்காது.
இந்நிலையில் கட்டி சிறியதாக இருந்தால் காத்திருந்து பார்க்கலாம். ஆனால் அந்தக் கட்டியானது 4 செ.மீ அளவுக்கு மேல் பெரிதாக இருக்கும் பட்சத்தில் அதை நீக்கிவிட்டு, பிறகு குழந்தை பெற்றுக்கொள்வது தான் சரியானது.
கர்ப்பப்பையின் வெளியே உள்ள கட்டியை ‘சப்சீரோசல் ஃபைப்ராய்டு’ ( Subserosal Fibroid) என்று சொல்வோம். பொதுவாக இந்தக் கட்டி எந்தப் பிரச்னையையும் தராது. அதுவே அளவில் பெரிதாகி, கர்ப்பப்பையை அழுத்தினால் அந்தக் கட்டியையும் நீக்கியாக வேண்டும்.
எனவே உங்கள் விஷயத்தில் ஃபைப்ராய்டு கட்டி எந்த இடத்தில் உள்ளது என்பதைப் பொறுத்துதான் அது உங்கள் கர்ப்பத்தை பாதிக்குமா இல்லையா என்று சொல்ல முடியும்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.