பெண்கள் கல்லூரிக்குள் சுவர் ஏறி குதித்து உள்ளே நுழைந்த ஆண்கள் கல்லூரி மாணவர்கள் – பரபரப்பு வீடியோ

புதுடெல்லி,

டெல்லி பல்கலைகழகத்தின் கட்டுப்பாட்டில் மிரண்டா ஹவுஸ் பெண்கள் கல்லூரி செயல்பட்டு வருகிறது. இதனிடையே, மிரண்டா பெண்கள் கல்லூரியில் கடந்த 14-ம் தேதி தீபாவளி கொண்டாட்ட நிகழ்ச்சி நடைபெற்றது.

இந்த நிகழ்ச்சியில் கல்லூரி மாணவிகள் கலந்துகொண்டு பல்வேறு கலைநிகழ்ச்சிகள் பங்கேற்றனர். இந்த நிகழ்ச்சியில் வேறு கல்லூரிகளை சேர்ந்தவர்களும் பங்கேற்க அனுமதி வழங்கப்பட்டுள்ளது.

இந்நிலையில், கூட்டம் அதிகரித்ததை தொடர்ந்து பெண்கள் கல்லூரியின் நுழைவு வாயில் மூடப்பட்டது. ஆனால், ஆண்கள் கல்லூரியை சேர்ந்த மாணவர்கள் சிலர் பெண்கள் கல்லூரியின் சுவர் ஏறி குதித்து உள்ளே நுழைந்துள்ளனர். இது தொடர்பான வீடியோ சமூகவலைதளத்தில் வைரலாகி வருகிறது.

ராம்ஜாஸ் ஆண்கள் கல்லூரியை சேர்ந்த மாணவர்கள் சிலர் பெண்கள் கல்லூரிக்குள் அத்துமீறி சுவர் ஏறி குதித்து உள்ளே நுழைந்துள்ளனர். மேலும், அந்த மாணவர்கள் ஆபாச கோஷங்கள் எழுப்பி முகம் சுழிக்கும் வகையில் நடந்துகொண்டனர். இந்த சம்பவம் தொடர்பாக போலீசார் விசாரணை நடத்தி வருகின்றனர்.