பிரதமர் நரேந்திர மோடியின் தாயார் ஹீரா பென் மோடி (வயது 99) குஜராத், காந்தி நகர் ரேசானில் பிருந்தாவன் சொசைட்டி பகுதியில் அமைந்துள்ள தனது இளைய மகன் பங்கஜ் மோடியின் இல்லத்தில் வசித்து வருகிறார்.
பிரதமர் மோடி குஜராத் செல்லும் போதெல்லாம் தனது தாயாரை சென்று சந்தித்து வருவார். அது தொடர்பான புகைப்படங்களும் வெளியாகும்.
இந்நிலையில் ஹீரா பென் மோடியின் உடல்நிலை திடீரென பாதிக்கப்பட்டது. இதையடுத்து நேற்று (டிசம்பர் 28) அவர் அகமதாபாத்தில் உள்ள யு.என்.மேத்தா இதய நோய் மருத்துவமனையில் அனுமதிக்கப்பட்டார்.
இது குறித்து தகவல் அறிந்ததும், பிரதமர் மோடி நேற்று மதியம் அகமதாபாத்துக்கு விரைந்தார். விமான நிலையத்தில் இருந்து நேராக அவர் தாயார் சேர்க்கப்பட்டுள்ள மருத்துவமனைக்கு காரில் வந்தார். அங்கு அவர் தாயாரை சந்தித்து நலம் விசாரித்தார்.
அங்கிருந்த மருத்துவர்களிடம் தாயாரின் உடல்நிலை குறித்தும், அவருக்கு அளிக்கப்படுகிற சிகிச்சை பற்றியும் விசாரித்து அறிந்தார்.
இந்த நிலையில், பிரதமர் மோடியின் தாயார் ஹீராபென் மோடி உடல் நிலையில் முன்னேற்றம் இருப்பதாகவும் ஓரிரு நாளில் வீடு திரும்புவார் என்றும் குஜராத் மாநில அரசு வெளியிட்ட அறிக்கையில் தெரிவிக்கப்பட்டுள்ளது.
முன்னதாக மோடியின் தாயார் உடல்நிலை பாதிக்கப்பட்ட செய்தி அறிந்து பல்வேறு தலைவர்களும் அறிக்கை வெளியிட்டிருந்தனர்.
முதல்வர் ஸ்டாலின் வெளியிட்ட அறிக்கையில், “மாண்புமிகு இந்தியப் பிரதமர் திரு.நரேந்திர மோடி அவர்களின் தாயார் திருமதி.ஹீராபென் மோடி அவர்கள் உடல்நலக்குறைவால் மருத்துவமனையில் அனுமதிக்கப்பட்டுள்ளார் என்பதையறிந்து மிகுந்த வேதனையடைந்தேன். அவர் விரைவில் நலம்பெற விழைகிறேன்” என்று தெரிவித்திருந்தார்.
மேற்கு வங்க முதல்வர் மம்தா பானர்ஜி வெளியிட்ட ட்விட்டர் பதிவில், “பிரதமர் நரேந்திர மோடியின் தாயார் விரைவில் குணமடையவும் நல்ல ஆரோக்கியமாக இருக்கவும் பிரார்த்தனை செய்யுங்கள், அவர் விரைவில் குணமடையட்டும்” என்று கூறியுள்ளார்.