சட்டசபையில் உரை ஆற்றிய ஆளுநர் ரவி உரையில் இல்லாத வார்த்தைகளை சேர்த்தும், உரையில் இருந்த முக்கிய தலைவர்களின் பெயர்களை கடந்து சென்றதும் பரபரப்பை ஏற்படுத்தியது. சமூகநீதி, சுயமரியாதை, திராவிட மாடல் என்ற வார்த்தைகள் இருந்ததால் உரையின் 65வது பக்கத்தை வாசிக்காமல் கடந்தார் ஆளுநர். அடுத்ததாக, தமிழ்நாடு சட்டம் ஒழுங்கை சிறப்பாக கையாள்கிறது, அமைதி பூங்காவாக திகழ்கிறது என்பதையும் வாசிக்காமல் கடந்தார்.
மேலும், 47 ஆவது பத்தியில் குறிப்பிட்டிருந்த பெரியார், அம்பேத்கர், காமராசர் , அண்ணா, கலைஞர் ஆகிய தலைவர்களின் பெயர்களையும் வாசிக்காமல் கடந்துவிட்டார்.
மேலும், தேசிய கீதம் ஒலிக்கும் வரை சட்டசபையில் இல்லாமல் எதிர்க்கட்சியை போல வெளிநடப்பு செய்தது அரசியல் களத்தில் கடும் விமர்சனத்துக்கு உள்ளாகியுள்ளது. இந்த நிலையில், ஆளுநர் ரவி இனிமேலும் அந்த பதிவியில் இருக்கக்கூடாது என்றும் ஆளுநர் பதவியில் இருந்து உடனே அவர் விலகி தமிழ்நாட்டை விட்டு கிளம்ப வேண்டும் என்றும் அரசியல் கட்சி தலைவர்கள் கண்டனம் தெரிவித்து வருகின்றனர்.
மேலும், நாகை, திருவண்ணாமலை ஆகிய மாவட்டங்களில் தமிழ்நாடு ஆளுநர் ஆர்.என்.ரவியின் தமிழர் விரோத போக்கை கண்டித்து தமிழ்நாட்டை விட்டு வெளியேற வலியுறுத்தி மாணவ மாணவிகள் சங்கம் ஆர்ப்பாட்டத்தில் ஈடுபட்டுள்ளனர்.
ஆளுநர் விவகாரம் பூதகரமாகியுள்ள நிலையில் ஆளுநர் ரவியை கண்டித்து புதுச்சேரியில் அவரது உருவ பொம்மையை எரித்தும், செருப்பால் அடித்தும் தந்தை பெரியார் திராவிடர் கழகம் ஆர்ப்பாட்டம் நடத்தியுள்ளனர். அந்த வீடியோ காட்சிகள் சமூக ஊடகங்களில் தீயாக பரவி வருகிறது.
இதற்கு மத்தியில் ஆளுநர் மாளிகையில் குடிமைப்பணி தேர்வு எழுதுவோருடன் ஆளுநர் ரவி கலந்துரையாடினார். அப்போது அவர், ஒன்றிய அரசு’ என்று அழைப்பதில் தவறில்லை, அதை அரசியலாக்கும்போதுதான் பிரச்சனை ஆகிறது என்றும் ஒன்றிய அரசு’ என அழைத்து அவமதிக்கும்போதுதான் அது பிரச்சனையை ஏற்படுத்துகிறது என்றும் அவர் பேசி மீண்டும் திமுக அரசை சீண்டியுள்ளார்.