தமிழ்நாடு ஆளுநர் ஆர்.என்.ரவி நாளை தலைநகர் டெல்லிக்கு செல்ல உள்ளதாக தகவல் வெளியாகி உள்ளது.
தமிழ்நாடு ஆளுநர் ஆர்.என்.ரவிக்கும், முதலமைச்சர் மு.க.ஸ்டாலின் தலைமையிலான
திமுக
அரசுக்கும் இடையே தொடக்கம் முதலே ஏழாம் பொருத்தமாக உள்ளது. ஆன்லைன் ரம்மி விவகாரம் உட்பட பல்வேறு விவகாரங்களில் ஆளுநருக்கும், அரசுக்கும் இடையே முட்டல் மோதல் நிலவி வருகிறது.
அண்மையில், “தமிழ்நாட்டை தமிழகம் என்று அழைப்பது மிகச் சரியாக இருக்கும்,” என, ஆளுநர் ஆர்.என்.ரவி பேசியது தமிழக அரசியலில் புயலைக் கிளப்பியது. இதற்கிடையே, நடப்பு 2023 ஆம் ஆண்டின் முதல் சட்டப்பேரவைக் கூட்டத்தொடர் கடந்த 9 ஆம் தேதி காலை ஆளுநர் ஆர்.என்.ரவி உரையுடன் தொடங்கியது.
அப்போது திராவிட மாடல், பெரியார், அம்பேத்கர், காமராஜர், அண்ணா, கலைஞர் போன்ற வார்த்தைகளை படிக்காமல் ஆளுநர் ஆர்.என்.ரவி புறக்கணித்தார். இதற்கு ஆளுநர் ஆர்.என்.ரவி அவையில் இருக்கும் போதே முதலமைச்சர் மு.க.ஸ்டாலின் கண்டனம் தெரிவித்தார். மேலும், ஆளுநர் சொந்தமாக சேர்த்துப் படித்த எதுவும் அவைக் குறிப்பில் இடம் பெறாது என்றும் முதலமைச்சர் மு.க.ஸ்டாலின் தெரிவித்தார்.
இதனால் அதிருப்தி அடைந்த ஆளுநர் ஆர்.என்.ரவி அவையில் இருந்து பாதியில் வெளியேறினார். சட்டப்பேரவை வரலாற்றிலேயே, எந்த மாநிலத்திலும் நடைபெறாத நிகழ்வாக, தேசிய கீதம் இசைப்பதற்குள் ஆளுநர் ஆர்.என்.ரவி அவையில் இருந்து வெளியேறியது சர்ச்சைக்கு உள்ளானது. ஆளுநரின் இந்த செயலை, அவை மீறல் என்று அரசியல் தலைவர்கள் குற்றம் சாட்டி வருகின்றனர்.
இந்நிலையில், தமிழ்நாடு ஆளுநர் ஆர்.என்.ரவி நாளை டெல்லி செல்ல திட்டமிட்டு உள்ளதாக தகவல்கள் வெளியாகி உள்ளன. நாளை காலை 11:30 மணிக்கு சென்னையில் இருந்து விமானத்தில் டெல்லி செல்ல உள்ளதாகவும், அங்கு, சட்டப்பேரவையில் நடைபெற்ற நிகழ்வுகள் தொடர்பாக, குடியரசுத் தலைவர் திரெளபதி முர்மு, பிரதமர் நரேந்திர மோடி, மத்திய உள்துறை அமைச்சர் அமித் ஷா ஆகியோரை சந்தித்து விளக்கம் அளிக்க உள்ளதாகவும் கூறப்படுகிறது. ஆளுநரின் இந்த டெல்லி பயணம் அரசியல் வட்டாரத்தில் கவனத்தை ஈர்த்துள்ளது.
முன்னதாக, டெல்லியில் இன்று குடியரசுத் தலைவர் திரெளபதி முர்முவை சந்தித்த தமிழ்நாடு அரசு பிரதிநிதிகள்,
திமுக
எம்பிக்கள், சட்டப்பேரவையில் ஆளுநர் ஆர்.என்.ரவி நடந்து கொண்ட விதம் குறித்து புகார் அளித்தனர் என்பது குறிப்பிடத்தக்கது.