கிருஷ்ணகிரி மாவட்டத்தில் கடந்த 8-ம் தேதியன்று ராணுவ வீரர் பிரபு என்பவர், தி.மு.க கவுன்சிலர் சின்னசாமி உட்பட ஒன்பது பேர் கொண்ட கும்பலால் தாக்குதலுக்குள்ளானார். இந்த நிலையில், காயங்களுடன் மருத்துவமனையில் சிகிச்சை பெற்றுவந்த பிரபு, சிகிச்சை பலனளிக்காமல் பரிதாபமாக உயிரிழந்தார்.
அதைத் தொடர்ந்து தி.மு.க கவுன்சிலர் சின்னசாமி உட்பட ஒன்பது பேரும் போலீஸாரால் கைதுசெய்யப்பட்டனர். இந்த நிலையில் தமிழ்நாடு பா.ஜ.க தலைவர் அண்ணாமலை, இந்த சம்பவத்தைக் கண்டித்து முதல்வர் ஸ்டாலினை விமர்சித்திருக்கிறார்.
இது குறித்து அண்ணாமலை தன் ட்விட்டர் பக்கத்தில், “கிருஷ்ணகிரி மாவட்டம், போச்சம்பள்ளி அருகே, 29 வயதே ஆன ராணுவ வீரர் பிரபு, தி.மு.க பேரூராட்சி கவுன்சிலர் ஒருவரால் அடித்துக் கொலைசெய்யப்பட்டிருக்கும் செய்தியறிந்து, அதிர்ச்சியும் கோபமும் அடைந்தேன். ராணுவ வீரர்களுக்கு, தி.மு.க-வினர் அராஜகத்தால் சொந்த ஊரிலேயே பாதுகாப்பில்லை.
தங்கள் உயிரையும் துச்சமெனக் கருதி எல்லையில் நாட்டைக் காக்கும் பணியில் ஈடுபட்டுவரும் வீரர்களை, அவர்கள் குடும்பத்தினரை மிரட்டுவதும், அவர்கள் மேல் தாக்குதல் நடத்துவதும், தற்போது கொலையே செய்யும் அளவுக்கு, தி.மு.க மற்றும் அதன் கூட்டணிக் கட்சிகள் உருமாறியிருக்கின்றன.
காவல்துறையைக் கையில் வைத்திருக்கும் முதல்வர் ஸ்டாலின், சட்டம் – ஒழுங்கு எப்படிப் போனால் எனக்கென்ன என்று இருப்பதை, பொதுமக்கள் பார்த்துக்கொண்டுதான் இருக்கிறார்கள். உடனடியாகக் கொலையாளிகள் மேல் கடுமையான நடவடிக்கை எடுக்கவும், மேலும் இது போன்ற சமூக விரோதச் செயல்கள் நடக்காமல் தடுக்க வேண்டுமென, தமிழ்நாடு பா.ஜ.க சார்பில் வலியுறுத்துகிறேன்” எனப் பதிவிட்டிருக்கிறார்.