ஜூலை 11ஆம் தேதி நடைபெற்ற அதிமுக பொதுக்குழு செல்லும் என்று உச்ச நீதிமன்றம் உத்தரவிட்ட நிலையில் இது தொடர்பாக சிவில் வழக்கு தொடரலாம் என்றும் தீர்ப்பில் தெரிவிக்கப்பட்டது.
ஆதரவாளரான மனோஜ் பாண்டியன் சென்னை உயர் நீதிமன்றத்தில் பொதுக்குழு தீர்மானங்களுக்கு தடை விதிக்க வேண்டும் என்று உரிமையியல் வழக்கு தொடர்ந்தார். இதற்கிடையே பொதுச் செயலாளர் தேர்தல் அறிவிப்பும் வெளியான நிலையில் அதற்கு எதிராகவும் வழக்கு தொடரப்பட்டது.
எடப்பாடிக்கு சாதகமாக வந்த தீர்ப்பு!
இந்த வழக்குகளை விசாரித்த தனி நீதிபதி அமர்வு பொதுக்குழு தீர்மானங்களுக்கு தடை விதிக்க முடியாது என்றும், பொதுச் செயலாளர் தேர்தல் முடிவுகளை அறிவிக்கலாம் என்றும் தீர்ப்பு வழங்கப்பட்டது.
மேல்முறையீடு
இதற்கு எதிராக மேல்முறையீடு செய்யப்பட்டது. ஓ.பன்னீர்செல்வம், மனோஜ் பாண்டியன், வைத்திலிங்கம் மற்று ஜேசிடி.பிரபாகர் சென்னை உயர் நீதிமன்றத்தில் மேல்முறையீட்டு மனுக்களை தாக்கல் செய்திருந்தனர்.
இந்த மேல முறையீட்டு வழக்குகள் நீதிபதிகள் மகாதேவன் மற்றும் முகமது சபீக் ஆகியோர் அடங்கிய அமர்வில் விசாரணைக்கு வந்தது.
ஓபிஎஸ் தரப்பு வாதம்!
அப்போது பன்னீர்செல்வம் அணியினர் தரப்பு வழக்கறிஞர்கள், “கட்சியில் தற்போது புதிய உறுப்பினர்கள் சேர்க்கை நடைபெறுகிறது. தங்கள் தரப்பைச் சேர்ந்த ஆதரவாளர்களின் புதுப்பித்தல் விண்ணப்பங்கள் நிராகரிக்கப்படலாம். எனவே, இடைக்கால உத்தரவு பிறப்பிக்க வேண்டும்” என்று வாதிட்டனர்.
இடைப்பட்ட காலத்தில் கட்சியில் எடுக்கப்படும் முடிவுகள், இந்த வழக்குகளின் இறுதி தீர்ப்புக்கு கட்டுப்பட்டது எனத் தெரிவித்த நீதிபதிகள், வழக்குகளின் இறுதி விசாரணையை ஏப்ரல் 20ஆம் தேதிக்கு தள்ளிவைத்தனர்.
அவசர வழக்காக விசாரணை!
அதிமுக சார்பில் ஏப்ரல் 16ஆம் தேதி செயற்குழுக் கூட்டம் நடைபெறும் என அறிவிக்கப்பட்டுள்ளதால் அதிமுக பொதுச் செயலாளர் தேர்தலை எதிர்த்த வழக்கை அவசர வழக்காக விசாரிக்க வேண்டுமென ஓபிஎஸ் சார்பில் மூத்த வழக்கறிஞர் குரு கிருஷ்ணகுமார் ஆஜராகி முறையிட்டார்.
இன்று நடைபெறும் விசாரணை!
இந்த முறையீட்டை ஏற்ற நீதிபதிகள் அதிமுக பொது செயலாளர் தேர்தல் தொடர்பான வழக்கு இன்று (ஏப்ரல் 12) விசாரணைக்கு எடுத்துக் கொள்வதாக தெரிவித்தனர். இந்த வழக்கை நீதிபதிகள் மகாதேவன் மற்றும் முகமது சபீக் ஆகியோர் இன்று விசாரிக்கின்றனர்.