பீகார் முதல்வர் நிதிஷ் குமார் மற்றும் துணை முதல்வர் தேஜஸ்வி யாதவ் ஆகியோர் டெல்லியில்
காங்கிரஸ்
தலைவர் ராகுல் காந்தி மற்றும் அக்கட்சியின் தேசிய தலைவர் மல்லிகார்ஜுன் கார்கே ஆகியோரை இன்று சந்தித்தனர்.
இந்த சந்திப்பின் போது ஐக்கிய ஜனதா தளம் தலைவர் லாலன் சிங்கும் உடனிருந்தார். 2024 பொதுத் தேர்தலுக்கு முன்னதாக, தேசிய தலைநகரில் உள்ள கார்கேயின் இல்லத்தில் கூட்டம் நடைபெற்றது. நிதிஷ் குமார் நேற்று டெல்லி வந்தடைந்தார், மேலும் அவர் தேசிய தலைநகரில் தங்கியிருக்கும் போது எதிர்க்கட்சி தலைவர்களை சந்திப்பார் என்று எதிர்பார்க்கப்படுகிறது.
வரலாற்று சிறப்பு மிக்க நிகழ்வு
நில மோசடி தொடர்பான பணமோசடி வழக்கில் விசாரணைக்காக அமலாக்க இயக்குனரகம் (ED) முன் செவ்வாய்க்கிழமை ஆஜரான தேஜஸ்வி யாதவும் டெல்லியில் உள்ளார். இன்றைய கூட்டத்தைத் தொடர்ந்து, எதிர்க்கட்சிகளை ஒன்றிணைக்கும் வரலாற்றுச் சிறப்புமிக்க நடவடிக்கை எடுக்கப்பட்டுள்ளதாக ராகுல் காந்தி தெரிவித்தார்.
“எதிர்க்கட்சிகளை ஒன்றிணைக்க ஒரு வரலாற்று நடவடிக்கை எடுக்கப்பட்டுள்ளது” என்று ராகுல் காந்தி கூறினார், “இது ஒரு செயல்முறையாகும், இது நாட்டிற்கான எதிர்க்கட்சிகளின் பார்வையை வளர்க்கும். இந்த சித்தாந்தப் போரில் அனைத்துக் கட்சிகளையும் அழைத்துச் செல்வோம், புலனாய்வு நிறுவனங்கள் மீதான தாக்குதலை ஒன்றிணைந்து போராடுவோம்” என்று ராகுல் காந்தி கூறினார்.
இணைவோம்
இந்த சந்திப்பு குறித்து கருத்து தெரிவித்த அக்கட்சியின் தலைவர் மல்லிகார்ஜுன கார்கே, “வரலாற்றுச் சிறப்புமிக்க சந்திப்பு நடைபெற்றது, வரும் தேர்தலில் அனைத்து எதிர்க்கட்சிகளையும் ஒன்றிணைக்கும் வேலைகள் நடைபெறும்” என்றார். இதையே பீகார் முதல்வர் நிதீஷ் குமாரும் எதிரொலித்துள்ளார், எதிர்காலத்தில் முடிந்தவரை பல கட்சிகளை ஒன்றிணைத்து ஒன்றாக செயல்பட முயற்சிப்போம் என்று அவர் தெரிவித்துள்ளார். டெல்லியில் ஆர்ஜேடி தலைவர் லாலு பிரசாத்தை நிதீஷ் குமார் சந்தித்து ஒரு நாள் கழித்து இன்றைய சந்திப்பு நடந்துள்ளது.
2024 நாடாளுமன்றத் தேர்தலில் பாஜகவை எதிர்கொள்வதற்காக எதிர்க்கட்சிகளின் ஒற்றுமையை வலுப்படுத்தும் முயற்சிகளுக்கு மத்தியில், இந்த சந்திப்பு நடைபெற்றுள்ளது. 2024 மக்களவைத் தேர்தலில் பாஜகவை தோற்கடிக்க காங்கிரஸ் உள்ளிட்ட அனைத்து எதிர்க்கட்சிகளும் கைகோர்க்க வேண்டும் என்று கடந்த காலங்களில் பலமுறை நிதிஷ் குமார் அறிவுறுத்தினார்.
100 இடங்களை தாண்ட மாட்டாங்க
பிப்ரவரியில், 2024 மக்களவைத் தேர்தலில் காங்கிரஸ் உட்பட அனைத்து எதிர்க்கட்சிகளும் ஒன்றிணைந்து போராடினால் பாஜக 100 இடங்களை தாண்டாது என்றும் நிதிஷ் குமார் குறிப்பிட்டார். கடந்த காலங்களில் சரத் பவார், அரவிந்த் கெஜ்ரிவால், டி ராஜா, சீதாராம் யெச்சூரி மற்றும் அகிலேஷ் யாதவ் போன்ற தலைவர்களை பீகார் முதல்வர் சந்தித்ததும் குறிப்பிடதக்கது. அதேபோல் பீகாரில் பாஜகவுடன் கூட்டணியை முறித்துக் கொண்டு ராஷ்டிரிய ஜனதா தளம், காங்கிரஸ் மற்றும் இடதுசாரி கட்சிகளின் கூட்டணி அமைத்து பெரும்பான்மை நிருபித்தவர் நிதிஷ் குமார் என்பதும் குறிப்பிடதக்கது.