திருவனந்தபுரம் மாநகராட்சி மேயர் ஆர்யா ராஜேந்திரனுக்கும், கேரள மாநில மார்க்சிஸ்ட் கம்யூனிஸ்ட் கட்சி எம்எல்ஏ சச்சின் தேவுக்கும் திருமணம் நடைபெறவுள்ளது. இதுதொடர்பாக ஆர்யாவுக்கு வாழ்த்து தெரிவித்துள்ள
சசி தரூர்
, வழக்கம் போல வார்த்தையில் விளையாடி கலகலப்பை ஏற்படுத்தியுள்ளார்.
இந்தியாவிலேயே மிகவும் இளம் வயது மேயர் என்ற சாதனையை 2 ஆண்டுகளுக்கு முன்பு நிகழ்த்தியவர்
ஆர்யா ராஜேந்திரன்
. அப்போது அவருக்கு 21 வயதுதான். இளம் வயது மேயர் என்பதால் தான் யாருக்கும் சளைத்தவர் இல்லை என்பதையும் நிரூபித்து அனைவரையும் அசர வைத்தவர் அவர்.
இந்த நிலையில் அவருக்கும் சிபிஎம் எம்எல்ஏ சச்சின் தேவுக்கும் இடையே திருமணம் முடிவாகியுள்ளது. ஆர்யாவும் மார்க்சிஸ்ட் கம்யூனிஸ்ட் கட்சிதான். இந்த நிலையில் திருவனந்தபுரத்தில் காங்கிரஸ் எம்.பி. சசி தரூரை ஒரு நிகழ்ச்சியில் ஆர்யா ராஜேந்திரன் சந்தித்தார். அப்போது ஆர்யாவுக்கு, சசி தரூர் வாழ்த்துகளைத் தெரிவித்துக் கொண்டார்.
இதுகுறித்து சசி தரூர் போட்டுள்ள டிவீட்டில், திருவனந்தபுரம் மேயர் ஆர்யா ராஜேந்திரனுக்கும், சிபிஎம் கட்சியின் இளம் எம்எல்ஏ சச்சின் தேவுக்கும் திருமணம் நடைபெறவுள்ளது. இதையொட்டி ஆர்யாவுக்கு வாழ்த்து தெரிவித்தேன். இந்தியாவின் இரு பெரும் கிரிக்கெட் வீரர்களின் பெயரை இணைத்து பெயரிடப்பட்ட யாருமே சோடை போனதில்லை, நல்ல கேட்ச்.. அதை ஆர்யாவிடம் சொன்னேன். இந்த இளம் ஜோடிகளுக்கு எனது வாழ்த்துகள் என்று கூறியுள்ளார் சசி தரூர்.
அவரது இந்த டிவீட் வைரலாகியுள்ளது. சச்சின் டெண்டுல்கர், கபில் தேவ் ஆகிய இருவரின் பெயர்களையும் இணைத்தால்
சச்சின் தேவ்
என்று வரும் என்பதையே மறைமுகமாக இப்படி சுட்டிக் காட்டி, அப்படிப்பட்டவரை மணக்கப் போகும் ஆர்யாவுக்கு வாழ்த்து தெரிவித்துள்ளார் சசி தரூர்.
ஆர்யாவும், சச்சின் தேவும் இந்திய மாணவர் சங்கத்தில் செயல்பட்டபோது இணைந்து பணியாற்றியவர்கள். அப்போதே அவர்களுக்குள் காதல் மலர்ந்துள்ளது. ஆர்யாவின் தந்தை ராஜேந்திரன் அவருக்கு 5 வயது இருந்தபோதிலிருந்தே கட்சியில் இருந்து வருகிறார். ராஜேந்திரனின் மனைவி ஸ்ரீலதாவும் கூட மார்க்சிஸ்ட் கம்யூனிஸ்ட் கட்சியில் உறுப்பினர்தான்.
28 வயதான சச்சின் தேவ் பாலுசேரி தொகுதியில் உறுப்பினராக இருக்கிறார். இந்திய மாணவர் சங்கத்தின் தேசிய இணைச் செயலாளராக இருந்துள்ளார். இவர்களது திருமண தேதி இன்னும் அறிவிக்கப்படவில்லை.