உக்ரைன் நாட்டில் குண்டு வீச்சு தாக்குதல் நின்றவுடன், உயிரிழந்த இந்திய மாணவரின் உடல் இந்தியாவுக்கு கொண்டு வரப்படும் என, கர்நாடக மாநில முதலமைச்சர் பசவராஜ் பொம்மை தெரிவித்து உள்ளார்.
சோவியத் யூனியனில் இருந்து உக்ரைன் தனி நாடாக பிரிந்ததில் இருந்தே, அந்நாட்டிற்கும், ரஷ்யாவிற்கும் இடையே எல்லைப் பிரச்னை நீடித்து வருகிறது. இந்த இரண்டு நாடுகளுக்கும் இடையே கடந்த ஆறு மாதங்களாக பதற்றம் நீடித்து வந்தது. இதனால், எல்லையில், ஒரு லட்சத்திற்கும் மேற்பட்ட ராணுவ வீரர்களை ரஷ்யா குவித்தது. இதை அடுத்து, அமெரிக்கா, பிரிட்டன் உள்ளிட்ட நாடுகள் அடங்கிய, “நேட்டோ” அமைப்பில் இணைய, உக்ரைன் ஆர்வம் காட்டியது. இதற்கு ரஷ்யா கடும் எதிர்ப்புத் தெரிவித்தது. இதனால் கோபம் அடைந்த ரஷ்ய அதிபர் விளாடிமிர் புடின், கடந்த பிப்ரவரி மாதம் 24 ஆம் தேதி, உக்ரைன் மீது படையெடுக்க, ரஷ்யப் படைகளுக்கு உத்தரவிட்டார்.
இதன்படி, கடந்த ஒரு வாரத்திற்கும் மேலாக உக்ரைன் நாட்டில் ரஷ்யப் படைகள் கடும் தாக்குதல் நடத்தி வருகின்றன. உக்ரைன் நாட்டு தலைநகர் கீவ், கார்கிவ், கெர்சான் உள்ளிட்ட இடங்களில் ரஷ்யப் படைகள் கோரத் தாண்டவமாடின. இந்தத் தாக்குதலில், பொது மக்கள் உட்பட 200 பேர் உயிரிழந்துள்ளதாக உக்ரைன் அரசு தெரிவித்து உள்ளது. இதற்கிடையே, கடந்த செவ்வாய்க்கிழமை கார்கிவ் நகரில் ரஷ்யப் படைகள் நடத்திய தாக்குதலில், கர்நாடக மாநிலத்தைச் சேர்ந்த மாணவர்
நவீன் சேகரப்பா
என்ற மாணவர் உயிரிழந்தார். அவரது உடல் இதுவரை இந்தியாவுக்கு கொண்டு வரப்படவில்லை. மாணவர் நவீன் சேகரப்பா மறைவுக்கு பிரதமர் நரேந்திர மோடி உள்ளிட்ட தலைவர்கள் இரங்கல் தெரிவித்துள்ளனர்.
நவீன் சேகரப்பாவின் உடலை இந்தியா கொண்டு வருவது குறித்து கர்நாடக மாநில முதலமைச்சர் பசவராஜ் பொம்மை, மத்திய வெளியுறவுத் துறை அமைச்சர் ஜெய் சங்கருடன் ஆலோசனை நடத்தினார். இந்நிலையில், பெங்களூரில் செய்தியாளர்களைச் சந்தித்த முதலமைச்சர் பசவராஜ் பொம்மையிடம், உயிரிழந்த மாணவரின் உடல் எப்போது இந்தியாவுக்கு கொண்டு வரப்படும் என, செய்தியாளர்கள் கேள்வி எழுப்பினர். அதற்கு பதிலளித்த அவர், “உயிரிழந்த மாணவர் நவீன் சேகரப்பாவின் உடல் பதப்படுத்தப்பட்டு உக்ரைன் மருத்துவமணையில் உள்ள பிணவறையில் வைக்கப்பட்டுள்ளது. ஷெல் தாக்குதலை ரஷ்யா நிறுத்திய பிறகு அவரது உடல் இந்தியா கொண்டு வரப்படும் ” என தெரிவித்து உள்ளார்.