மீண்டும் தமிழ் படத்தின் ஹிந்தி ரீமேக்கில் அபிஷேக் பச்சன்
ஹிந்தி நடிகர் அமிதாப் பச்சனின் வாரிசு நடிகர் அபிஷேக் பச்சன். தமிழில் பார்த்திபன் இயக்கி, தயாரித்து, அவர் மட்டுமே நடித்திருந்த படம் ஒத்த செருப்பு சைஸ் 7. இந்த படத்தின் ஹிந்தி ரீமேக்கில் தற்போது நடித்துள்ளார் அபிஷேக் பச்சன். இந்நிலையில் அவர் இன்னொரு தமிழ் படத்தின் ஹிந்தி ரீமேக்கிலும் நடிக்கப் போகிறார்.
தமிழில் 2019ம் ஆண்டு மதுமிதா சுந்தரராமன் இயக்கத்தில் வெளியான படம் கே டி என்ற கருப்பு துரை. 71 வயது முதியவருக்கும், 8 வயது சிறுவனுக்கும் இடையே நடக்கும் நிகழ்வுகளை மையமாகக் கொண்டு உருவான படம் தான் இது . இந்த படத்தில் 71 வயது முதியவராக மு.ராமசாமி என்பவரும், 8 வயது சிறுவனாக நாகா விஷாலும் நடித்திருந்தார்கள். இப்படத்தில் நடித்ததற்காக சிறுவன் நாகா விஷாலுக்கு சிறந்த குழந்தை நட்சத்திரத்திற்கான தேசிய விருது கிடைத்தது.
இந்த நிலையில் தற்போது இப்படத்தை ஹிந்தியில் அபிஷேக் பச்சனை வைத்து மதுமிதா ரீமேக் செய்யப் போகிறாராம். தமிழில் மு.ராமசாமி நடித்த 71 வயது முதியவர் வேடத்தில் அபிஷேக் பச்சன் நடிக்க உள்ளதாக கூறப்படுகிறது.