வெற்றிமாறன் இயக்கத்தில் விடுதலை படம் உருவாகிக் கொண்டிருக்கிறது. இந்தப் படத்தில் இதுவரை காமெடி நடிகராக இருந்த சூரி, கதாநாயகனாக நடித்துக் கொண்டிருக்கிறார். பல்வேறு கட்டங்களாக நடைபெற்ற விடுதலை படத்தின் படப்பிடிப்பு, சென்னை புறநகர் பகுதிகளில் அண்மைக்காலமாக நடத்தப்பட்டு வந்துள்ளது. வண்டலூரை அடுத்த ஊனமாஞ்சேரி பகுதியில் விடுதலை படத்தின் சண்டைக் காட்சிகள் படமாக்கப்பட்டுள்ளன.
இதில் இயக்குநர் வெற்றிமாறன், சூரி உள்ளிட்ட படக்குழுவினர் பங்கேற்றுள்ளனர். அப்போது எதிர்பாரதவிதமாக விபத்து ஏற்பட்டுள்ளது. அதாவது சண்டைகாட்சி பயிற்சியாளராக செயல்பட்ட சுரேஷ் என்பவர், ரோப் கயிற்றில் இருக்கும்போது அது திடீரென அறுந்து விழுந்துள்ளது. இதில் பலத்த காயம் சுரேஷூக்கு ஏற்பட்ட நிலையில், அவர் உடனடியாக மருத்துவமனைக்கு அழைத்துச் செல்லப்பட்டார். அங்கு அவருக்கு தீவிர சிகிச்சை அளிக்கப்பட்டபோதும், அது பலனின்றி உயிரிழந்துள்ளார்.
அவரின் இந்த மறைவு, இயக்குநர் வெற்றிமாறன் உள்ளிட்ட படக்குழுவினருக்கு பேரதிர்ச்சியை கொடுத்துள்ளது. மேலும், விடுதலை படத்தின் படப்பிடிப்பு தற்காலிகமாக நிறுத்தப்பட்டுள்ளதாகவும் தகவல் வெளியாகியுள்ளது. இந்தியன் 2 படப்பிடிப்பின்போதும் கிரேன் விழுந்ததில் தொழில்நுட்ப கலைஞர்கள் உயிரிழந்தனர். அப்போது அந்த சம்பவம் பெரும் அதிர்ச்சியை ஏற்படுத்தியது. இதனால், இந்தியன் 2 படத்தின் படப்பிடிப்பும் நிறுத்தப்பட்டது. இந்நிலையில் இப்போது இப்படியொரு சம்பவம் நடைபெற்றிருப்பது கோலிவுட் திரைத்துறையினரிடையே அதிர்ச்சியை ஏற்படுத்தியுள்ளது.