அடுத்த ஆண்டு (2023) மார்ச் மாதம் நடைபெறும் 95-வது ஆஸ்கர் விருதுகள் போட்டியில், சிறந்த சர்வதேச திரைப்படப் பிரிவில் போட்டியிட இந்தியா சார்பில் குஜராத்தித் திரைப்படமான ‘Chhello Show’ (The Last Film Show) அதிகாரபூர்வமாகத் தேர்வு செய்யப்பட்டது. இதில் ‘RRR’ திரைப்படம் தேர்வாகாமல் போனதால் அந்தப் படத்தை, தனிப்பட்ட முறையில் பல்வேறு சர்வதேச விருது நிகழ்வுகளில் இடம்பெறச் செய்யத் தீவிரமான முயற்சியில் ஈடுபட்டு வந்தார் இயக்குநர் ராஜமௌலி.
குறிப்பாக, ஆஸ்கர் விருதுகள் போட்டியில் இடம்பெறச் செய்ய ஓப்பன் கேட்டகரியில் ‘For your consideration (FYC)’ என்ற விளம்பர யுக்தி மூலம் திரைத்துறையைச் சேர்ந்த முக்கிய நபர்களுக்கு ‘RRR’ திரைப்படத்தைத் தொடர்ந்து திரையிட்டுக் காட்டி வந்தார். மேலும், ஆஸ்கர் நாமினேஷனுக்காக ‘RRR’ திரைப்படத்தை மொத்தம் 15 பிரிவுகளில் விண்ணப்பித்திருந்தார்.
இந்நிலையில் 2023ம் ஆண்டு நடைபெறவுள்ள ஆஸ்கரின் தேர்வுப் பட்டியலில் (ஷார்ட்லிஸ்ட்டில்) ஒரிஜினல் பாடல் பிரிவில் எம்.எம்.கீரவாணி இசையமைத்திருந்த ‘RRR’ படத்தின் ‘நாட்டு நாட்டு’ பாடல் இடம்பெற்றுள்ளது. இதையடுத்து ரசிகர்கள் மற்றும் திரைத்துறையினர் சமூகவலைதளங்களில் படக்குழுவினருக்கு வாழ்த்துத் தெரிவித்து வருகின்றனர். இது ‘#RRRForOscars’ என்ற ஹேஷ்டேக்குடன் ட்விட்டரில் ட்ரெண்டாகி வருகிறது.
இதற்குமுன் அடுத்த ஆண்டு (2023) ஜனவரி மாதம் அமெரிக்காவின் லாஸ் ஏஞ்சல்ஸில் நடைபெறும் சர்வதேச அளவிலான 80வது ‘கோல்டன் குளோப்’ விருதுகளுக்கான நாமினேஷன் பட்டியலில் (இறுதி பரிந்துரைப் பட்டியல்) ஆங்கிலம் அல்லாத பிற மொழிக்கான ‘சிறந்த திரைப்படம்’ என்னும் பிரிவில் ராஜமௌலியின் ‘RRR’ திரைப்படம் நாமினேட்டாகியுள்ளது. மேலும், ‘சிறந்த பாடல்’ பிரிவில் ‘RRR’ திரைப்படத்தின் ‘நாட்டு நாட்டு’ பாடலும் நாமினேட்டாகியுள்ளது குறிப்பிடத்தக்கது.
இந்நிலையில் சிறந்த படம், சிறந்த நடிகர், சிறந்த இயக்குநர் உள்ளிட்ட சில முக்கியமான விருதுகளுக்கு ஆஸ்கரின் தேர்வுப் பட்டியல் இன்னும் வெளியாகவில்லை. அப்படியான சில விருதுகளின் தேர்வுப் பட்டியலிலும் `RRR’ படம் நிச்சயம் இடம்பெறும் என்பதே ஹாலிவுட் விமர்சகர்களின் கணிப்பாக இருக்கிறது.