பிரபல மலையாள பாடலாசிரியர் பீயர் பிரசாத் உடல்நலக் குறைவால் காலமானார். அவருக்கு வயது 62.
மலையாள திரையுலகில் பல ஹிட் பாடல்களை எழுதியவர் பாடலாசிரியர் பீயர் பிரசாத். இவர், பிரியதர்ஷன் இயக்கத்தில் வெளியான ‘கிளிச்சுந்தன் மாம்பழம்’ படத்தில் வித்யாசாகர் இசையில் வெளியான 6 பாடல்கள் மற்றும் திலீப், மோகன்லால் ஆகியோரின் படங்களில் 60-க்கும் மேற்பட்ட பாடல்களை எழுதியுள்ளார்.
அதேபோல, தமிழில் இளையராஜா இசையில் வெளிவந்த ‘ட்விங்கிள் ட்விங்கிள் லிட்டில் ஸ்டார்’ திரைப்படத்தில் ஒரு பாடலை எழுதியுள்ளார். இந்நிலையில், 62 வயதான பீயர் பிரசாத் உடல்நலக் குறைவால் காலமானார். அவருடைய திடீர் மறைவு மலையாள திரையுலகில் கடும் அதிர்ச்சியை ஏற்படுத்தியுள்ளது.
பாடலாசிரியர் பீயர் பிரசாத் மறைவுக்கு சினிமா பிரபலங்களும், அரசியல் தலைவர்களும் தங்களுடைய இரங்கலை தெரிவித்து வருகிறார்கள். பீயர் பிரசாத்திற்கு மனைவி மற்றும் 2 குழந்தைகள் உள்ளனர் என்பது குறிப்பிடத்தக்கது.