கரூர் வள்ளுவர் அறிவியல் மற்றும் மேலாண்மை கல்லூரியின் தாளாளராக உள்ளவர் செங்குட்டுவன். இவர் சொந்தமாக பெட்ரோல் பங்க் வைத்து நடத்தி வருகிறார். இந்த நிலையில், திருவள்ளுவர் தினம் மற்றும் பொங்கல் பண்டிகையை முன்னிட்டு, பள்ளி, கல்லூரி மாணவ – மாணவிகளிடையே போதை பொருட்களின் தீமை குறித்து விழிப்புணர்வு ஏற்படுத்தும் விதமாக புதிய அறிவிப்பு ஒன்றை வெளியிட்டிருந்தார். திருவள்ளுவரின் கள்ளுண்ணாமை அதிகாரத்தில் உள்ள 10 குறள்களையும் ஒப்பித்து, அதற்கு விளக்கம் கூறும் மாணவ, மாணவிகளுக்கு இலவசமாக 2 லிட்டர் பெட்ரோல் வழங்கப்படும் என்பது தான் அந்த அறிவிப்பு.
கடந்த 15 ஆம் தேதி முதல் இன்று 18 ஆம் தேதி புதன்கிழமை வரை 3 நாட்களுக்கு இந்த போட்டி நடைபெறும் என தெரிவித்து இருந்தார். இதனை அறிந்து, அந்த பகுதியை சேர்ந்த பள்ளி, கல்லூரி மாணவ – மாணவிகள், செங்குட்டுவனிடம் கள்ளுண்ணாமை அதிகாரத்தில் உள்ள 10 குறல்களையும், அதற்கான விளக்கத்தையும் ஒப்புவித்து, தங்களது இருசக்கர வாகனத்திற்கு இலவசமாக 2 லிட்டர் பெட்ரோலை நிரப்பிச் சென்றனர். இதுவரை 100-க்கும் மேற்பட்ட மாணவ, மாணவிகள் திருக்குறளை ஒப்பித்து, இலவசமாக பெட்ரோல் போட்டு சென்றுள்ளனர். இதேபோல், கடந்த ஆண்டும் செங்குட்டுவன் திருக்குறள் போட்டி நடத்தியது குறிப்பிடத்தக்கது.