எஸ்.எஸ். ராஜமவுலி இயக்கத்தில் ராம் சரண், ஜூனியர் என்.டி.ஆர்., ஆலியா பட் உள்ளிட்டோர் நடித்த ஆர்.ஆர்.ஆர். படம் சூப்பர் டூப்பர் ஹிட்டானது. அந்த படத்தில் வந்த நாட்டு நாட்டு பாடல் பட்டி தொட்டி எல்லாம் பிரபலமானது.
இந்நிலையில் ஆர்.ஆர்.ஆர். படம் ஆஸ்கர் ரேஸில் இருக்கிறது. சிறந்த திரைப்படம், சிறந்த இயக்குநர், சிறந்த நடிகர் உள்ளிட்ட பிரிவுகளில் ஆஸ்கருக்கு போட்டியிருக்கிறது ஆர்.ஆர்.ஆர். படம். இருப்பினும் இந்தியா சார்பில் செல்லோ ஷா படம் தான் ஆஸ்கருக்கு பரிந்துரை செய்யப்பட்டுள்ளது.
சிறந்த சர்வதேச திரைப்பட பிரிவில் ஆஸ்கர் ரேஸில் இருக்கிறது செல்லோ ஷோ. இருப்பினும் இந்தியர்களின் கவனம் எல்லாம் ஆர்.ஆர்.ஆர். படம் மீது தான் இருக்கிறது.
முன்னதாக நாட்டு நாட்டு பாடலுக்கு கோல்டன் குளோப் விருது கிடைத்தது. சிறந்த ஒரிஜினல் பாடலுக்காக அந்த விருது கிடைத்தது. இந்தியாவின் முதல் கோல்டன் குளோப் விருது அது தான் என்பது குறிப்பிடத்தக்கது.
ஆஸ்கர் விருதுக்கு தேர்வாகும் படங்களின் பட்டியலை இன்று மாலை 7 மணிக்கு வெளியிடுகிறார்கள். அந்த பரிந்துரை பட்டியலில் பல்வேறு பிரிவுகளில் ஆர்.ஆர்.ஆர். படம் இருக்க வேண்டும் என்பதே இந்திய சினிமா ரசிகர்களின் பிரார்த்தனையாக உள்ளது.
ஆண்டுதோறும் ஆஸ்கர் விருது விழா நடக்கும்போது இந்தியாவுக்கு ஒரு ஆஸ்கர் கிடைக்காதா என்று ஏக்கத்துடன் பார்ப்பது வழக்கமாகிவிட்டது. இந்நிலையில் தான் உலக ஆடியன்ஸின் கவனத்தை ஈர்த்து, கைதட்டல்களை பெற்ற ஆர்.ஆர். ஆர். படம் இந்த ஆண்டு ஆஸ்கர் விருது பெற்று இந்தியர்களின் ஏக்கத்தை தீர்க்கும் என்று நம்பப்படுகிறது.
95வது ஆஸ்கர் விருது விழா பரிந்துரை பட்டியல் வெளியாகவிருக்கும் இந்த நேரத்தில் ஆர்.ஆர்.ஆர். படத்தில் கொமரம் பீமாக சிறப்பான நடிப்பை வெளிப்படுத்திய ஜூனியர் என்.டி.ஆரின் பெயர் சிறந்த நடிகருக்கான ஆஸ்கர் பட்டியலில் இருக்க வேண்டும் என பிரபல அமெரிக்க பத்திரிகை ஒன்று செய்தி வெளியிட்டுள்ளது.
அந்த பத்திரிகையில் கூறப்பட்டிருப்பதாவது, ஆர்.ஆர்.ஆர். படத்தில் ஜூனியர் என்.டி.ஆர். வெளிப்படுத்திய அருமையான நடிப்பை அகாடமி கண்டிப்பாக கவனிக்க வேண்டும். பரிந்துரை பட்டியலில் சிறந்த நடிகருக்கான பிரிவில் ஜூனியர் என்.டி.ஆர். பெயர் இடம்பெற வேண்டும். இரண்டு இந்திய மெகா ஸ்டார்களால் தான் ஆக்ஷன் நிறைந்த அந்த படம் ஆடியன்ஸ் பிரெண்ட்லி பவர்ஹவுஸானது என்று அதில் தெரிவிக்கப்பட்டுள்ளது.
சிறந்த நடிகருக்கான போட்டியில் ஜூனியர் என்.டி.ஆர். தவிர்த்து டாம் க்ரூஸ், பால் டானோ, மியா கோத், பால் மெஸ்கல், கோ கிராவிட்ஸ் ஆகியோரும் இருக்கிறார்கள்.
ஆஸ்கர் பரிந்துரை பட்டியலில் சிறந்த இயக்குநர், சிறந்த படத்திற்கான பிரிவுகளில் ஆர்.ஆர்.ஆர். இடம்பெறும் என்று அந்த அமெரிக்க பத்திரிகை தெரிவித்துள்ளது.