பிளாஸ்டிக் நுண் துகள்களால் மனிதனுக்கு பேரழிவு காத்துக் கொண்டிருப்பதாக ஆய்வறிக்கை அலாரம் அடிக்கிறது.
மனிதன் கண்டுபிடித்ததிலேயே பேரழிவை ஏற்படுத்தக்கூடியது அணு ஆயுதம், அதற்கு அடுத்தபடியாக இருக்க கூடியது பிளாஸ்டிக். சுவாசிக்கும் காற்றிலும், உணவிலும், அருந்தும் நீரிலும் பிளாஸ்டிக் நுண் துகள்கள் கலந்திருப்பதாக அலாரம் அடிக்கிறார்கள் சூழலியல் நிபுணர்கள். இறந்த மாட்டின் வயிற்றில் பிளாஸ்டிக் கண்டுபிடிக்கப்பட்ட செய்தி, நாளைடைவில் மனிதர்கள் வயிற்றிலும் சுவாசக் குழாயிலும் வரலாம்.
2050 ஆம் ஆண்டுக்குள் கடல் உயிரினங்களில் 99% மைக்ரோ பிளாஸ்டிக்குகளை உட்கொண்டிருக்கும் என்று கணிக்கப்படுகிறது. அவற்றை உண்ணும் மனிதனுக்கு ஆபத்து இல்லையா என்ன.?. கடல் பிளாஸ்டிக் மாசுபாடு என்பது உலகெங்கிலும் ஒரு தொடர்ச்சியான பிரச்சனையாகும்.
கடலில் மைக்ரோ பிளாஸ்டிக் அளவு அதிகரிக்கும் போது, அதையே உணவாக உட்கொள்ளும் கடல் உயிரினங்கள் வழியாக இறுதியில் மனிதர்களால் நுகரப்படும் உணவுச் சங்கிலியில் நுழைகின்றன. ஏற்கனவே நெதர்லாந்து நாட்டின் ஆராய்ச்சியாளர்கள், 22 நபர்களுடைய ரத்தத்தை பரிசோதித்த பொழுது, 17 நபர்களின் ரத்தத்தில் மைக்ரோ பிளாஸ்டிக்குகள் இருந்ததை கண்டுபிடித்திருக்கிறார்கள்.
இப்படி பிளாஸ்டிக் பொருட்களால் இயற்கை மற்றும் உயிரினங்களுக்கு பேராபத்து நிச்சயம் உள்ளது என்பது நிரூபணமாகியுள்ளது. இந்த நிலையில் அந்த பேரழிவு 2050 ஆண்டுக்குள் நம்மை தாக்கும் என்பது தான் சமீபத்திய ரிப்போர்ட். உலகப் பெருங்கடல்களில் பிளாஸ்டிக் மாசுபாடு கடந்த 15 ஆண்டுகளில் முன் இல்லாத அளவை எட்டியுள்ளதாக ஒரு புதிய ஆய்வு கண்டறிந்துள்ளது.
புதன் கிழமை வெளியிடப்பட்ட ஆய்வின்படி, இன்று உலகப் பெருங்கடல்களின் மேற்பரப்பில் 170 டிரில்லியன் பிளாஸ்டிக் துண்டுகள், முக்கியமாக மைக்ரோபிளாஸ்டிக்ஸ், 2005 ஆம் ஆண்டு முதல் அப்புறப்படுத்தப்பட்டதாக மதிப்பிடப்பட்டுள்ளது.
“கடந்த 15 ஆண்டுகளில் உலகப் பெருங்கடல்களில் பிளாஸ்டிக் மாசுபாடு முன்னெப்போதும் இல்லாத அளவை எட்டியுள்ளது” என்று சர்வதேச இதழான PLOS One இல் வெளியிடப்பட்ட ஆய்வில் தெரிவிக்கப்பட்டுள்ளது. முந்தைய மதிப்பீடுகளை விட இந்த அளவு அதிகமாக இருந்தது, மேலும் ஆய்வு செய்யாமல் விட்டுவிட்டால், வரும் பத்தாண்டுகளில் கடலுக்குள் நுழையும் பிளாஸ்டிக்கின் விகிதம் பல மடங்கு அதிகரிக்கும் என்று ஆய்வில் கண்டறியப்பட்டுள்ளது.
1979 மற்றும் 2019 க்கு இடைப்பட்ட 40 ஆண்டு காலத்தை மையமாக வைத்து உலகெங்கிலும் உள்ள 11 ஆயிரத்திற்கும் மேற்பட்ட நிலையங்களில் இருந்து ஆராய்ச்சியாளர்கள் பிளாஸ்டிக் மாதிரிகளை எடுத்தனர். “2005 ஆம் ஆண்டிலிருந்து கடலில் பிளாஸ்டிக் மாசுபாடு அதிகரிப்பைக் காண்கிறோம். ஏனெனில் உற்பத்தியில் விரைவான அதிகரிப்பு மற்றும் கடலில் பிளாஸ்டிக் வெளியிடுவதைக் கட்டுப்படுத்தும் குறைந்த எண்ணிக்கையிலான கொள்கைகள் உள்ளன” என்று ஆய்வாளர்கள் கூறியுள்ளனர்.
பால் விநியோக வாகனத்தை திருப்பி அனுப்பிய பால்முகவர்கள்!
தற்போதைய போக்குகளில், 2050 ஆம் ஆண்டளவில் ஜி20 நாடுகளில் பிளாஸ்டிக் பயன்பாடு 2019 இலிருந்து கிட்டத்தட்ட இரட்டிப்பாகும், ஒவ்வொரு ஆண்டும் 451 மில்லியன் டன்களை எட்டும் என்று எகனாமிஸ்ட் இம்பாக்ட் மற்றும் தி நிப்பான் அறக்கட்டளை இணைந்து தயாரித்த அறிக்கை கூறுகிறது. ஜி20 நாடுகளில் இந்தியாவும் அடக்கம் என்பது குறிப்பிடதக்கது.
ஹாங் காங் மாடல் துண்டு துண்டாக வெட்டி கொலை; தலையை வேகவைத்த கொடூரம்.!
மறுசுழற்சி, மேம்பட்ட கழிவு மேலாண்மை அமைப்புகளைக் கொண்ட வளர்ந்த நாடுகளில் கூட, மாசுப் பிரச்சனைக்கு தீர்வு எட்டப்படவில்லை. ஏனெனில் ஒரு சிறிய சதவீத பிளாஸ்டிக்குகள் முறையாக மறுசுழற்சி செய்யப்பட்டு, அதற்குப் பதிலாக பெரும்பாலும் நிலப்பரப்புகளில் முடிகிறது. பிளாஸ்டிக் நுண் துகள்களால் மனிதர்களுக்கும், இயற்கைக்கும் மற்ற உயிரினங்களுக்கு பேரிழிவு ஏற்பட உள்ளது. எனவே பேராபத்தை தவிர்க்க சூழலியல் விதிகளை கடுமையாக்க வேண்டும் என இயற்கை ஆர்வலர்கள் கோரிக்கை விடுத்து வருகின்றனர்.