கோவை:
தமிழக அரசு செயல்படுத்தி வரும் மகளிருக்கான இலவச பேருந்து திட்டத்தை கோவை பாஜக எம்எல்ஏ
கடுமையாக விமர்சித்துள்ளார். “இலவச பேருந்து பயணம் என அறிவித்தால் மட்டும் போதாது.. அதற்கு முதலில் பேருந்துகள் இருக்க வேண்டும்” என அவர் கூறியுள்ளார்.
கடந்த சட்டமன்றத் தேர்தலுக்கு முன்பு திமுக கொடுத்த முக்கிய வாக்குறுதிகளில் ஒன்று மகளிருக்கான இலவச பேருந்து பயணம். திமுகவை ஆட்சிக்கட்டிலில் அமர வைத்ததற்கு இந்த வாக்குறுதியும் மிக முக்கியமான ஒன்றாக கருதப்படுகிறது. இதனிடையே, ஆட்சிப் பொறுப்பேற்றதும் இந்தத் திட்டத்தை முதல்வர் மு.க. ஸ்டாலின் தொடங்கி வைத்தார். இது, பெண்கள் மத்தியில் அதிக வரவேற்பை பெற்றது.
ஆரம்பத்தில் இதற்காக அதிக அளவிலான பேருந்துகள் இயக்கப்பட்டு வந்தன. ஆனால் தற்போது இந்த பேருந்துகள் போதிய அளவில் இயக்கப்படவில்லை என புகார் எழுந்துள்ளதாக கூறப்படுகிறது.
இந்நிலையில், கோவையில் செய்தியாளர்களை சந்தித்த எம்எல்ஏ வானதி சீனிவாசனிடம், “கோவையில் மகளிருக்கான இலவச பேருந்துகள் குறைக்கப்பட்டுள்ளதுதாக குற்றச்சாட்டு எழுகிறதே”.. என நிருபர் ஒருவர் கேள்வியெழுப்பினார்.
அதற்கு பதிலளித்து வானதி சீனிவாசன் கூறுகையில், “நீங்கள் சொல்வது உண்மை தான். இதுதொடர்பாக பல புகார்கல் என்னிடம் வந்து கொண்டுதான் இருக்கின்றன. பெண்களுக்கு இலவசமாக பேருந்து கொடுத்திருக்கிறோம்.. அவர்களுக்கு டிக்கெட் ஃப்ரீ என சொல்லிவிட்டு, பேருந்தையே பல பகுதிகளில் இருந்து மொத்தமாக எடுத்துவிடுகிறார்கள்” என்றார்.
பின்னர் உடனே அங்கிருந்த பெண்களிடம், “ஏம்மா.. இந்த இலவச பஸ் விட்டுட்டோம்னு பெருமையாக சொல்றாங்களே.. நீங்க அந்த பேருந்துகளில் ஏறியிருக்கிறீர்களா?” என்று வானதி சீனிவாசன் கேட்டார். அதற்கு அந்தப் பெண்கள், “இல்ல மேடம்.. பேருந்துளும் ரொம்ப குறைவாக தான் இயக்குறாங்க. அந்த பேருந்துகள் கூட பஸ் நிறுத்தங்களில் நிற்கிறது இல்ல” எனக் கூறினர்.
அப்போது செய்தியாளர்களை பார்த்த வானதில் சீனிவாசன், “பார்த்தீங்களா.. நான் யாரிடமும் எதையும் சொல்லி அழைத்து வரவில்லை. உங்கள் முன்புதான் நேரடியாக கேட்டேன். அவர்கள் கூறும் பதிலை கேட்டுக்கோங்க. பெண்களுக்கு தேவை வாக்குறுதிகள் அல்ல.. வசதிகள்தான். இதனை திமுக அரசு புரிந்துகொள்ள வேண்டும்” என்றார்.