வடசென்னையைச் சேர்ந்த 18 வயது இளம்பெண் ஒருவர், தண்டையார்பேட்டை அனைத்து மகளிர் காவல் நிலையத்தில் புகார் ஒன்றைக் கொடுத்தார். அதில், “நான் பன்னிரண்டாம் வகுப்பு வரை படித்திருக்கிறேன். நான் வசிக்கும் பகுதியைச் சேர்ந்த முகமது என்பவருடன் சில ஆண்டுகளுக்கு முன்பு எனக்கு பழக்கம் ஏற்பட்டது. அதன் பிறகு இருவரும் காதலித்தோம். அப்போது முகமதுவின் நடவடிக்கைகள் எனக்குப் பிடிக்கவில்லை. அதனால் நான் அவரிடம் பேசுவதை தவிர்த்தேன். இந்த நிலையில் என்னுடன் பழகிய காலகட்டத்தில் நானும் அவரும் சேர்ந்து எடுத்துக் கொண்ட புகைப்படங்களை என்னிடம் காண்பித்த முகமது, அதை சமூக வலைதளத்தில் வெளியிட்டு விடுவேன் என, என்னை மிரட்டினார். பின்னர் என்னைக் கட்டாயப்படுத்தி என்னுடன் அவர் பாலியல் உறவு வைத்துக்கொண்டார். அதை எனக்குத் தெரியாமல் வீடியோவாக எடுத்து வைத்திருக்கும் முகமது, அதை வெளியிடாமலிருக்க பணம் கேட்டு மிரட்டினார். வேறுவழியின்றி 5 லட்சம் ரூபாய் வரை முகமதுவிடம் கொடுத்துவிட்டேன்.
தற்போது எனக்கு வேறு இடத்தில் திருமணம் நிச்சயிக்கப்பட்டுள்ளது. அதைத் தெரிந்துகொண்ட முகமது, அந்த நபருக்கு நானும் முகமதுவும் சேர்ந்திருக்கும் வீடியோ மற்றும் புகைப்படங்களை அனுப்பி விடுவேன் என மிரட்டி வந்தார். மேலும் அந்த திருமணத்தை நிறுத்தச் சொல்லி முகமதுவின் நண்பர்கள் ராமச்சந்திரன் மற்றும் 17 வயது சிறுவன் ஆகியோர் என்னை அடித்து துன்புறுத்தினர்.
அதோடு என்னுடைய திருமணத்தையும் அவர்கள் நிறுத்திவிட்டனர். எனவே சட்டப்படி அவர்கள்மீது நடவடிக்கை எடுக்க வேண்டும்” என்று குறிப்பிட்டிருந்தார்.
புகாரின்பேரில் தண்டையார்பேட்டை அனைத்து மகளிர் போலீஸ் இன்ஸ்பெக்டர் சாஜிபா, பாலியல் வன்கொடுமை உள்ளிட்ட சட்டப்பிரிவுகளின் கீழ் வழக்கு பதிவுசெய்து, குற்றம்சாட்டப்பட்ட அந்தப் பெண்ணின் முன்னாள் காதலன் முகமது, அவரின் நண்பர்கள் ராமச்சந்திரன் மற்றும் 17 வயது சிறுவனிடம் விசாரணை நடத்தினார்.
பின்னர் இளம்பெண் தெரிவித்த குற்றச்சாட்டுகள் உண்மையென தெரியவந்ததால் முகமது, ராமசந்திரன் ஆகியோரை போலீஸார் கைதுசெய்து சிறையில் அடைத்தனர். 17 வயது சிறுவன், சிறுவர் சீர்திருத்தப்பள்ளியில் சேர்க்கப்பட்டார். கைதான முகமது டிரைவராகவும், ராமச்சந்திரன் அ.தி.மு.க வட்ட இளைஞரணிச் செயலாளராகவும் உள்ளனர்.