எம்ஜிஆர், சிவாஜி, ரஜினி அர்ஜூன் உள்ளிட்ட ஏராளமான பிரபலங்கள் நடித்த படங்களின் தயாரிப்பாளர் ஈ.வி.ராஜன் காலமானார். அவருக்கு வயது 83.
எம்.ஜி.ஆர் நடித்த குமரிப் பெண், சிவாஜி நடித்த தங்கச்சுரங்கம், ரஜினி நடித்த குப்பத்து ராஜா, அர்ஜூன் நடித்த கல்யாண கச்சேரி மற்றும் சட்டம் சிரிக்கிறது உட்பட 15 படங்களை தமது ஈ.வி.ஆர். பிக்சர்ஸ் சார்பில் தயாரித்தவர் ஈ.வி.ராஜன்.
பழம்பெரும் நடிகை ஈ.வி.சரோஜாவின் சகோதரரும், பழம்பெரும் இயக்குநர் டி.ஆர்.ராமண்ணாவின் மைத்துனருமான ஈ.வி.ராஜன், சென்னை கொட்டிவாக்கத்தில் குடும்பத்தினருடன் வசித்து வந்தார். முதுமை காரணமாக பல்வேறு உடல்நல பிரச்னைக்கு சிகிச்சை பெற்ற வந்தார். இந்நிலையில், சிகிச்சை பலனின்றி நேற்று காலமானார்.
இதையறிந்த தமிழக முதல்வர் ஸ்டாலின், நேரில் சென்று ராஜன் உடலுக்கு மலர் வளையம் வைத்து அஞ்சலி செலுத்தினார். பின்னர் அவர் விடுத்துள்ள இரங்கல் செய்தியில், “தயாரிப்பாளர் ஈ.வி.ராஜன் மறைவு அதிர்ச்சி அளிக்கிறது. திறமையான பல கலைஞர்களை கண்டறிந்து அவர்கள் மீது புகழ் வெளிச்சம் பாய்ச்சியவர். அவரது மறைவு கலைத்துறைக்கு பேரிழப்பாகும்” என்று குறிப்பிட்டுள்ளார்.