வெற்றி தொடரும்போது அந்தப் போதையை தலையில் ஏற்றிக் கொள்ளாமல் இருப்பதுதான் வளர்ச்சிக்கான பாதை. இந்த சீசனில் இரண்டாம் முறை தலைவராகும் அரிய வாய்ப்பைப் பெற்ற FJ, அந்த வாய்ப்பை சரியாகப் பயன்படுத்தாமல் அலட்சியமாக இருந்ததற்கு ரொமான்ஸ்தான் காரணமா?
இந்த எபிசோடில் FJதான் விஜய்சேதுபதியின் டார்கெட்டாக இருந்தார். எனவே விசே புயல் மையம் கொண்டது, FJவிடம்தான்.
பிக் பாஸ் வீட்டில் நடந்தது என்ன? – நாள் 55
மேடைக்கு வந்த விசே “ஸ்கூல் டாஸ்க் நல்லாயிருந்ததா?” என்று கேட்க “ஃபயரா இருந்தது” என்று ஒருவர் உற்சாகத்துடன் பதில் சொல்லி சிரிப்பொலி. “உங்களைப் போன்ற நண்பர்கள்தான் வேண்டும்” என்று சர்காஸ்டிக்காக சிரித்தார் விசே.
“டாஸ்க் ஆடுங்கன்னு சொன்னா, ஆளாளுக்கு ஒரு ஜோடியை பிடிச்சு ஆடியிருக்காங்க.. இதுல ஒருத்தர் வாக்குமூலம் கொடுத்து வான்ட்டடா மாட்டியிருக்காரு. வாங்க பார்ப்போம்” என்று வெள்ளிக்கிழமை நிகழ்வுகளுக்கு இட்டுச் சென்றார்.
பிக் பாஸ் வீட்டின் லவ் டிராக் என்பது இருமுனை கத்தி மாதிரி. அதுவே சர்வைவலுக்கு வழிவகுக்கும். அது பார்க்க க்யூட்டாக இருக்க வேண்டும். ஆனால் அந்த ஆயுதத்தை சரியாகக் கையாளவில்லையென்றால் நம்மையே பதம் பார்க்கும். லவ் டிராக் காரணமாக சிறந்த ஆட்டக்காரர்கள்கூட அநாவசியமாக எவிக்ட் ஆகி வெளியே போயிருக்கிறார்கள் என்பதற்கு கடந்த கால உதாரணங்கள் இருக்கின்றன.
FJ சிறைக்குச் சென்றாலும் பின்னாடியே சென்று அமர்ந்து வியானா, “உன்னை பழைய மாதிரி பார்க்கணும்ன்னு தோணுது. என்னை யாராவது கேர் பண்ணா பிரச்சினை. உன்னைப் பார்க்கும் போதெல்லாம் ஹார்ட் அடிச்சுக்குது.
இது சரியில்ல” என்று அனத்திக் கொண்டிருந்தார். சமயங்களில் புத்திசாலித்தனமாகப் பேசும் வியானாவிற்கு, இந்த லவ் டிராக் நமக்கு எதிராக திரும்பி விடும் என்பது புரியாதா? அல்லது வயசுக் கோளாறா?
FJ மீதுள்ள அக்கறை காரணமாக இந்த விவகாரத்தை விசாரித்துக் கொண்டிருந்தார் கனி. “நீங்க ரெண்டு பேரும் இப்படி நடந்துக்கறது வெளில எப்படித் தெரியும்ன்றது உனக்குத் தெரியும்.
அது தெரிஞ்சுதான் நடந்துக்கறியா.. அவளுக்கும் இது தெரியுமா? உங்களுக்குள்ள ஃபீலிங்க்ஸ்ன்னு ஒண்ணும் இல்லைல்ல? ”என்று கனி கேட்க “இங்க ஒருத்தர் கிட்ட comfort zone உருவாகறது நேச்சுரல். சுபிக்ஷாவும் இப்ப வியானாகிட்ட சரியா பேசறதில்ல. இதன் விளைவுகள் எனக்குத் தெரியும்” என்று துணிச்சலாகச் சொன்னார் FJ.
சாண்ட்ராவிடம் வாயை விட்டு மாட்டிக்கொண்ட FJ
ஒன்றுக்கொன்று முரண்கொண்ட மனிதர்கள் அடைக்கப்பட்ட சூழலில், தமக்கு ஆதரவாக இருப்பவர்களை நோக்கி மனம் சாயும். குறிப்பாக பெண்களுக்கு தங்களை கேர் எடுத்துக்கொள்பவர்களைப் பிடிக்கும். அந்த வகையில் வியானாவிற்கு FJ மீது ஈர்ப்பு ஏற்பட்டிருக்கும். இது இயல்பானதுதான். ஆனால் இது ஆட்டத்தைப் பாதிக்காத அளவிற்கு அவர்கள் பார்த்துக் கொள்ளவில்லை என்பதுதான் பிரச்னை.
சிறையில் இருந்தபோது சாண்ட்ராவிடம் பேசிக்கொண்டிருந்த FJ வாயை விட்டு விட்டார். “எனக்கு கைல பெரிசா அடிபடலை. பாரு வேலை செய்யட்டும்னுதான் சும்மா இருந்தேன்” என்று அவர் தன்னிச்சையாக வாக்குமூலம் தந்துவிட “பாவம். அவ தனியா நின்று அத்தனை பேருக்கும் சமைச்சாளே.. உடல் உபாதை வேற” என்று சாண்ட்ரா அனுதாபப்பட “நாங்க எவ்ளோ வேலை செஞ்சோம் தெரியுமா… ரெண்டு நாளா நான்தான் ஃபுல்லா சமைச்சேன்” என்று சமாளித்தார் FJ.
மேடைக்கு வந்த விசே “முதல்ல அவங்களைப் பாராட்டுவோம். அப்புறம் கழுவி ஊத்துவோம்.. ஓகேவா?” என்றபடி வீட்டுக்குள் சென்றார். திரை விலகியதும் விசே சொன்ன மாதிரி, பார்வையாளர்கள் பலமாக கைத்தட்ட ‘அடடே.. நமக்கு இத்தனை வரவேற்பா?” என்று போட்டியாளர்கள் மகிழ்ந்தார்கள்.
FJ வை சிறப்பாக ரோஸ்ட் செய்த விசே
ஸ்கூல் டாஸ்க்கிற்காக தங்களின் நடை உடை பாவனைகளை மாற்றிக்கொண்ட போட்டியாளர்களை விசே பாராட்டினார். “அஞ்சு வருஷமா வெச்சிருந்த தாடி சார்.. ஷூட்டிங் சமயத்துலகூட எடுக்கல.
பிக் பாஸ் சொன்னதால எடுத்தேன். மூணு கிலோ குறைஞ்ச மாதிரி இருக்கு” என்று புன்னகையுடன் சொன்ன கம்ருதீனை “இப்பல்லாம் உங்களைப் பிடிக்க ஆரம்பிச்சிருக்கு கம்மு. இந்த மாற்றம் உங்களுக்கே புரியுதா?” என்று விசே கேட்க பாருவிற்கு ஒரே குஷி.
ஷேக்ஸ்பியர் நாடகங்களில் வரும் பாத்திரம்போல சபரி அணிந்திருந்த உடை நன்றாகவே இருந்தது. ஆனால் மற்றவர்கள் கிண்டலடித்தார்கள் போலிருக்கிறது. விசேவும் பாவனையாக கிண்டலடித்துப் பிறகு பாராட்டினார்.
இன்றைக்கு FJதான் நம்முடைய மெனு என்று முடிவு செய்துகொண்ட விசே, அதற்கேற்ப ஆட்டத்தைத் தொடங்கினார். “இந்த வாரம் கேப்டன்ஸி எப்படியிருந்தது?” என்று விசாரிக்க “முதல் வாரம் நல்லா பண்ணார்.
அடுத்த வாரமும் தல ஆனதால மிதப்பாயிட்டாரு. இரண்டாவது வாரம் அவரை ஆளையே காணலை. எந்தப் பிரச்னையையும் விசாரிக்கல. தலையிடல. வியானா கூட பேசறதுல மட்டும்தான் ஆர்வமா இருந்தாரு” என்று ஏறத்தாழ அனைவரும் கழுவி கழுவி ஊற்றினார்கள்.
ஆனால் வியானா மட்டும் விதிவிலக்கு “அவரு வெள்ளையாவும் இருப்பாரு… கருப்பாவும் இருப்பாரு” என்று FJவிற்கு ஆதரவாகக் கலவையாக ஆரம்பிக்க “மத்தவங்க சொன்னதெல்லாம் தப்பா… உக்காருங்க” என்று விசே அமரச் சொல்ல “இருங்க சார்… முடிச்சுடறேன்… அவரு தல பொறுப்பை சரியா பண்ணலை” என்று ரிவர்ஸ் கியர் போட்டு அமர்ந்தார். (இந்தப் பொண்ணுங்களே இப்படித்தான் எஜமான்!)
“பாரு சமைக்க ஹெல்ப் கேட்டாங்க… யாரும் முன்வரலை. அப்பகூட நீங்க வரலையே FJ?” என்று அடுத்த வெடிகுண்டை விசே விட்டு “இப்ப பாருங்களேன். இதுக்கு வியானா பதில் சொல்வாங்க” என்று நக்கலடித்தார். இதற்கு FJவிடம் பதில் இல்லை. “பாரு மேல இருக்கற வன்மத்தையெல்லாம் ஒத்தி வச்சுக்கிட்டு உதவி செய்யப்போயிருக்கலாமே?” என்று வெடித்தார் விசே.
‘வீட்டு தல – பிரச்னை எதிலும் காண்பிக்கவில்லை தலை’
தர்மலிங்கம் – வசந்தி மொட்டைக் கடுதாசி அடுத்த பிரச்னை. “இவ்வளவு சீரியஸா ஒரு பிரச்னை வீட்டுக்குள்ள போயிட்டிருக்கு. அப்பவும் வியானாகூட பேசிட்டே எட்டிப் பார்த்தாரு. அவ்ளதான்” என்று மற்றவர்கள் வரிசையாகப் போட்டுக் கொடுத்தார்கள். “அதிகாரம்ன்றது ஒரு பொறுப்பு. அதை சரியா ஹாண்டில் பண்ணத் தெரியலையே?” என்று FJவை வறுத்தெடுக்கும்போது வீட்டிற்குள் அணில் ஒன்று நுழைந்து கத்திக்கொண்டிருந்தது.
அந்த அணிலுக்கு ஹேம்நாத் என்று பெயர் வைத்திருக்கிறார்களாம். கம்ருதீன் பாசத்துடன் இட்லியை எடுத்து தூக்கிப்போட்டு விட்டு “எடுத்துட்டு போயிடுவான் சார்” என்றார். அணிலை முன்னிட்டு ஒரு சிறப்பு இடைவேளை என்று பிரேக்கில் கிளம்பினார் விசே. அணில் உதவியதன் காரணமாக ரோஸ்ட் செய்யப்படுவதில் இருந்து தற்காலிகமாகத் தப்பினார் FJ.
பிரேக் சமயத்தில் பாரு பேசுவதற்கு நெருங்கி வர “உன்கிட்ட பேச விருப்பமில்ல” என்று எரிச்சலுடன் எழுந்து சென்றார் FJ. ஆனால் அரோரா சரியான அட்வைஸ் தந்தார். “நீ தலயாவும் இல்ல. வார்டனாவும் இல்ல. ஒரு பிரச்னைல சும்மா வந்து கூட எட்டிப் பார்க்கல. அது தப்பு இல்லையா?” என்று கேட்க FJவிடம் அதற்கு பதில் இல்லை.
வேண்டுமென்றே பாருவை பழிவாங்கினாரா FJ?
பிரேக் முடிந்து வந்த விசே, மறுபடியும் விசாரணையைத் தொடர “எது கேரக்டர்.. எது தல பொறுப்புன்னு கன்ப்யூஸ் ஆயிட்டேன். எந்தச் சமயத்துல எந்த ரோல் பண்றதுன்ல குழப்பமாயிடுச்சு” என்று FJ சொன்ன பதில் குழப்பமாக இருந்தது. “நீங்கதான் எந்த ரோலுமே பண்ணலையே… குழப்பமாயிடுச்சுன்றதுல்லாம் ஒரு பதிலா?” என்று கோபத்துடன் விசே கேட்க அதுவரை மௌனமாக நின்றிருந்த FJ “சரிங்கண்ணா விடுங்க” என்று சொல்லிவிட “உங்க பிரெண்டுங்ககூட ஜாலியா பேசற மாதிரில்லாம் என் கிட்ட பேச முடியாது” என்று எச்சரித்தார் விசே.
விசாரணையின்போது விசேவிடம் பதில் சொன்னாலும் பிரச்னை. ஸாரி என்று ஒப்புக் கொண்டாலும் பிரச்னை. “உங்க ஸாரில்லாம் தேவையில்ல” என்று முகத்தில் அடிப்பதுபோல் சொல்லி விடுவார். அமைதியாக நிற்பது ஒருவகையில் சேஃப் கேம். பாருவும் திவாகரும் அப்படித்தான் எஸ்கேப் ஆவார்கள். FJவும் அதுபோல் அமைதியாக நின்றிருந்தார். அப்படியே போயிருந்தால் விசே விட்டிருப்பார்போல. ஒரு கட்டத்தில் எரிச்சலைக் காட்டியதால், பதிலுக்கு கோபமான விசே தனது பிரம்மாஸ்திரத்தை எடுத்தார்.
“சாண்ட்ரா.. FJ உங்க கிட்ட என்னம்மா சொன்னாரு?” என்று விசே கேட்க, மிகத் தெளிவாக போட்டுக் கொடுத்தார் சாண்ட்ரா. ‘கைல பெரிசா அடிபடலை. பாருவை வேலை செய்ய வைக்கத்தான் அப்படி இருந்தேன்’ என்று FJ சொன்னதாக அறிந்தவுடன் திகைத்துப் போய் அதிர்ச்சியில் வாயை முடி அழுவதற்கு தயார் ஆனார் பாரு.
‘இதுதான் பிரேக் விட சரியான சமயம்’ என்பதை உணர்ந்த விசே, கிளம்ப, “எனக்கு எதிரா ஏன் இப்படி நடக்குது. நான் என்ன பண்ணேன்’ என்று அழ ஆரம்பித்த பாருவை மற்றவர்கள் சமாதானப்படுத்தினார்கள்.
‘பாரு பாவம்தான். ஆனால்… தீதும் நன்றும் பிறர் தர வாரா’
ஒரே ஆளாக இத்தனை பேருக்கு பாருவை சமைக்க விட்டு FJ வேடிக்கை பார்த்தது நியாயமற்ற செயல் என்பதில் மறுப்பில்லை. அதிலும் பெண்களுக்கான பிரத்யேக உடல் உபாதைகளுடன் பாரு சிரமப்பட்டது நிச்சயம் வேதனை.
ஆனால் இந்தச் சூழலுக்கு பாருவும் ஒருவகையில் காரணமாக இருந்தார் என்பதையும் பார்க்க வேண்டும். ‘சமையல் ஏரியாவை பிடிச்சுக்கிட்டு ராஜமாதாவா கனி அதிகாரம் பண்றாங்க’ என்கிற புகாரை பாருவும் திவாகரும் வந்த நாள் முதலே புறணி பேசியிருக்கிறார்கள். அவதூறாக கரித்துக் கொட்டியிருக்கிறார்கள். அது கனியின் ஸ்ட்ராட்டஜியாகவே இருந்தாலும்கூட ‘இத்தனை பேருக்கு சமைத்த உழைப்பை பாராட்ட பாருவிற்கோ திவாகருக்கோ மனமில்லை.
‘சமையல் ஏரியான்றது ஒரு ஆயுதம். நானும் அங்கபோய் என் திறமையைக் காட்ட முடிவு செஞ்சிட்டேன்’ என்று பிறகு பெருமையாக சொன்னவரும் இதே பாருதான். கிச்சன் ஏரியா அதிகாரமும் வேண்டும், அதே சமயத்தில் அதற்கான திறமையையும் வளர்த்துக் கொட்ட மாட்டேன், உழைப்பையும் போட மாட்டேன்’ என்பது எப்படி சரியாகும்?
பாருவிற்கு முக்கியமான எதிரி அவரேதான்
பிக் பாஸ் போட்டியாளர்களுக்கு சமையல் தெரிந்திருப்பது கூடுதல் போனஸ் என்பது பாருவிற்கு நிச்சயம் தெரிந்திருக்கும். எனவே போட்டிற்குள் நுழைவதற்கு முன்பே அதற்கான அடிப்படை விஷயங்களை தயார்செய்து வந்திருக்கலாம். தனது வாய்ச்சவடாலின் மூலம் சமாளித்துவிடலாம் என்று வந்தவருக்கு உண்மையான சவாலைக் கண்டவுடன் பதட்டம் வருகிறது. அவருடைய மோசமான உணவை இரண்டு நாட்களுக்கு சகித்துக்கொள்ள கட்டாயம் போட்டியாளர்களுக்கு ஏற்படுகிறது.
‘கிச்சன்ல எனக்கு யாராவது ஹெல்ப் பண்ணுங்க’ என்று பாரு கேட்டபோது அதுவரை உதவியாக இருந்த அமித்கூட ‘நான் வர மாட்டேன்’ என்று மறுத்துவிட்டார். லெட்டர் பிரச்சினையை பெரிதாக்கி அமித்தையும் பஞ்சாயத்தில் இழுத்துவிட்ட கோபம் அவருக்கு. போலவே மற்ற எவருமே முன்வர சம்மதிக்கவில்லை. ஏனெனில் அந்த அளவிற்கு மற்ற போட்டியாளர்களை வெறுப்பேற்றியிருக்கிறார் பாரு. வேலை செய்யாமல் டபாய்த்திருக்கிறார். விளைவு, ஒன்றிரண்டு நாட்களுக்கு செய்து பார்க்கட்டும், அப்போதுதான் தெரியும் என்று FJ உள்ளிட்டவர்கள் உள்ளுக்குள் நினைத்திருக்கக்கூடும்.
‘என்னதான் இருந்தாலும் ஒரே ஆளாக இத்தனை பேருக்கு சமைப்பது சிரமம்தானே?’ என்கிற கேள்வி எழலாம். நிச்சயம் சிரமம்தான். ஆனால் நாம் செய்கின்ற வினைகள்தான், சிக்கலான நேரத்தில் மறுபடியும் நம்மிடமே திரும்பி வரும். கர்மா பூமராங். தனது உடல்மொழி, உச்சரிப்பு, வார்த்தைகள் என்று பெரும்பாலோனோரை வெறுப்பேற்றினார் பாரு. அவருக்கு அனுசரணையாக இருந்த திவாகரைக்கூட பல சமயங்களில் அவமதித்தார். அடிமைபோல நடத்தினார். திவாகர் வெளியேறுவதற்கு பாருவின் சகவாசம் ஒரு முக்கியமான காரணம்.
FJ இப்படிப் பண்ணிட்டானே என்று அழுதார் பாரு. அவர் மட்டுமல்ல, நம்மில் பெரும்பாலோனோருமே பிரச்னை வரும் நேரங்களில் ‘நான் யாருக்கு என்ன பாவம் செஞ்சேன்… ஏன் இத்தனை கஷ்டம்?” என்று புலம்புகிறோம். ஆனால் மனசாட்சியோடு நிதானமாக யோசித்துப் பார்த்தால் எத்தனை பேரைக் காயப்படுத்தியிருப்போம் என்பது விளங்கும். அப்படி எவரையும் காயப்படுத்தாத நல்லுள்ளம் கொண்டோருக்கு வந்த பிரச்னையும் தன்னாலேயே சரியாகி விடும்.
அதுவரை மற்றவர்கள் நீண்ட காலமாக தந்த உழைப்பை விடவும், பாரு இரண்டு நாட்கள் செய்த உழைப்பிற்கு அனுதாபம் கிடைக்கிறது என்றால் மறுபடி அதேதான். இயல்பிலேயே நல்லவனாக இருப்பவனுக்கு எந்த மதிப்பும் கிடைக்காது. தீயவனாக இருந்து தற்காலிமாக திருந்தியவனுக்கு ‘பாவம்ப்பா.. மனுஷன் இப்பல்லாம் மாறிட்டான்’ என்கிற கிரெடிட் கிடைக்கும். பிரஜினுக்கு இந்த வாரம் கிடைத்த மாதிரி.
‘வியானா பண்ண குறும்புகள் நல்லா இருந்தது’ – ஆச்சரியம் தந்த விசே
பிரேக் முடிந்த திரும்பிய விசே “டீச்சர்ஸ் ஒரு பக்கமாகவும் மாணவர்கள் ஒரு பக்கமாகவும் உக்காருங்க. இந்த டாஸ்க் உங்களுக்கு நல்லா புரிஞ்சுதா.. இதை குறும்புத்தனமா (naughtiness) பண்ணணும்ன்றதுதான் முக்கியமான பாயின்ட். இப்ப சொல்லுங்க. இந்த நோக்கில் நல்லா பண்ணது யாரு?” என்கிற கேள்வியை முன்வைத்தார்.
அதிக குறும்புத்தனம் செய்தவர் என்கிற வகையில் வியானாவிற்கு நிறைய வாக்குகள் கிடைத்தது. “அதான்.. நானும் சொல்றேன்.. வியானா பண்ணது எனக்கு ரொம்ப பிடிச்சது” என்று வெடிகுண்டை வீசினார் விசே. FJவிற்கு ஆதரவாக பேசி அடிவாங்கி சோகத்துடன் அமர்ந்திருந்த வியானாவிற்கு இது இன்ப அதிர்ச்சியாக இருந்தது.
“அதை விட்டுட்டு சும்மா இருந்த ரம்யாவை பெஸ்ட் ஃபெர்பார்மர்ன்னு சொல்லியிருக்கீங்க?” என்று விசே கேட்க ரம்யாவின் முகம் அப்செட் ஆனது. மேடையில் நிற்க வைத்து முதல் பரிசைக் கொடுத்து விட்டு கீழே இறங்கியவுடன் ‘தப்பா கொடுத்துட்டோம்” என்று பிடுங்கிக்கொண்டால் ஒருவருக்கு எப்படி இருக்கும்?
குறும்புத்தனங்களுடன் கூடவே டாஸ்க்கையும் சுவாரசியமாக கொண்டு சென்றவர் சிறந்த போட்டியாளர் என்று வைத்திருக்கலாம். இந்த வகையில் விக்ரம், அரோரா, வினோத் போன்றவர்கள் குறைந்தபட்சமாவது சுவாரசியமான விஷயங்களைச் செய்தார்கள். ஆனால் வியானா செய்த so called குறும்புகள் முழுக்க எரிச்சலூட்டும் செயல்கள் மட்டுமே. பாருவிற்கு அடிபட்டால் விசாரிக்கும் விசே, கால் வலியால் அவதிப்பட்ட அமித்தின் பிரச்சினை பற்றிக் கேட்கவில்லை. அதற்கு வியானா செய்த குறும்புதானே காரணம்?
‘மொட்டைக் கடுதாசி’ – விசே தந்த ஹோம் ஒர்க்
கண்கலங்கிய ரம்யாவைப் பார்த்து ஆறுதல் சொல்லும் நோக்கில் “உங்களைச் சுத்தி மத்தவங்க ஆடினாங்கள்ல.. அதை நீங்க பார்த்திருக்கணும். கேள்வி கேட்டிருக்கணும். அப்பதான் உங்களுக்குப் புரிஞ்சிருக்கும்” என்று சமாதானப்படுத்தினார் விசே. ‘அடப்பாவிகளா.. ரவுடி பொண்ணா இருந்த நான், கொஞ்சம் அடக்கி வாசிச்சது தப்பா?’ என்று ரம்யாவின் மைண்ட் வாய்ஸ் அலறியிருக்கலாம்.
விசே பிரேக்கில் சென்ற பிறகு “விக்ரம் அண்ணா.. நீங்களாவது எனக்கு சொல்லியிருக்கலாம்ல?” என்று பரிதாபமாக ரம்யா கேட்க “நீ ஒண்ணும்மா.. நானும் எதையோ நெனச்சு பண்ணிட்டிருந்தேன். அதன் ரிசல்ட் என்னன்னு தெரியாம?” என்று புலம்பினார். ஐடியா யோசிக்கும் தனக்கு கிடைக்காத கிரெடிட், வெறுமனே சேட்டை செய்த வியானாவிற்கு கிடைக்கிறதே என்று மனிதர் வருத்தப்பட்டிருக்கலாம்.
அடுத்ததாக, மாணவர்கள் சிறந்த டீச்சரை தோ்ந்தெடுக்க வேண்டும். இப்படித்தான் இது சென்றிருக்க வேண்டும். ஆனால் விசேவோ “நீங்க யாரை கம்மியா டார்கெட் பண்ணீங்க?” என்று கேள்வியை திசை திருப்பி விட்டு விட்டார்.
சொல்லி வைத்தாற்போல் அனைவருமே “FJ பக்கம்தான் போகலை. அவர் டாஸ்க்லயே இல்லை. வியானாகூட பேசறதுலதான் கவனமா இருந்தார்’ என்று சொல்ல “அப்ப அவர் வேஸ்ட்டுன்னு சொல்றீங்களா?” என்று ஏற்றி விட்டார் விசே.
இத்தனை நடந்தும் கூட FJ பக்கத்தில் அமர்ந்து “ஒண்ணும் கவலைப்படாத. வார்த்தையை விடாத. அடுத்த வாரம் பார்த்துக்கலாம்” என்று ஆறுதல் சொல்லிக் கொண்டிருந்தார் வியானா.
“மாணவப்பருவம்ன்றது எத்தனை சுவாரசியமான வாழ்க்கை? இந்த டாஸ்க்கை நீங்க என்னென்னமோ பண்ணியிருக்கலாம். மாணவனா இருக்க ஒரு அரிய சந்தர்ப்பம் கிடைச்சது.. அதை வேஸ்ட் பண்ணிட்டீங்க.. டாஸ்க்தான் கொடுக்க முடியும்?
அதை இப்படி ஆடுங்கன்னு ஸ்கிரிப்ட்டுமா கொடுக்க முடியும்? நீங்கதான் டெவலப் பண்ணணும். ஆனா பண்ணலை. மொட்டை கடுதாசி கூட உங்களுக்கு எழுதத் தெரியலையே..” என்று வெடித்தார் விசே.
“ஓகே.. நான் உங்களுக்கு ஒரு ஹோம் ஒர்க் தரேன். ஒவ்வொருத்தரும் மொட்டைக் கடுதாசி எழுதணும். யாருக்குன்னு குறிப்பிடலாம். எழுதி வையுங்க.
நாளைக்கு வரேன்” என்று விசே “சார்.. வாட் ஈஸ் மொட்டை கடுதாசி?” என்று சந்தேகம் கேட்டார் ரம்யா. “அந்தக் கடுதாசில.. டீச்சர் டாஸ்க் பத்திதான் இருக்கணுமா.. ஒட்டுமொத்தமா எழுதலாமா?” என்பது கனியின் சந்தேகம்.
“எழுதுங்கம்மா.. எழுதுங்க.. உங்க ராஜ்ஜியம்தான். புகுந்து விளையாடுங்க” என்பது போல் சைகை காட்டி விட்டு சென்றார் விசே.
தேர்வு மாணவர்கள் மாதிரி ஒவ்வொருவரும் சீரியசாக எழுதிக் கொண்டிருந்தார்கள். கையால் எழுதுவதை ஏறத்தாழ மறந்து விட்டிருக்கிற காலம்.
அது மட்டுமல்லாமல் தமிழும் தெரியாமல், ஆங்கிலமும் தெரியாமல் இரண்டாங்கெட்டானாக வளர்ந்து கொண்டிருக்கும் தலைமுறைகள்.
இந்தப் போக்கு ஒவ்வொருவரின் கையெழுத்திலும் தெரிந்தது. யாரோ ஒருவரின் ஆங்கில கையெழுத்து மட்டும் சிறப்பாக இருந்தது. முதல் மாணவராக ஆன்ஸர் ஷீட்டை தந்து விட்டுச் சென்றார் வினோத்.
யார் யாருக்கு எழுதிய கடிதம், அதன் உள்ளடக்கம் என்பதை வைத்து அடுத்த எபிசோடிற்கு காலம் தள்ளுவார்கள் போலிருக்கிறது. இந்த வார எவிக்ஷனில் டிவிஸ்ட் இருப்பதோடு, புதிய வரவு ஒன்றும் இருப்பதாகச் சொல்கிறார்கள். பொறுத்திருந்து பார்ப்போம்.