அதிமுக உட்கட்சிப் பிரச்சினையில் ஓபிஎஸ், இபிஎஸ் தரப்பு மல்லுக்கு நிற்கிறது. நாங்கள் தான் ஒரிஜினல் அதிமுக என இரு தரப்பும் கூறி வருகின்றன. அதற்கு சாட்சியாக திமுகவை பலமாக விமர்சித்து தங்கள் தரப்பை இருப்பைக் காட்டிக்கொள்கின்றன.
அந்த வகையில் ஓபிஎஸ் ஆதரவாளராக அறியப்படும் மருது அழகுராஜ் அறிக்கை ஒன்றை வெளியிட்டுள்ளார்.
அதில், “பணத்தால் தொண்டர்களையும் மனட்சாட்சி கொண்ட மக்கள் திலகத்தின் பக்தர்களையும் மகராசி அம்மாவின் பாசப் பிள்ளைகளையும் விலை கொடுத்து வாங்க முடியாது என்கிற சம்மட்டி அடியை கூவத்தூர் வியாபாரி எடப்பாடிக்கு காலம் கொடுக்க காத்திருக்கிறது.
தமிழ் நாட்டில் பா.ஜ.க.வை காலூன்ற விடக்கூடாது என்கிற தி.மு.க.வின் திரைமறைவு திட்டத்தை எடப்பாடி மூலம் நிறைவேற்றவும் பிளவுபட்ட அ.தி.மு.க வை தொடர்ந்து முன்னெடுக்க வைத்து 2026 சட்ட மன்ற தேர்தலில் உதயநிதிக்கு பட்டாபிஷேகம் நடத்த அதே எடப்பாடி வைத்து தி.மு.க கணக்கு போடுகிறது.
இதற்கு கைமாறாக கொடநாடு கொலை கொள்ளை விவகாரத்தையும் எடப்பாடி மற்றும் அவரது ஊழல் பங்காளிகளையும் காப்பாற்றி சட்ட பாதுகாப்பை எடப்பாடியின் சம்பந்தி வரை வழங்க திமுகவிடமிருந்து உத்தரவாதம் தரப்பட்டிருப்பதாகவே தோன்றுகிறது.
உதாரணமாக சொல்ல வேண்டுமானால் வேலுமணி மீதான பல்லாயிரம் கோடி ஊழல்கள் 2 லட்சம் டன் நிலக்கரி காணாமல் போனதாக குற்றம் சுமத்தப்பட்ட தங்கமணி மீதான குற்றச்சாட்டுகள் எல்லாம் இப்போது அந்தச் செய்தியே காணாமல் போயிருப்பதை கவனத்தில் கொள்ள வேண்டும்.
ஆக மொத்தத்தில் அ.இ.அ.தி.மு.க.வை பலி கொடுத்து தன்னை காப்பாற்றிக் கொள்ள எடப்பாடி போடுகிற திட்டம் தான் இவை என்பதும் ஒரு பாதை நிலத்தை எழுதிக் கொடுத்து கொலை வழக்குகளில் இருந்தே தப்பித்த எடப்பாடியின் முந்தைய வரலாறு இதனை உணர்த்துகிறது.
எனவே இந்த நரி சூழ்ச்சியை முறியடிக்க வேண்டிய கடமையும் பொறுப்பும் கழகத்தொண்டர்களுக்கு உரியதாகும்
எனவே எடப்பாடியின் தி.மு.க. எதிர்ப்பு என்பதெல்லாம் அவர்கள் இருதரப்பும் எழுதி வைத்து கொண்டு நடத்துகிற ஒப்பந்த நாடகமாகவே தோன்றுகிறது” என்று தெரிவித்துள்ளார்.