சமீபத்தில் வெளியான ‘விக்ரம்’ படத்தின் மாபெரும் வெற்றியை தொடர்ந்து இயக்குனர் லோகேஷ் கனகராஜ் தனது அடுத்த படத்திற்கான பணிகளில் தீவிரமாக ஈடுபட்டு வருகிறார். ‘மாஸ்டர்’ படத்தை தொடர்ந்து இவர் மீண்டும் விஜய்யை வைத்து ‘தளபதி 67’ படத்தை இயக்கப்போகிறார், இருப்பினும் இப்படம் குறித்த அதிகாரபூர்வ தகவல்கள் இன்னும் அறிவிக்கப்படவில்லை என்பது குறிப்பிடத்தக்கது. இதுவரையில் திரையில் காணாத நட்சத்திரங்களை பல்வேறு கதாபாத்திரங்களில் இந்த படத்தில் நடிக்கவைக்க படக்குழுவினர் முடிவு செய்திருப்பதாக கூறப்பட்ட நிலையில் தற்போது ‘தளபதி 67’ படத்தில் உலகநாயகன் கமல்ஹாசன் சிறப்பு தோற்றத்தில் நடிக்கவிருப்பதாக தகவல்கள் வெளியாகி இருக்கிறது. இயக்குனர் லோகேஷ் தனது முந்தைய படங்களில் நடித்த நட்சத்திரங்களை அடுத்தடுத்த படங்களில் நடிக்கவைத்து ஒரு சினிமாட்டிக் யூனிவர்சை உருவாக்குபவர் என்பது நன்கு தெரிந்த ஒன்று தான்.
அந்த வகையில் தற்போது இயக்குனர் விஜய்யை வைத்தி இயக்கப்போகும் படத்தில் கமல்ஹாசனை சிறப்பு தோற்றத்தில் நடிக்க வைப்பார் என்று எதிர்பார்க்கப்படுகிறது. ‘தளபதி 67’ படத்தில் விஜய்யோடு இணைந்து கமல்ஹாசன் நடித்தால் இருதரப்பு ரசிகர்களிடையே மிகப்பெரும் எதிர்பார்ப்பு ஏற்பட்டு படம் மிகப்பெரிய வெற்றியை பெறும். விரைவில் இந்த படத்தில் விஜய்யோடு, கமல்ஹாசன் இணையப்போகும் அதிகாரபூர்வ தகவல் வெளியாகக்கூடும் என்று எதிர்பார்க்கப்படுகிறது. ‘தளபதி 67’ ஒரு பயங்கரமான கேங்ஸ்டர் கதையம்சம் கொண்ட திரைப்படமாக இருக்குமென்றும், நடிகர் விஜய் இதில் ஒரு டான் போல இருப்பார் என்றும், சில பெரிய நட்சத்திரங்கள் முக்கியமான கதாபாத்திரங்களில் நடிப்பார்கள் என்றும் தகவல்கள் வெளியாகியுள்ளது.
மேலும் ‘தளபதி 67’ படத்தில் நடிக்க நடிகர் சஞ்சய் தத் அதிகாரபூர்வமாக ஒப்பந்தமாகி இருப்பதாகவும், மற்ற நடிகர்களான நிவின் பாலி, விஷால், கெளதம் மேனன் மற்றும் அர்ஜுன் ஷார்ஜா ஆகியோரிடம் பேச்சுவார்த்தை நடத்தப்பட்டு வருவதாகவும் கூறப்படுகிறது. விஜய் நடிக்கும் ‘வாரிசு’ படத்தின் ஷூட்டிங் பணிகள் தாமதம் ஏற்பட்டுள்ளதால் ‘தளபதி 67’ படத்தின் பணிகளிலும் தாமதம் ஏற்பட்டு இருக்கிறது.