அரசியல் விமர்சகர் சவுக்கு சங்கர் நீதிமன்ற அவமதிப்பு வழக்கில் கைதாகி சென்னை உயர் நீதிமன்றத்தால் 6 மாத சிறை தண்டனை பெற்றார். அதன் பின்னர் உச்ச நீதிமன்றம் அந்த தண்டனையை நிறுத்தி வைத்தது. அதனை தொடர்ந்து பழைய நான்கு வழக்குகளில் மீண்டும் சவுக்கு சங்கரை சைபர் க்ரைம் போலீஸ் கைது செய்தது. இந்த வழக்குளில் இருந்து ஜாமீன் பெற்ற சவுக்கு சங்கர், நேற்று காலை கடலூர் சிறையில் இருந்து வெளியே வந்தார்.
அதன் பிறகு சவுக்கு சங்கர் என்ன மாதிரியான ட்வீட் போடுவார் என்று அவரது ஆதரவாளர்கள் ஆவலாக இருந்த நிலையில், ”நான் வந்துட்டேன்னு சொல்லு. திரும்ப அதே மாதிரி வந்துட்டேன்னு சொல்லு” என்று பதிவிட்டு சிறையை விட்டு வெளியே வரும் வீடியோவை பகிர்ந்தார். ஏற்கனவே தன் மீது போடப்பட்டுள்ள வழக்குகளுக்கு திமுக தான் காரணம் என்று குற்றம்சாட்டிய சவுக்கு சங்கர் வெளியே வந்த பிறகும் ஓய மாட்டேன் என்று கூறினார்.
இந்த நிலையில் இன்று சவுக்கு சங்கர் முதல்வர் ஸ்டாலினை விமர்சித்து போட்டுள்ள ட்வீட் நீண்ட நாட்களுக்கு பிறகு பரபரப்பை ஏற்படுத்தியுள்ளது. முதல்வர் ஸ்டாலின் நடை பயிற்சியின் போது அமைச்சர் மா.சுப்பிரமணியத்திடம், உதயநிதி ஸ்டாலின் நடித்த ‘கலகத் தலைவன்’ பார்த்தீங்களா? எப்படி இருக்கு என்று கேட்டுள்ளார். அந்த வீடியோ தற்போது வைரலாகியுள்ளது.
அந்த வீடியோவை விமர்சித்து ட்வீட் போட்டுள்ள சவுக்கு சங்கர், விரைவில் புளூ சட்டை மாறனுக்கு போட்டியாக யூட்யூப் ரிவ்யூவர் அவதாரம் எடுக்கிறாரா முதல்வர்? விவாதிப்போம் என்று பதிவிட்டுள்ளார். இந்த பதிவுக்கு சவுக்கு ஆதரவாளர்கள் ஆரவாரமாகியுள்ளனர். மேலும், வந்ததும் வராமல் முதல் டார்கெட்டே முதல்வரா? தலைவன் வேற லெவல் என்றும் உசுப்பேற்றியுள்ளனர்.
சவுக்கு சங்கருக்கு ஜாமீன் வழங்கிய எழும்பூர் நீதிமன்றம் அவருக்கு 5 நிபந்தனைகள் விதித்துள்ளது. அதன்படி, சவுக்கு சங்கர் தினமும் காலை 10:30 மணிக்கு மதுரை மாவட்ட நீதிமன்றத்தில் ஆஜராக வேண்டும். உச்சநீதிமன்ற வழிகாட்டுதலின் படி, சமூக வலைதளங்களில் எந்தக் கருத்துக்களையும் பதிவிடக் கூடாது. நீதிமன்றம் உத்தரவிட்டால் உடனடியாக சவுக்கு சங்கர் உயர்நீதிமன்ற மதுரை கிளையில் ஆஜராக வேண்டும். சவுக்கு சங்கர் நீதித்துறை குறித்து எந்தவித கருத்துக்களையும் தெரிவிக்கவே கூடாது. 20 ஆயிரம் ரூபாய் கொண்ட பத்திரத்தில், 2 நபர்கள் பிணையம் வழங்க வேண்டும் ஆகிய நிபந்தனைகளுடன் சவுக்கு சங்கருக்கு ஜாமீன் வழங்கப்பட்டுள்ளது என்பது குறிப்பிடத்தக்கது.