குஜராத் மாநிலத்தில், முதலமைச்சர் பூபேந்திர படேல் தலைமையிலான பாரதிய ஜனதா கட்சியின் ஆட்சி நடைபெற்று வருகிறது. பிரதமர் நரேந்திர மோடியின் சொந்த மாநிலமான இங்கு, கடந்த 24 ஆண்டுகளாக, பாஜக ஆட்சிக் கட்டிலில் உள்ளது.
இந்தநிலையில் 182 சட்டப்பேரவைத் தொகுதிகளைக் கொண்ட குஜராத் மாநிலத்திற்கு, வரும் 1 ஆம் தேதி முதல் கட்டத் தேர்தலும், 5 ஆம் தேதி, இரண்டாம் கட்டத் தேர்தலும் நடைபெற உள்ளது. இரண்டு கட்டத் தேர்தலிலும் பதிவாகும் வாக்குகள், டிசம்பர் மாதம் 8 ஆம் தேதி எண்ணப்பட்டு முடிவுகள் அறிவிக்கப்பட உள்ளன.
குஜராத் மாநிலத்தில், மீண்டும் வெற்றி பெற்று ஆட்சியை தக்க வைக்க, ஆளும் பாஜக தீவிரமாக செயல்பட்டு வருகிறது. இங்கு மீண்டும் வெற்றி பெற, பாஜக பல்வேறு வியூகங்களை வகுத்துள்ளது. பிரதான எதிர்க்கட்சியான காங்கிரசும், பாஜகவுக்கு கடும் போட்டி அளிக்க தயாராக உள்ளது. டெல்லி முதலமைச்சர் அரவிந்த் கெஜ்ரிவாலின் ஆம் ஆத்மி கட்சியும், பாஜகவும் டஃப் கொடுக்கும் என கூறப்படுகிறது.
இதனால் தேர்தலில் மும்முனைப் போட்டி நிலவுகிறது. பாஜக தலைவர்கள் அனைவரும் தங்களது பங்குக்கு குஜராத்தில் முகாமிட்டு வாக்கு சேகரிப்பில் ஈடுபட்டு உள்ளனர். அதேபோல் காங்கிரஸ், ஆம் ஆத்மி உள்ளிட்ட கட்சிகள் தீவிர தேர்தல் பிரசாரத்தில் ஈடுபட்டு வருகின்றன.
அந்த வகையில் குஜராத்தில் தேர்தல் பிரச்சாரத்தில் ஈடுபட்ட உத்தரபிரதேச முதல்வர் யோகி ஆதித்யநாத், ‘‘ அரவிந்த் கெஜ்ரிவால் பயங்கரவாதிகளின் அனுதாபி. ராமர் கோயில் கட்டுவதற்கு எதிர்ப்பு தெரிவித்தவர் தான் கெஜ்ரிவால். மேலும் பாகிஸ்தானுக்கு சென்று இந்திய ராணுவம் சர்ஜிக்கல் ஸ்ட்ரைக் நடத்தியத்திற்கு ஆதாரம் கேட்டவர்’’ என அரவிந்த் கெஜ்ரிவாலை கடுமையாக சாடி இருந்தார்.
அவருக்கு வயசாயிடுச்சி… சந்திரபாபு நாயுடுவை வீட்டில் ரெஸ்ட் எடுக்க சொல்லும் ரோஜா!
இந்தநிலையில் யோகி ஆதித்யநாத்தின் வீடியோவை மேற்கோள் காட்டி பேசிய டெல்லி முதல்வர் அரவிந்த் கெஜ்ரிவால், ‘‘ குஜராத் மக்களுக்கு ஆபாச வசைகள், குண்டர்கள், ஊழல், அசிங்கமான அரசியல் வேண்டும் என்றால் அவர்களுக்கு வாக்களியுங்கள். பள்ளிகள், மருத்துவமனைகள், மின்சாரம், நீர், சாலை வசதிகள் வேண்டும் என்றால் எங்களுக்கு வாக்களியுங்கள்’’ என்று கூறியுள்ளார்.