அணிக்கு மீண்டும் வரும்படி, கோவை செல்வராஜுக்கு, ஓ.பன்னீர்செல்வம் ஆதரவாளர் புகழேந்தி அழைப்பு விடுத்து உள்ளார்.
முன்னாள் முதலமைச்சர் செல்வி ஜெ.ஜெயலலிதா மறைவுக்கு பிறகு, அதிமுகவில் அதிகார மோதல் ஏற்பட்டு உள்ளது. கட்சியின் அதிகாரமிக்க பதவியான பொதுச் செயலாளர் பதவியை பிடிப்பதில், ஓ.பன்னீர்செல்வம் – எதிர்க்கட்சித் தலைவர் எடப்பாடி பழனிசாமி ஆகியோர் இடையே கடும் போட்டி ஏற்பட்டது.
கடந்த ஜூலை மாதம் 11 ஆம் தேதி, சென்னையை அடுத்த வானகரத்தில், அதிமுக பொதுக்குழு மற்றும் செயற்குழுக் கூட்டத்தை, எடப்பாடி பழனிசாமி நடத்தினார். அதில், 90 சதவீத பொதுக்குழு உறுப்பினர்கள் மூலம், அதிமுக இடைக்காலப் பொதுச் செயலாளராக, எடப்பாடி பழனிசாமி தேர்வு செய்யப்பட்டார். இதற்கு ஓ.பன்னீர்செல்வம் மற்றும் அவரது ஆதரவாளர்கள் கடும் எதிர்ப்புத் தெரிவித்தனர்.
தொடர்ந்து, அதே நாளில் அதே பொதுக்குழு மேடையில், ஓ.பன்னீர்செல்வம் மற்றும் அவரது ஆதரவாளர்களை கட்சியின் அடிப்படை உறுப்பினர் பொறுப்பில் இருந்து நீக்கும் சிறப்புத் தீர்மானம் நிறைவேற்றப்பட்டது. இதனால் அதிருப்தி அடைந்த ஓ.பன்னீர்செல்வம், எடப்பாடி பழனிசாமியின் நடவடிக்கைகளுக்கு எதிராக, தேர்தல் ஆணையம், நீதிமன்றம் ஆகியவற்றில் முறையீடு செய்தார்.
அதிமுகவில் அதிகார மோதல் நீடித்து வரும் நிலையில், ஓ.பன்னீர்செல்வத்தின் ஆதரவாளர் கோவை செல்வராஜ், அதிமுகவில் இருந்து விலகுவதாக இன்று அறிவித்து உள்ளார். இது, ஓ.பன்னீர்செல்வம் தரப்புக்கு பின்னடைவாகப் பார்க்கப்படுகிறது.
இது தொடர்பாக, ஓ.பன்னீர்செல்வம் ஆதரவாளர் புகழேந்தி கூறியதாவது:
100 யூனிட் இலவச மின்சார திட்டத்தை கொண்டு வந்தவர் ஜெயலலிதா தான். அவரின் திட்டங்களை யாரும் கொண்டு வர முடியாது. வீட்டில் மோட்டார்களுக்கு பயன்படுத்தப்படும் மின்சாரத்திற்கு கட்டணம் தற்போது வசூல் செய்யப்படுகிறது. இது திராவிட முன்னேற்ற கழகத்திற்கும் முதல்வருக்கும் கெட்ட பெயரை ஏற்படுத்தும். கோவை செல்வராஜ் திடீரென அப்போலோ மருத்துவமனையில் ஜெயலலிதா சிகிச்சை குறித்து பேசி இருக்கிறார்.
ஜெயலலிதா மருத்துவமனையில் சேர்ந்த 34வது நாளே வெளிநாடு செல்ல அனைவரும் விரும்பினோம். ஆனால் முடிவு மருத்துவமனை தான் எடுக்க வேண்டும். இதுவரை ஓ.பன்னீர்செல்வம் அணியில் இணக்கமாக தான் இருந்தார். ஆனால் தற்போது ஏன் இந்த முடிவை எடுத்தார் என்று தெரியவில்லை. அவருடைய மனப்பக்குவத்தை திருத்திக் கொண்டு மீண்டும் இங்கு வர வேண்டும்.
இவ்வாறு அவர் கூறினார்.