ஹெச் வினோத் இயக்கத்தில் அஜித் தற்போது துணிவு படத்தில் நடித்திருக்கிறார். படம் பொங்கலுக்கு வெளியாகவிருக்கிறது. வங்கி கொள்ளையை மையப்படுத்தி படம் எடுக்கப்பட்டிருப்பதாகவும் இதில் அஜித் நெகட்டிவ் ரோலில் நடித்திருக்கிறார் எனவும் கூறப்படுகிறது. அஜித்தும், வினோத்தும் இணைந்த முதல் இரண்டு படங்கள் கலவையான விமர்சனங்களை பெற்றன. அதற்கு காரணம் சிலரின் தலையீடு படத்தில் இருந்ததாகவும் அதனால்தான் அவ்வாறு ரிசல்ட் வந்ததாகவும் கூறப்பட்டது.
இருப்பினும் அந்த இரண்டு படங்களும் வசூல் ரீதியாக பெரும் வெற்றி பெற்றன என்பதை மறுக்க முடியாது. எனவே துணிவு படத்துக்கு எதிர்பார்ப்பு ரசிகர்களிடையே அதிகமாக எழுந்துள்ளது. மேலும், பொங்கல் தினத்தன்று வாரிசு படமும் வெளியாகவிருப்பதால் பொங்கலுக்கு துணிவா, வாரிசா என்ற போட்டி தற்போதே உருவாகி ரசிகர்கள் சமூக வலைதளங்களில் பதிவிட்டுவருகின்றனர். துணிவு படத்தை ரெட் ஜெயண்ட் மூவிஸ் நிறுவனம் வெளியிடவிருக்கிறது. இதற்கிடையே துணிவு படமானது வங்கி கொள்ளையை மையப்படுத்தி எடுக்கப்பட்டிருப்பதாக கூறப்பட்டது.
இந்நிலையில் துணிவு எப்படிப்பட்ட படம் அதில் அஜித் ரோல் என்ன என்பவை குறித்து இயக்குநர் ஹெச்.வினோத் மனம் திறந்துள்ளார். இதுகுறித்து அவர் தனியார் ஊடகம் ஒன்றுக்கு அளித்த பேட்டியில், “ அஜித் துணிவு படத்தில் நெகட்டிவ் ரோலில் நடிக்கிறாரா என்ற கேள்விக்கு நான் ஆம் என சொன்னால், அப்போ மங்காத்தாவானு கேட்பார்கள். அவர்களின் கற்பனையை கொட்டுவதுதான் பிரச்னையே. ஒன்றே ஒன்று சொல்லிக்கொள்ள விருப்படுகிறேன். ரசிகர்கள் எதிர்பார்க்கும் அனைத்துமே இந்தப் படத்தில் இருக்கும்.
அதேபோல் அஜித் இதில் இரட்டை வேடமா என்று கேட்கிறார்கள். இந்த கேரக்டர் மிஸ்ட்ரியாகவே (மர்மம்) இருக்கட்டுமே. சமூக வலைதளங்களில் உருவாகும் கற்பனைகள் மக்களிடையே எதிர்பார்ப்பை ஏற்படுத்திவிடுகிறது. படத்தின் பாடல்கள் மற்றும் ட்ரெய்லரை பார்த்துவிட்டு படத்துக்கு வருவது நல்லது. துணிவு படம் வங்கிக்கொள்ளையை மையப்படுத்தி எடுக்கப்பட்டிருக்கிறது என்கிறார்கள். வங்கி செட் போடப்பட்டது அவ்வளவே. அயோக்கியர்கள் ஆடும் ஆட்டம்தான் துணிவு” என்றார்.