ஏர் இந்தியா விமானத்தில், மது போதையில் பெண் பயணி மீது சிறுநீர் கழித்த விவகாரத்தில் கைது செய்யப்பட்டுள்ள ஷங்கர் மிஸ்ரா, மது அருந்தியதற்கான காரணம் குறித்த தகவல் வெளியாகி உள்ளது.
அமெரிக்காவின் நியூயார்க் விமான நிலையத்தில் இருந்து தலைநகர் டெல்லிக்கு, ஏர் இந்தியா விமானம் கடந்த நவம்பர் மாதம் 26 ஆம் தேதி புறப்பட்டது. அப்போது, சக பயணி ஒருவர் குடி போதையில், அதே வகுப்பில் பயணித்துக் கொண்டிருந்த 70 வயது மூதாட்டியின் இருக்கை அருகே நின்று அவர் மீது சிறுநீர் கழித்துள்ளார். இந்த விவகாரம் அண்மையில் வெளிச்சத்திற்கு வந்ததை அடுத்து பெரும் அதிர்ச்சியை ஏற்படுத்தியது.
இது தொடர்பான விசாரணையில், பெண் மீது சிறுநீர் கழித்த நபர் மகாராஷ்டிர மாநிலம் மும்பையைச் சேர்ந்த ஷங்கர் மிஸ்ரா, 34, என்பது தெரிய வந்தது. இதை அடுத்து ஏர் இந்தியா விமானத்தில் அவர் பயணிக்க 30 நாட்கள் தடை விதித்து சம்பந்தப்பட்ட நிறுவனம் உத்தரவிட்டது.
இது குறித்து வழக்குப் பதிவு செய்து விசாரணை நடத்திய டெல்லி போலீசார், கர்நாடக மாநிலத் தலைநகர் பெங்களூரில் தலைமறைவாகி இருந்த ஷங்கா மிஸ்ராவை அண்மையில் கைது செய்தனர். சம்பவம் நடைபெற்ற 6 வாரங்களுக்கு பிறகு கைது செய்யப்பட்ட அவர், நீதிமன்றக் காவலில் 14 நாட்கள் சிறையில் அடைக்கப்பட்டு உள்ளார்.
இந்நிலையில், ஷங்கர் மிஸ்ரா, மது அருந்தியதற்கான காரணம் குறித்த தகவல் வெளியாகி உள்ளது. சம்பவம் நடைபெற்ற அன்று, ஷங்கர் மிஸ்ராவின் இருக்கை அருகில் அமர்ந்திருந்த, அமெரிக்காவைச் சேர்ந்த மருத்துவர் சுகதா பட்டாச்சார்ஜி, ஆங்கில செய்தி தனியார் தொலைக்காட்சி ஒன்றுக்கு அளித்துள்ள பேட்டியில் கூறி இருப்பதாவது:
என் அருகில் அமர்ந்திருந்த ஷங்கர் மிஸ்ரா, என்னிடம் ஒரே கேள்வியை பல முறை கேட்டுக் கொண்டே இருந்தார். அப்போது தான் அவர் மது அருந்தி இருப்பது எனக்குத் தெரிய வந்தது. உடனே இது குறித்து விமான ஊழியர்களிடம் தெரிவித்தேன். ஆனால் அவர்கள் கண்டுகொள்ளவில்லை. வேலை அதிகமாக இருந்ததாகவும், அதனால் சரியாக தூங்கவில்லை என்றும், இரவு நன்றாக தூங்குவதற்காக மது அருந்தியதாகவும், என்னிடம், ஷங்கர் மிஸ்ரா தெரிவித்தார்.
இவ்வாறு அவர் கூறினார்.
போதை ஆசாமி ஷங்கர் மிஸ்ராவை, அவர் பணியாற்றி வந்த “வெல்ஸ் பார்கோ” என்ற பன்னாட்டு நிறுவனம் டிஸ்மிஸ் செய்திருந்தது குறிப்பிடத்தக்கது.