பாஜகவிலிருந்து சமீபத்தில் விலகிய நடிகை காயத்ரி ரகுராம் பாஜகவுக்கு எதிராக நடை பயணம் மேற்கொள்ள உள்ளதாக அறிவித்துள்ளார்.
பாஜகவில் முக்கிய பொறுப்பில் இருந்த காயத்த்ரி ரகுராமுக்கும் அக்கட்சி மாநிலத் தலைவர் அண்ணாமலைக்கும் இடையே தொடர்ந்து பனிப்போர் நிலவி வந்தது.
இது ஒருகட்டத்தில் உச்சகட்டத்தை அடைந்ததை தொடர்ந்து அனைத்து பொறுப்புகளிலிருந்தும் அவர் 6 மாதங்களுக்கு நீக்கப்படுவதாக மாநில தலைவர் அண்ணாமலை அறிவித்தார்.
அதைத் தொடர்ந்து காயத்ரி ரகுராம் கட்சியிலிருந்து விலகுவதாக அறிவித்தார்.
இது தொடர்பாக அவர் நேற்று வெளியிட்டுள்ள அறிக்கையில், “என் தொழிலைக் கெடுத்ததற்கு நன்றி, என் பெயரைக் கெடுத்ததற்கு நன்றி, என் பெண்மையை அவமானப்படுத்தியதற்கு நன்றி, என்னை மானப் பங்கம் செய்ததற்கு நன்றி, என் 8 வருட சேவை, கடின உழைப்பு மற்றும் பணத்தை எடுத்துக் கொண்டதற்கு நன்றி, எல்லாவற்றையும் பறித்த பிறகு என்னை தூக்கி எறிந்ததற்கு ஒரு பெரிய நன்றி.
என்னால் திரும்ப கொண்டுவர முடியாத இளமைக் காலத்தை பறித்ததற்கு நன்றி, என் தனிப்பட்ட வாழ்க்கையை பறித்ததற்கு நன்றி, பாதுகாப்பை தராததற்கு நன்றி. எனக்கு துரோகம் செய்த பாஜகவுக்கு நன்றி, நீதி வழங்காததற்கு மிக்க நன்றி. கடவுள் உங்களை பார்த்துக்கொள்வார். நீங்கள் அனைவரும் என்னிடம் செய்தது தவறு என்பதை தமிழ்நாடு மக்கள் உங்களுக்கு பதில் சொல்வார்கள். நான் என் தர்மத்தை நிலைநாட்டுவேன். விரைவில் களத்தில் சந்திப்போம்.” என்று கூறியிருந்தார்.
இந்நிலையில் இன்று தனது ட்விட்டர் பக்கத்தில், “பா.ஜ.க பெண்களை அவமானப்படுத்தியதற்காகவும், பெண்களுக்கு பாதுகாப்பு கொடுக்காததற்காகவும் ஜனவரி 27ஆம் தேதி முதல் சென்னையில் இருந்து கன்னியாகுமரி வரை நடை பயணம் நடத்துவேன். தனியாக இருந்தாலோ அல்லது யார் வேண்டுமானாலும் என்னுடன் சேரலாம். எந்த அச்சுறுத்தலுக்கும் நான் பயப்படவில்லை.
என் உயிர் போனாலும் செய்வேன். நான் நீதிக்காக போராடுவேன். நான் அனைவருக்கும் விழிப்புணர்வை ஏற்படுத்துவேன். இது அரசியலில் பொது சேவை மற்றும் பொது வாழ்க்கை பெண்களுக்கானது” என்று தெரிவித்துள்ளார்.
பாஜக அரசுக்கு எதிராக ஒற்றுமை நடை பயணத்தை நாடு முழுவதும் மேற்கொண்டு வருகிறார் ராகுல் காந்தி. இந்நிலையில் பாஜகவுக்கு எதிராக தமிழ்நாடு முழுவதும் நடை பயணத்தை காயத்ரி ரகுராம் அறிவித்துள்ள நிலையில் ராகுல் காந்தி வழியில் பாஜகவை எதிர்க்கிறாரே இதனால்
காங்கிரஸ்
கட்சியில் அவர் இணைய வாய்ப்பு இருக்கிறதோ என அரசியல் அரங்கில் பேச்சு எழுந்துள்ளது.