ஜமியத் உலமா-இ-ஹிந்த் என்பது ஒரு நூற்றாண்டு பழமையான அமைப்பாகும், மேலும் முஸ்லிம்களின் சிவில், மத, கலாச்சார மற்றும் கல்வி உரிமைகளைப் பாதுகாப்பதற்காக இந்த அமைப்பு செயல்படுகிறது. ஜமியத் தன்னை முஸ்லிம்களின் மிகப்பெரிய அமைப்பாகக் கூறுகிறது, மேலும் முஸ்லிம்களின் சமூக-அரசியல் மற்றும் மதப் பிரச்சினைகள் அதன் நிகழ்ச்சி நிரலில் உள்ளன. ஜமியத், இஸ்லாம் மதத்தின் தேவபந்தி சித்தாந்தத்தை நம்புகிறது.
இந்தநிலையில் ஜமியத் உலமா-இ-ஹிந்தின் 34வது மாநாடு டெல்லியில் உள்ள ராம்லீலா மைதானத்தில் நேற்று தொடங்கியது. மூன்று நாள் நடக்கும் இந்த மாநாட்டில் ஒரே மாதிரியான சிவில் சட்டம், மத சுதந்திரம் மற்றும் முஸ்லீம் தனிநபர் சட்டம் மற்றும் மதரஸாக்களின் சுயாட்சி ஆகியவை விவாதிக்கப்படுகின்றன. மேலும், சமூக-பொருளாதாரத்தில் பின்தங்கிய முஸ்லிம்களுக்கு இடஒதுக்கீடு வழங்குவதற்கான முன்மொழிவைக் கொண்டு வருவது குறித்தும் ஆலோசிக்கப்படுகிறது.
இந்தநிலையில் மாநாட்டில் ஜமியத் உலமா-இ-ஹிந்த் அமைப்பின் தலைவர் மஹ்மூத் மதானி பேசும்போது, ‘‘இந்தியா நமது நாடு. இந்த நாடு நரேந்திர மோடி மற்றும் மோகன் பகவத் ஆகியோருக்குச் சொந்தமானது போலவே இந்த நாடு மஹ்மூத் மதனிக்கு சொந்தமானது. யாரும் யாரைவிட உயர்ந்தவர்களும் இல்லை தாழ்ந்தவர்களும் இல்லை.
இந்நாட்டின் பழமையான மதம் இஸ்லாம். இந்த நிலம் முஸ்லீம்களின் முதல் தாயகம். இஸ்லாம் வெளியில் இருந்து வந்த மதம் என்று சொல்வது முற்றிலும் தவறானது மற்றும் அடிப்படையற்றது. அனைத்து மதங்களிலும் இஸ்லாம் மிகவும் பழமையான மதம். இந்தி முஸ்லிம்களுக்கு இந்தியா சிறந்த நாடு. நாங்கள் கட்டாய மத மாற்றங்களுக்கு எதிரானவர்கள். ஆனால் இன்று தானாக முன்வந்து மதம் மாறுபவர்களும், பொய் வழக்குகளில் சிறைக்கு அனுப்பப்படுகிறார்கள்.
வலுக்கட்டாயமாக நடத்தப்படும் மத மாற்றத்திற்கு நாங்கள் எதிரானவர்கள். மத சுதந்திரம் அடிப்படை உரிமை. பலாத்காரம், மோசடி, பேராசை ஆகியவற்றால் மதமாற்றம் செய்வதற்கும் நாங்கள் எதிரானவர்கள். நமாஸ் மீதான தடை போன்ற அரசின் ஏஜென்சிகள் முஸ்லிம் சமூகத்தை குறிவைத்ததற்கு பல எடுத்துக்காட்டுகள் உள்ளன. அவர்கள் மீது போலீஸ் நடவடிக்கை மற்றும் புல்டோசர் நடவடிக்கை எடுக்கப்பட்டு வருகிறது.
நிலநடுக்கத்தால் பாதிக்கப்பட்ட துருக்கிக்கு உதவியதற்காக பிரதமர் மோடி அரசுக்கு நன்றி. எங்கள் அமைப்பு பாஜக மற்றும் ஆர்எஸ்எஸ்க்கு எதிரானது அல்ல. இந்தியாவில் தவறான இந்துத்துவா பரப்பப்படுகிறது.
‘ஐபிஎஸ் அதிகாரியின் வேலை ட்வீட் செய்வதல்ல’ – அலறவிட்ட பீகார் முதல்வர்.!
பாலஸ்தீனம் மற்றும் இஸ்ரேல் மீதான இந்தியாவின் வெளியுறவுக் கொள்கையில் மாற்றம் கொண்டு வருவது நீண்ட காலத்திற்கு இந்தியாவிற்கு பயனளிக்காது. இது குறுகிய நன்மைகளைத் தரக்கூடும், ஆனால் நீண்ட காலத்திற்கு சரியாக இருக்காது. ஆர்எஸ்எஸ்ஸின் எண்ணங்கள் பிரச்சனைக்குரியவை தான். ஆனால் தற்போதைய ஆர்எஸ்எஸ் தலைவர் மோகன் பகவத்தின் சமீபத்திய அறிக்கைகளையும் நாம் புறக்கணிக்கக் கூடாது’’ என அவர் பேசினார்.