நாடாளுமன்ற பட்ஜெட் கூட்டத்தொடரின் முதல் அமர்வு நடைபெற்று வருகிறது. இதில், உறுப்பினர்களின் கேள்விகளுக்கு அந்தந்த துறை சார்ந்த அமைச்சர்கள் பதில் அளித்து வருகின்றனர். அந்த வகையில், வங்கி ஊழியர்களின் பென்ஷனை உயர்த்தும் பிரச்சனை உச்ச நீதிமன்றத்தில் உள்ளதாக விழுப்புரம் எம்.பி., ரவிக்குமார் எழுப்பிய கேள்விக்கு நிதித்துறை இணை அமைச்சர் பதில் தெரிவித்துள்ளார்.
“2002 நவம்பருக்கு முந்தைய பொதுத்துறை வங்கிகளின் (PSBs) ஓய்வூதியப் பிரச்சினையைத் தீர்க்க அரசாங்கம் ஏதேனும் நடவடிக்கை எடுத்திருக்கிறதா? பொதுத்துறை வங்கிகளின் ஓய்வூதிய புதுப்பிப்பு விவகாரத்தில் அமைச்சகத்தின் தற்போதைய நிலைப்பாடு என்ன?; ஓய்வூதிய புதுப்பிப்பு விவகாரத்தை ஆராய அமைக்கப்பட்ட குழு அதன் அறிக்கையை சமர்ப்பித்துள்ளதா? அப்படியானால், அதன் விவரங்கள் என்ன?” ஆகிய கேள்விகளை ரவிக்குமார் எம்.பி., எழுப்பியிருந்தார்.
அதற்கு நிதித்துறை இணை அமைச்சர் பக்வத் காரட் அளித்திருக்கும் எழுத்துபூர்வ பதிலில், “வங்கி ஊழியர்கள் மற்றும் ஓய்வு பெற்றவர்களுக்கு முறையே அகவிலைப்படி (டிஏ) மற்றும் அகவிலை நிவாரணம் (டிஆர்) வழங்கப்படுகிறது, இது இருதரப்பு ஒப்பந்தம் மூலம் வங்கி ஊழியர்களின் சங்கங்கள் மற்றும் இந்திய வங்கிகள் சங்கம் (ஐபிஏ) இடையே பேச்சுவார்த்தை நடத்தப்பட்டு முடிவுசெய்யப்படுகிறது.
நவம்பர் 2002க்கு முன்பு ஓய்வு பெற்றவர்களுக்கு DA ஐ நடுநிலையாக்க தொழிற்சங்கங்கள்/சங்கங்கள் கோரிக்கை விடுத்துள்ளதாக IBA தெரிவித்துள்ளது. இருப்பினும், இது தொடர்பாக இருதரப்பு தீர்வில் எந்த முடிவும் எடுக்கப்படவில்லை; தேசியமயமாக்கப்பட்ட வங்கிகளில் இருதரப்பு ஒப்பந்தம் மூலம் ஓய்வூதியத் திட்டம் அறிமுகப்படுத்தப்பட்டது.
அதன்படி, அந்தந்த தேசியமயமாக்கப்பட்ட வங்கிகளின் போர்டுகள், வங்கி நிறுவனங்களின் (கையகப்படுத்துதல் மற்றும் பரிமாற்றம்) சட்டம், 1970/1980ன் பிரிவு 19ன் கீழ் தங்களின் அதிகாரங்களைப் பயன்படுத்தி ஊழியர்களின் ஓய்வூதிய விதிமுறைகளை உருவாக்கியுள்ளன. இந்த விதிமுறைகளில் ஓய்வூதியத்தைத் திருத்துவதற்கான ஏற்பாடு இல்லை. இருப்பினும், DA/DR அவ்வப்போது அதாவது காலாண்டு/அரையாண்டு அடிப்படையில் அதிகரிக்கப்படுகிறது.
பொதுத்துறை வங்கிகளின் ஓய்வூதிய புதுப்பிப்பு விவகாரத்தை ஆராய அமைக்கப்பட்ட குழு தனது அறிக்கையை உச்ச நீதிமன்றத்தில் சமர்ப்பித்துள்ளது என்றும், இந்த விவகாரம் இன்னும் விசாரணையில் உள்ளது என்றும் இந்திய வங்கிகள் சங்கம் (ஐபிஏ) தெரிவித்துள்ளது.” இவ்வாறு அமைச்சர் தன் பதிலில் தெரிவித்துள்ளார்.