மேகாலயாவில் 59 சட்டப்பேரவை தொகுதிகளுக்கு கடந்த பிப்ரவரி 27ம் தேதி தேர்தல் நடைபெற்றது. அதைத் தொடர்ந்து இன்று வாக்கு எண்ணிக்கை நடைபெற்று வருகிறது. தேர்தல் ஆணைய தகவலின்படி, ஆளும் கட்சியான தேசிய மக்கள் கட்சி 20 இடங்களில் வெற்றி பெற்று 6 தொகுதிகளில் முன்னிலையில் உள்ளது. அதன்மூலம் மாநிலத்தில் தனிப்பெரும் கட்சியாக தேசிய மக்கள் கட்சி உருவெடுத்துள்ளது.
அதேபோல் ஐக்கிய ஜனநாயகக் கட்சி (யுடிபி) 11 இடங்களில் வெற்றி பெற்று இரண்டாவது இடத்தில் உள்ளது. காங்கிரஸ் மற்றும் திரிணாமுல் காங்கிரஸ் தலா 5 இடங்களிலும், பாஜக 2 இடங்களிலும் வெற்றி பெறும் எனத் தெரிகிறது. இந்தநிலையில் தேர்தலுக்கு பிந்தைய கருத்து கணிப்புகள், மேகாலயாவில் தொங்கு சட்டசபை அமையும் என கூறியிருந்தது.
அந்தவகையில் 31 தொகுதியில் வெற்றி பெற்றால் மட்டுமே ஆட்சியை அமைக்க முடியும் என்ற நிலையில், ஆளும் கட்சியின் தலைவர் மற்றும் முதல்வர் வேட்பாளர் கான்ராட் சங்மா கூட்டணி ஆட்சி அமைக்க ஒன்றிய உள்துறை அமைச்சர் அமித்ஷாவிற்கு அழைப்பு விடுத்துள்ளார். மேகலாயாவில் ஆளுங்கட்சியுடனான கூட்டணியை முறித்து கொண்டு, பாஜக தனியாக தேர்தலை சந்தித்த நிலையில், தற்போது மீண்டும் இணைந்து ஆட்சியமைக்க முதல்வர் கான்ராட் சங்மா அழைப்பு விடுத்துள்ளார்.
கான்ராட் சங்மாவின் கோரிக்கை தாமதமின்றி நிறைவேற்றப்பட்டது. வடகிழக்கு மாநிலத்தில் பாஜக சார்ந்த பிரச்சனைகளை தீர்த்து வரும் அஸ்ஸாம் முதலமைச்சர் ஹிமந்தா பிஸ்வா சர்மா, கான்ராட் சங்மாவை ஆதரிக்கும் கட்சியின் முடிவை அறிவித்தார். இருப்பினும், பெரும்பான்மையை நிரூபிக்க, கூட்டணியில் இன்னும் சில கட்சிகளை ஒன்றிணைக்க வேண்டியிருக்கும் என்று எதிர்பார்க்கப்படுகிறது.
இது குறித்து கான்ராட் சங்மா கூறும்போது, “எங்கள் கட்சிக்கு வாக்களித்த எங்கள் மாநில மக்களுக்கு நான் நன்றி கூறுகிறேன். அவர்களுக்கு நாங்கள் நன்றியுள்ளவர்களாக இருப்போம். இன்னும் எண்ணிக்கை குறைவாகவே உள்ளோம், இறுதி முடிவுக்காக காத்திருக்கிறோம், அதன் பிறகு நாங்கள் முடிவு செய்வோம்” என அவர் தெரிவித்தார்.
அதேபோல் கடந்த பிப்ரவரி 27ம் தேதி வெளியிடப்பட்ட தேர்தலுக்கு பிந்தய கருத்து கணிப்பு முடிவில், மேகாலயாவில் தொங்கு சட்டசபை அமையும் என எக்சிட் போல் கணித்ததை அடுத்து, கான்ராட் சங்மா அஸ்ஸாம் பிரதமர் ஹிமந்தா பிஸ்வா சர்மாவை கவுகாத்தியில் சந்தித்து பேசினார் என்பது குறிப்பிடதக்கது.
அதேபோல் 2018 ஆம் ஆண்டில் மாநிலத்தில் இரண்டு இடங்களில் மட்டுமே வெற்றி பெற்ற பாஜக, 6 இடங்களைக் கைப்பற்றி அதன் எண்ணிக்கையை ஓரளவுக்கு விரிவுபடுத்தும் என்று கருத்துக் கணிப்புகள் கணித்திருந்தன. காங்கிரஸ் 6 இடங்களில் வெற்றி பெறலாம் என்றும், திரிணாமுல் காங்கிரஸ் 11 இடங்களுடன் தனது கணக்கைத் திறக்கலாம் என்றும் கருத்துக் கணிப்புகள் தெரிவிக்கின்றன.