டெல்லி பெண்களுக்கான ஆணையம் (DCW) தனது வருடாந்திர சர்வதேச மகளிர் தின விருது வழங்கும் விழாவை, இன்று இந்திய வாழ்விட மையத்தின் ஸ்டெய்ன் ஆடிட்டோரியத்தில் நடத்தியது. அதில் பெண்களுக்காக பாடுபட்டவர்களை ஆணையம் கவுரவித்தது. இந்த நிகழ்ச்சியில் டெல்லி முதல்வர் அரவிந்த் கெஜ்ரிவாலும் கலந்து கொண்டார்.
ஆயுதப் படைகள், விளையாட்டு, சமூக நிறுவனங்களைச் சேர்ந்த பெண் அதிகாரிகள் மற்றும் சாதாரண குடிமக்கள் சிறப்பாக பணியாற்றியதற்காக கௌரவிக்கப்பட்டனர். இந்த ஆண்டு 90 விருதுகள் ஆணையத்தால் வழங்கப்பட்டன.
விருதுகளை வென்ற முக்கிய முகங்களில் இந்திய டென்னிஸ் நட்சத்திரம் சானியா மிர்சா, இந்திய U-19 கிரிக்கெட் வீராங்கனை சோனியா மெண்டியாந்த் மற்றும் சர்வதேச ஹாக்கி வீரர் மும்தாஜ் கான் ஆகியோர் அடங்குவர். பயங்கரவாதிகளுடன் சண்டையிட்டு வீர மரணம் அடைந்த தியாகி நிஷாந்த் மாலிக் மற்றும் துப்பாக்கி வீரர் மனோஜ் பாடி ஆகியோரின் குடும்பத்தினருக்கும் டெல்லி முதல்வர் மரியாதை செலுத்தினார்.
இந்த விருது வழங்கும் விழாவில் டெல்லி மகளிர் ஆணையத்தின் தலைவி ஸ்வாதி மாலிவால் தனது வாழ்க்கையின் துயரத்தையும், பாலியல் வன்கொடுமை மற்றும் குடும்ப வன்முறைக்கு எதிராக போராடியதையும் விவரித்தார்.
மேலும் விருது பெற்ற பெண்களின் போராட்டக் கதைகள், தன் தந்தையால் தான் எப்படி ‘பாலியல் வன்கொடுமைக்கு ஆளானேன்’ என்பது குறித்த சொந்தப் போராட்டத்தை நினைவூட்டியதால், இந்த நிகழ்வு தன்னை உணர்ச்சிவசப்படுத்தியது என்று ஸ்வாதி மாலிவால் கூறினார். இது குறித்து ஸ்வாதி மாலிவால் பேசும்போது, ‘‘நான் குழந்தையாக இருந்தபோது எனது தந்தையால் பாலியல் வன்கொடுமைக்கு ஆளானேன். என் அப்பா என்னை அதிகம் அடிப்பார், பாலியல் பலாத்காரம் செய்தார்.
அவர் வீட்டிற்கு வரும்போது எல்லாம் ஏதோ ஒரு அச்சம் என் நரம்புகளை படரும். அப்பா வீட்டிற்கு வந்ததும் நான் படுக்கைக்கு அடியில் ஒளிந்து கொள்வேன். அப்போது நான் மிகவும் பயந்தேன், அந்த நேரத்தில் நான் பெண்களுக்கு எதிராக எப்படி அதிகாரம் செலுத்துவது என்று இரவு முழுவதும் யோசித்தேன். அவர் என் தலைமுடியைப் பிடித்து சுவரில் என் தலையை பலமாக அடிப்பார். எனக்கு இரத்தம் வரும்.
ஆனால் அது பெண்களின் நலனுக்காக உழைக்க வேண்டும் என்ற உறுதியை எனக்குள் பற்றவைத்தது என்று நான் நம்புகிறேன். நான்காம் வகுப்பு வரை என் தந்தையுடன் தங்கியிருந்தேன்’’ என அவர் கூறினார். கடந்த சில நாட்களுக்கு முன்பு நடிகை குஷ்பு தனது தந்தையால் பாலியல் வன்கொடுமைக்கு உள்ளாக்கப்பட்டது குறித்து பேசியதைத் தொடர்ந்து, டெல்லி மகளிர் ஆணையத்தின் தலைவியும் தந்தையால் பாலியல் தொல்லைக்கு ஆளாகியிருப்பது நாடு முழுவதும் பேசுபொருளாகியுள்ளது.