திமுக அமைச்சர்கள் பொன்முடி, தங்கம் தென்னரசு மற்றும் கேகேஎஸ்எஸ்ஆர் ராமச்சந்திரன் ஆகியோர் மீதான வழக்குகள் கீழமை நீதிமன்றங்களில் முடித்து வைக்கப்பட்ட நிலையில் சென்னை உயர்நீதிமன்றம் அந்த வழக்குகளை தாமாக முன்வந்து விசாரிக்க தொடங்கியுள்ளது.
சென்னை உயர்நீதிமன்ற நீதிபதி ஆனந்த் வெங்கடேஷ், தாமாக முன்வந்து சூமோட்டோ வழக்காக எடுத்துள்ளார். அந்த வழக்குகள் நேற்று விசாரணைக்கு வந்தன. அப்போது அமைச்சர்கள் தங்கம் தென்னரசு, கேகேஎஸ்எஸ்ஆர் ராமச்சந்திரன் ஆகியோரது வழக்குகளில் வழங்கப்பட்டுள்ள தீர்ப்பு ஒரே மாதிரி இருப்பதாகவும், அந்த தீர்ப்பை படித்துவிட்டு 3 நாட்களாக தூங்கவில்லை என்று கூறியிருந்தார்.
இந்நிலையில திமுக அமைப்புச் செயலாளர் ஆர்எஸ் பாரதி சென்னை அறிவாலயத்தில் இன்று செய்தியாளர்களை சந்தித்தார். அப்போதுஏற்கனவே முடிக்கப்பட்ட வழக்குகளை சென்னை உயர்நீதிமன்றம் தாமாக முன் வந்து விசாரிப்பது தொடர்பாக விளக்கம் அளிக்க வேண்டிய கடமை தமக்கு உள்ளதாக கூறினார். முடித்து வைக்கப்பட்ட வழக்குகளை உயர்நீதிமன்றம் தாமாக வந்து விசாரிப்பது ஏன் என்று கேள்வி எழுப்பிய அவர், தாமாக விசாரிக்க உரிமை இருந்தாலும் பழிவாங்கும் நோக்கில் விசாரிக்க கூடாது என்றார்.
ED எங்களுக்கு தேர்தல் பிரச்சாரம் மாதிரி தான் ஆர்.எஸ் பாரதி
எடப்பாடி பழனிசாமிக்கு எதிரான 3600 கோடி டெண்டர் வழக்கில், சிபிஐ விசாரணைக்கு உத்தரவிட்ட வழக்கை மீண்டும் விசாரிப்பது நீதிமன்ற நேரத்தை வீணடிக்கும் செயல் என்று விமர்சித்த நீதிபதி ஆனந்த் வெங்கடேஷ், தற்போது முடித்து வைக்கப்பட்ட வழக்குகளை விசாரித்து நேரத்தை வீணடிக்கிறார், 2 வாரங்களுக்குபின் தனது நிலைபாட்டை மாற்றியுள்ளார் என்றார்.
முடித்து வைக்கப்பட்ட வழக்கை விசாரித்து மக்கள் மத்தியில் தவறான எண்ணத்தை ஏற்படுத்த முயற்சி செய்வதாகவும் ஆர்எஸ் பாரதி குற்றம்சாட்டியுள்ளார். யார் வழக்கு தொடர்ந்தாலும் சட்டப்படி எதிர்கொள்ள அமைச்சர்கள் தயாராக இருப்பதாகவும், உச்சநீதிமன்றத்தை நாட உள்ளதாகவும், நீதிபதி ஆனந்த் வெங்கடேஷ் நடவடிக்கை குறித்து உச்சநீதிமன்றத்தில் எடுத்துரைக்க உள்ளதாகவும் ஆர்எஸ் பாரதி தெரிவித்துள்ளார்.
கூகுள் செய்திகள் பக்கத்தில் Samayam Tamil இணையதளத்திற்கு செல்ல இங்கே கிளிக் செய்யுங்கள்.. உடனுக்குடன் செய்திகளை பெறுங்கள்.