காசாவில் தரைவழி தாக்குதல் துவக்கம் 24 மணி நேரத்தில் 750 பேர் பலி| Ground attack on Gaza kills 750 in 24 hours

ரபா, காசா பகுதியை தரை வழியே முற்றுகையிடுவதற்கு முன்னதாக, போர்க் களத்தை தங்களுக்கு சாதகமாக தயார் செய்யும் நோக்கத்துடன், வடக்கு காசா மீது பல மணி நேரங்கள் தொடர்ச்சியாக தரைவழி தாக்குதல்களை இஸ்ரேல் ராணுவம் நேற்று நடத்தியது.

மேற்கு ஆசிய நாடான இஸ்ரேல் – ஹமாஸ் இடையே கடந்த ஆறு வாரங்களுக்கும் மேலாக தொடர்ந்து வரும் போர் காரணமாக, காசா பகுதியில் எரிபொருள் தீர்ந்து போகும் தருவாயில் உள்ளது. இதனால், பெரும்பாலான மருத்துவமனைகள் மூடப்பட்டுள்ளன.

இதன் காரணமாக, நிவாரண பொருட்களை வழங்கும் பணியில் சுணக்கம் ஏற்பட்டுள்ளதாக ஐ.நா., தெரிவித்துள்ளது.

நேற்று முன்தினம் நடந்த தாக்குதலில், 24 மணி நேரத்தில் 750க்கும் மேற்பட்டோர் கொல்லப்பட்டுள்ளதாக ஹமாஸ் சுகாதாரத்துறை தெரிவித்துள்ளது.

காசாவில் உள்ள அல் ஜசீரா செய்தி ஊடகத்தின் மூத்த செய்தியாளர் வேய்ல் தாதோ என்பவரின் மனைவி, மகன், மகள் மற்றும் பேரக்குழந்தை நேற்று முன்தினம் கொல்லப்பட்டனர்.

ஹமாஸ் பயங்கரவாதிகளின் மறைவிடத்தை மட்டுமே குறிவைத்து தாக்குவதாகவும், பொதுமக்கள் வசிக்கும் பகுதிகளில் பயங்கரவாதிகள் மறைந்திருந்து தாக்குதல் நடத்துவதாகவும் இஸ்ரேல் ராணுவம் தெரிவித்துள்ளது.

இது குறித்து, இஸ்ரேல் ராணுவ செய்தி தொடர்பாளர் டேனியல் ஹகாரி கூறியதாவது:

வடக்கு காசா நோக்கி தரைவழியே முன்னேற துவங்கியுள்ளோம். போர்க் களத்தை எங்களுக்கு சாதகமாக தயார் செய்வதற்காக, பயங்கரவாதிகளின் கட்டமைப்புகள், பீரங்கி எதிர்ப்பு வாகனங்களை குறிவைத்து தகர்த்து வருகிறோம்.

போரின் அடுத்த கட்டத்தை தயார் செய்வதன் ஒரு பகுதியாக இந்த வரையறுக்கப்பட்ட ஊடுருவலை செய்து வருகிறோம்.

கடந்த 24 மணி நேரத்தில் ஹமாஸ் பயங்கரவாதிகளின் சுரங்க பாதைகள், ராக்கெட் லாஞ்சர்கள், ராணுவ கட்டமைப்புகளை குறிவைத்து, 250க்கும் அதிகமான வான்வழி ஏவுகணை தாக்குதல்களை நிகழ்த்தி உள்ளோம்.

இவ்வாறு அவர் கூறினார்.