டிசம்பர் 8ல் 'துருவ நட்சத்திரம்' ரிலீஸ் ?
கவுதம் மேனன் இயக்கத்தில், ஹாரிஸ் ஜெயராஜ் இசையமைப்பில், விக்ரம், ரித்து வர்மா மற்றும் பலர் நடித்துள்ள படம் 'துருவ நட்சத்திரம்'. பல சிக்கல்கள், பிரச்சனைகள், தடைகளைத் தாண்டி இப்படம் கடந்த வாரம் நவம்பர் 24ம் தேதி வெளியாகும் என அறிவிக்கப்பட்டிருந்தது. ஆனால், அன்றைய தினம் படம் வெளியாகவில்லை.
இதனிடையே படத்தை டிசம்பர் 1ம் தேதி வெளியிடுவதற்கான வேலைகளை கவுதம் மேனன் ஆரம்பித்ததாகச் சொன்னார்கள். படத்திற்காக இருக்கும் பஞ்சாயத்துகளை பேசித் தீர்த்து வைக்க அவருடைய பழைய நண்பரும் தயாரிப்பாளருமான மதன் உதவியை அவர் நாடினார் என்றும் தகவல் வெளியானது.
தற்போது கேரளா தியேட்டர்காரர்களுக்கு, அதன் கேரள வினியோகஸ்தர் படம் டிசம்பர் 1ல் வெளியாகாது என்று தகவல் அனுப்பியுள்ளதாக செய்திகள் வெளியாகி உள்ளது. டிசம்பர் 8ம் தேதி படத்தை வெளியிட திட்டமிட்டுள்ளதாகவும் சொல்கிறார்கள். இன்னும் பத்து நாட்கள் உள்ளதால் அதற்குள் அனைத்து பஞ்சாயத்துகளையும் முடித்துவிடலாம் என நினைத்துள்ளார்களாம்.